ကယီၤကယီၤန့ၣ် ဘ့းထၢၣ်ထုးက့ၤအသးလၢ တၢ်ကွၢ်တၢ်ဘ့ၣ်ဆ့တၢ်ဂီၤ တန့ၢ်လၢၤဘၣ်. အတံၤသကိးအါဂၤ ကွၢ်တၢ်ဂီၤမူဘၣ်အၢဘၣ်သီတဖၣ်, ဘ့းထၢၣ်စ့ၢ်ကီးတၢ်ကၢၣ် အသးအဃိ ကွၢ်ပိၥ်ဃုၥ်အသးကိးတဖၣ်အခံလီၤ. ဘၣ်ဆၣ်ခဲအံၤ, တၢ်မၤအံၤ ကမၣ်ဝဲထဲလဲၣ်န့ၣ် ဘ့းထၢၣ်နၢ်ပၢၢ်လံ – အဝဲမၤကမၣ်ဘၣ်ကစၢ်ယွၤလံ – မၤဟးဂီၤ မၤသဘှံအမါအသးလံ. အဝဲဆီၣ်လီၤက့ၤအသးလၢ ကပၢၤဃၥ်က့ၤအတၢ်အိၣ်မူ ဒီးတကွၢ်တၢ်ဘၣ်အၢတဖၣ်န့ၣ်လၢၤဘၣ်. ဘၣ်ဆၣ် အဝဲပျံၤတၢ်လၢ တၢ်အံၤမ့ၢ်စဲၤခံ ဝဲလံဧါ. အတၢ်ဆီဟံၣ်ဆီဃီ ဘၣ်ကမုၥ်ဒံးလၢၤဧါ. အဝဲကထူၣ်ဖျဲးထီၣ်ဝဲထီဘိဒီး ဒိးန့ၢ် တၢ်ပျၢ်တၢ်ကမၣ်အလၢအၦဲၤစ့ၢ်ဧါ.
ပဒုၣ်ပဒါမုၢ်ကီၤလံၢ် လ့ပစီတၢ်န့ၣ် မၤသးဒ် တမ့ၢ်တၢ်လၢအကီကဲၣ်ဆိးဘၣ်. အဝဲစံး, ‘ၦၤကိးဂၤမၤတၢ်ဒ်န့ၣ်ကစီဒီ, တၢ်ဘၣ်ဒိဆါမနုၤကအိၣ်လဲၣ်.’ ဘၣ်ဆၣ် ဖဲပစဲဘူးလၢအတၢ်ကူၣ် အကျဲတစိၢ်အပူၤ အဝဲစးထီၣ်မၤတၢ် ဒီးစံးဝဲ, “စဲၤခံဒိၣ်မးလံ. နလဲၤပူၤကွံၥ် ဖးယံၤမးလံ. ခဲအံၤနတၢ်မုၢ်လၢ်ဟါမၢ်လံ”န့ၣ်လီၤ.
ဒ်ပအိၣ်လၢနီၢ်သးတၢ်ဒုးပူၤအသိး, ဒုၣ်ဒါန့ၣ် ဒ်သိးကမၤဟးဂီၤၦၤအဂီၢ် တၢ်လၢအမိၣ်မၤသးန့ၣ် မနုၤဂ့ၤ မနုၤဂ့ၤ ကတဲၦၤလီၤ. ယ့ၣ်ၡူးစံးဝဲ, “အဝဲန့ၣ် လၢသီလံၤလံၤ မ့ၢ်ၦၤလၢအမၤသံၦၤကညီ, ဒီးတဆၢထၢၣ်ဘၣ်လၢ တၢ်မ့ၢ်တၢ်တီ အပူၤဘၣ်. အဂ့ၢ်ဒ်အံၤ, တၢ်မ့ၢ်တၢ်တီ တအိၣ်ဘၣ်လၢအပူၤဘၣ်. တုၤအကတိၤ တၢ်ကတိၤ ကဘျံးကဘျၣ် ဒီးမ့ၢ်အကတိၤတၢ်လၢအတၢ်ဒၣ်ဝဲလီၤ. အဂ့ၢ်ဒ်အံၤ, မ့ၢ် ၦၤလၢအကတိၤတၢ်ကဘျံးကဘျၣ်, ဒီးမ့ၢ်တၢ်ကတိၤကဘျံးကဘျၣ် အပၢ်လီၤ” (ယိၤ ၈:၄၄).
ၦၤလီတၢ် မုၢ်ကီၤလံၢ်တဂၤန့ၣ်, ပတကြၢးဒိကနၣ်အီၤ နီတဘျီဘၣ်. ဖဲလၢအတဲၦၤ ပတၢ်ဒဲးဘး တမ့ၢ်တၢ်အဒိၣ်, မ့တမ့ၢ် ပဂီၢ်တၢ်မုၢ်လၢ်တအိၣ်လၢၤဘၣ်အခါ မ်ယ့ၣ်ၡူးမၤစၢၤၦၤလၢ ပကမၤဟါမၢ်ကွံၥ် မုၣ်ကီၤလံၢ်အတၢ်ကတိၤ ဒီးဒိကနၣ်ထဲ ယ့ၣ်ၡူးတက့ၢ်. ပပၥ်လီၤပသးလၢ ယ့ၣ်ၡူးအတၢ်အၢၣ်လီၤအလိၤ, “ သုမ့ၢ်အိၣ်ဆိး လၢယကလုၢ်ကထါအပူၤဒီး သုမ့ၢ်ယပျဲၢ်ယဘီၣ်အနီၢ်အသံးလီၤ. ဒီးသုကသ့ၣ်ညါ တၢ်မ့ၢ်တၢ်တီ ဒီးတၢ်မ့ၢ်တၢ်တီန့ၣ် ကမၤထူၣ်ဖျဲးသုလီၤ” (:၃၁-၃၂).
