ဖဲခရံၥ်ဖိကရၢအါဖု ပၥ်ဖှိၣ်ဘါသကိးတၢ်န့ၣ် အဝဲသ့ၣ်သးဝံၣ် တၢ်စံးထီၣ်ပတြၢၤ အတၢ်သးဝံၣ်တဖၣ်ဝံၤ ခီဖျိဘၣ်တၢ်သးခုဒီးတၢ်ဃူတၢ်မုၥ်လီၤ. ဘၣ်ဆၣ်မိၢ်တဂၤ လီၤဘှံး ဒိၣ်မးလီၤ. ဘၣ်သယဲအဖိလၢ အဟီၣ်တဂၤ ဒီးလၢအစုအဂၤတခီ ဘၣ်စိၥ်လံၥ်ဒီးဒုးနဲၣ်အဖိခွါယဲၢ်နံၣ်ဖိတဂၤလၢ လံၥ်သးဝံၣ်လီၤ. အဖိဟးထီၣ်သီဖိတဂၤစ့ၢ်ကီး ဝ့ၤဝီၤအသးလီၤ. တၢ်န့ၣ်အဃိ သးၦၢ်ပိၥ်ခွါတဂၤလၢ အဆ့ၣ်နီၤလၢအချၢန့ၣ် ကိးဖိသၣ် အဟးထီၣ်သီတဂၤဒီး ဟးယုၤဝဲဆူတၢ်ချၢလီၤ. ပိၥ်မုၣ်သးစၢ် ဖီၣ်လံၥ်သးဝံၣ်လၢ အဖိယဲၢ်နံၣ်ဖိအဂီၢ်လီၤ. လၢခံမံးနံးအဘၢၣ်ကဝီၤန့ၣ် မိၢ်တဂၤအံၤ စံးထီၣ်ပတြၢၤယွၤ လၢ တၢ်သဘျ့, ဘံၣ်လီၤအမဲၥ်ချံဒီးဘါယွၤလီၤ.
ထီဘိယွၤဘၣ်အသးလၢ အၦၤဂီၢ်မုၢ်ကဘါထီၣ်အီၤလီၤ. ပိၥ်ခွါဒီးပိၥ်မုၣ်, သးၦၢ်ဒီးသးစၢ်, ၦၤနၥ်တၢ်ယံာ်တ့ၢ်လံ ဒီးၦၤဟဲသီတဖၣ်လီၤ. ဒ်စီၤမိၤရှ့ ဆိၣ်ဂ့ၤ အံၣ်စရ့လးဖိတဖၣ် တချုးလဲၤနုၥ်ဆူ ကီၢ်တၢ်စံးပၥ်ဒံးန့ၢ်, တခူထီၣ်အဝဲသ့ၣ်လၢ ကပၥ်ဖှိၣ်လိၥ်သး “ပိၥ်ခွါဒီး ပိၥ်မုၣ်, ဒီးဖိဒံဖိသၣ်, ဒီးၦၤတခီဘီမုၢ်ဖိလၢ အအိၣ်လၢ နပဲတရီပူၤ, ဒ်သိး အကနၢ်ဟူဒီးကမၤလိတၢ် ဒီးပျံၤယွၤသုကစၢ်ဒီး ပလီၢ်အသးလၢ အကမၤတၢ်သိၣ်တၢ်သီ…” (၅ မိၤ ၃၁:၁၂). ဖဲပမၤန့ၢ် ယွၤအၦၤဂီၢ်မုၢ်တဖၣ် လၢ ကဘါယွၤန့ၣ် မ့ၢ်ပမၤလၤကပီၤယွၤ ဒီးကမ့ၢ်ဒၣ်ဝဲ ဖဲပတၢ်အိၣ်မူအကတီၢ်တခါဂ့ၤ တခါဂ့ၤလီၤ.
လၢသရိၥ်ပူၤ ဖဲမုၢ်ဂီၤအဝဲန့ၢ်န့ၣ်, မိၥ်, သးၦၢ်ပိၥ်ခွါကမၤစၢၤတၢ်, ပိၥ်မုၣ်သးစၢ်ဖိ, တဂၤစုၥ်စုၥ်, ပလၢၢ်ဘၣ် ယွၤအတၢ်အဲၣ် ခီဖျိတၢ်မၤဂ့ၤမၤစၢၤလိၥ်သး ဒီး ဒိးန့ၢ်တၢ်မၤစၢၤလီၤ. ခဲကိၥ်တဘျီ နမ့ၢ်အိၣ်လၢ သရိၥ်ပူၤန့ၣ် နဟ့ၣ်နီၤ ယွၤအတၢ်အဲၣ် ခီဖျိ နမၤစၢၤၦၤဂၤသ့ဒီး နဒိးန့ၢ်စ့ၢ်ကီး တၢ်မၤဂ့ၤမၤဘျုးနၤသ့လီၤ.
