ကၠၢရိၣ်စလးဖဲလံၣ်ခဲၣ် မ့ၢ်ယ့(လ)ဖၠၣ်စိမိၤသရၣ်ဒိၣ်စိလၢ တၢ်ပၥ်အီၤ ဒ်ၦၤလၢ “အတၢ်လီၤစၢၤ အိၣ်ဒီးစိကမီၤဒိၣ်စိလၢ ခရံၥ်ဖိအတၢ်စံၣ်စိၤတဲစိၤ” အပူၤတဂၤ အမံၤဒိၣ်လၢ အတၢ်ကူၣ်ဘၣ် ကူၣ်သ့အတၢ်မၤလၢ လုၣ်ဘၢတၢ်လီၢ်ဖးလဲၢ်လီၤ. အဝဲစဲကျံး ထုးထီၣ် အလံၥ် အါန့ၢ်အဘ့ၣ်သၢဆံ ဒီးမၤန့ၢ်ခိၣ်ဖး (esteemed Kluge Prize), ဒ်တစိၤသး ခိၣ်ဖးလၢအတၢ်ကွဲး အါကတြူၢ်အဃိလီၤ. လၢအပျဲၢ်အကျါတဂၤ ပၥ်ဖျါထီၣ်က့ၤ တၢ်ကတိၤ အကါဒိၣ်ကတၢၢ်လၢအသရၣ်တဲဝဲတချုးလၢ အသံဒံးဘၣ်. ဖဲအလီၢ်မံခိၣ်န့ၣ်စံး, “ကစၢ်ခရံၥ် မ့ၢ်ဂဲၤဆၢထၢၣ် သမူထီၣ်န့ၣ် တၢ်အဂုၤအဂၤတမ့ၢ်တၢ်အကါဒိၣ်ဘၣ်. ဒီးခရံၥ် မ့ၢ်တဂဲၤထၢၣ်သမူထီၣ် ဘၣ်ဆၣ် တၢ်အဂုၤအဂၤတမ့ၢ် တၢ်အကါဒိၣ်ဘၣ်လီၤ”.
ဖဲလံၣ်ခဲၣ်တဲက့ၤစီၤပီလူးအတၢ်နၥ် ဒီးတူၢ်လိၥ်ဝဲလီၤ. ဖဲလံၣ်ခဲၣ်တဲကဒါက့ၤ စီၤပီလူးအတၢ်ကတိၤ “ခရံၥ်မ့ၢ်တဂဲၤဆၢထၢၣ်က့ၤဘၣ်ဒီး ပစံၣ်တဲၤတဲလီၤန့ၣ် မ့ၢ်တၢ်ကလီကလီဒီး သုစူၢ်က့ၤနၥ်က့ၤတၢ်န့ၣ် မ့ၢ်စ့ၢ်ကီး တၢ်ကလီကလီလီၤ” (၁ ကရံၣ် ၁၅:၁၄). စီၤပီလူး ပၥ်ဖျါတၢ်ဂ့ၢ်န့ၣ် ဒူဒူ မ့ၢ်လၢအဝဲသ့ၣ်ညါဝဲလၢ
တၢ်ဂဲၤထၢၣ် သမူထီၣ် မ့ၢ်တၢ်နီၢ်နီၢ် ဒီးတမ့ၢ်တၢ်လီၤလးထဲတမံၤ ဒီးဝံၤဘၣ်, မ့မ့ၢ်ယွၤ အတၢ်အုၣ်က့ၤခီၣ်က့ၤ လၢၦၤကညီအတၢ်စံၣ်စိၤတဲစိၤအပူၤလီၤ. တၢ်ဂဲၤထၢၣ်သမူထီၣ် အတၢ်အၢၣ်လီၤအီလီၤအံၤ တမ့ၢ်ထဲတၢ်လီၤတံၢ်လၢခရံၥ် ကဂဲၤထၢၣ်သမူထီၣ်ဘၣ် မ့မ့ၢ်အတၢ်တဲလီၤတံၢ် နီၢ်နီၢ်လၢ တၢ်သံလၢအဂၤ ဒီးတၢ်ဟးဂူၥ်ဟးဂီၤကွံၥ်တဖၣ် (သးသမူတဖၣ်, တၢ်အိၣ်လၢခိၣ်ဃၢၤတဖၣ်, တၢ်ရ့လိၥ်ဘၣ်ထွဲတဖၣ်). မုၢ်တနံၤကဘၣ် တၢ်ဟ့ၣ်က့ၤအီၤလၢ တၢ်မူခီဖျိခရံၥ်လီၤ. တၢ်ဂဲၤထၢၣ်သမူထီၣ် မ့ၢ်တအိၣ်ဘၣ်ဒီး စီၤပီလူး သ့ၣ်ညါဝဲလၢ ပအိၣ်ဒီး တၢ်ကီဖးဒိၣ်လီၤ. တၢ်ဂဲၤထၢၣ်သမူထီၣ် မ့ၢ်တအိၣ်ဘၣ်ဒီး တၢ်သံဒီးတၢ်မၤဟးဂီၤ မၤနၢၤတၢ်လီၤ.
ဘၣ်ဆၣ်, အနီၢ်နီၢ်န့ၣ် “ခရံၥ်ဂဲၤဆၢထၢၣ်က့ၤလံလၢတၢ်သံလံ” (:20). တၢ်သံဃၣ်ကွံၥ် ခီဖျိခရံၥ် အတၢ်မၤနၢၤလီၤ. ယ့ၣ်ၡူးမ့ၢ်တၤသၣ်ဆိလၢ ၦၤကမူထီၣ်လၢခံတဖၣ်အဂီၢ်လီၤ. အဝဲမၤနၢၤတၢ်အၢဒီးတၢ်သံ ဒ်သိးပကမူဘၣ်ဒူဒူ ဒီးလၢတၢ်သဘျ့လီၤ. တၢ်အံၤလဲလိၥ် တၢ်ခဲလၢၥ်လီၤ.