ယလံၤဖိတဖၣ် ဃ့ၢ်၀့ၤ၀ီၤလၢယဟံၣ်လီၢ်ခံကရၠာစးၢၢ်ပူၤန့ၣ်လီၤႉ အ၀ဲသ့ၣ်လိာ်ကွဲဧါႉ တမ့ၢ် ဘၣ်ႉ မ့ၢ်အထဲးထီၣ် နီၣ်ဧိၤမံၤဧိၤတဖၣ်လီၤႉ အဆံးကတၢၢ်ဖိတဂၤန့ၣ် စိာ်၀ဲတၢ်လၢ အထဲးထီၣ်၀ဲပှဲၤလၢအစုပူၤ ဒီးစံး၀ဲ ‘‘ယထဲးထီၣ်အီၤတုၤလၢအဂံၢ်လီၤ’’ႉ အနံၤ၀ဲန့ၣ် ပထဲးထီၣ် နီၣ်ဧိၤမံၤဧိၤတုၤလၢအဂံၢ်ဒီး စံၢ်ဃာ်စှီၤဃာ်အီၤလၢပစုပူၤ ဒီးအ၀ဲဒၣ်အသးခုဖးဒိၣ် လၢအမၤသကိးတၢ်မၤပျီကွံာ် တၢ်လၢအကဲထီၣ်တၢ်ကီတၢ်ခဲ တၢ်မၤတံာ်တာ်တၢ် တဖၣ်န့ၣ်လီၤႉ ဘၣ်ဆၣ်ဒီး တချုးလၢတၢ်သးခုန့ၣ် ပဘၣ်လူၤကွၢ်ထွဲအ၀ဲသ့ၣ်န့ၣ်လီၤႉ
တၢ်ထဲးကွံာ်နီၣ်ဧိၤမံၤဧိၤလၢ တၢ်တိာ်သူၣ်ပာ်သးမၤအီၤန့ၣ်‚ မ့ၢ်စ့ၢ်ကီး ပခီၣ်ကါအခီၣ်ထံးတခါလၢ တၢ်ထုးကွံာ်ပနီၢ်ကစၢ်အတၢ်ဒဲးဘးန့ၣ်လီၤႉ မၤသးဒ်န့ၣ်ဒီး စီၤဒၤ၀ံး ဘါထုကဖၣ်တၢ်ဒီးစံး၀ဲ‚ ‘‘ကစၢ်ဧၢဃုကွၢ်ယၤဒီးသ့ၣ်ညါယသးတက့ၢ်ႉႉႉ ဒီးကျဲ အအၢလၢယပူၤ မ့ၢ်အအိၣ်တအိၣ်လဲၣ်န့ၣ်‚ ကွၢ်ဒီးဆှၢယၤလၢ ကျဲအထူအယိာ်ပူၤတက့ၢ်’’ န့ၣ်လီၤ (စံး ၁၃၉း၂၃-၂၄) ႉ
တၢ်ဃ့ကညးယွၤလၢ ကဒုးထံၣ်လီၤက့ၤပှၤလၢ ပတၢ်ဒဲးဘးန့ၣ် မ့ၢ်တၢ် ကူၣ်သ့လီၤႉ ကစၢ်ယွၤန့ၣ် သ့ၣ်ညါပတၢ်အိၣ်မူလၢနီၢ်ခိ‚ လၢသူၣ်လၢသးကိးအမံၤဒဲးလီၤႉ စီၤဒၤ၀ံးစံး၀ဲ‚ ယွၤဧၢ‚ ဃုကွၢ်ထံယၤဒီးနသ့ၣ်ညါယၤလီၤႉ ယဆ့ၣ်နီၤဒီးယဆၢထၢၣ်န့ၣ် နသ့ၣ်ညါလီၤႉ နနၢ်ပၢၢ်ယတၢ်ဆိကမိၣ်လၢအယံၤလီၤ (စံး ၁၃၉း၁‚၂) ႉ
ဒီးစီၤဒၤ၀ံး ကွဲးအါထီၣ်၀ဲ‚ ‘‘တၢ်သ့ၣ်ညါဒ်န့ၣ်အသိး လီၤလးဒိၣ်ကဲၣ်ဆိးလၢ ယဂီၢ်လီၤႉ အိၣ်ထီၣ်ထီ၀ဲန့ၣ် ယထီၣ်ဘးတသ့ဘၣ်’’ န့ၣ်လီၤႉ တချုးလၢ တၢ်ဒဲးဘး ဆဲးလီၤအဂံၢ်န့ၣ်‚ ကစၢ်ယွၤ မၤပ့ၢ်ဆှါထီၣ်ပသးလၢ တၢ်လီၤပျံၤလီၤဖုးအဂ့ၢ်န့ၣ်လီၤႉ ကစၢ်ယွၤသ့ၣ်ညါ ပတၢ်အိၣ်မူဟီၣ်ခိၣ်အဘၢၣ်က၀ီၤ ခဲလၢာ်လီၤႉ မၤသးဒ်န့ၣ်ဒီး ဖဲ တၢ်ဒဲးဘး ကနုာ်လီၤခူသူၣ်ဒီးဆဲးလီၤအဂံၢ်န့ၣ်‚ အ၀ဲမ့ၢ် ပှၤအဆိကတၢၢ်လၢအသ့ၣ်ညါ ဒီးမၤဖျါထီၣ်န့ၢ်ပှၤန့ၣ်လီၤႉ စီၤဒၤ၀ံးကွဲးစ့ၢ်ကီး၀ဲ‚ ‘‘ယကလဲၤပူၤကွံာ် လၢနသးဆူလဲၣ်ႉ ဒီးယကဃ့ၢ်ပူၤကွံာ်လၢနမဲာ်ညါဆူလဲၣ်’’ န့ၣ်လီၤ (စံး ၁၃၉း၇) ႉ
မ်ပပိာ် ကစၢ်ပှၤအုၣ်က့ၤခီၣ်က့ၤပှၤအခံ ဘူးဘူးတံၢ်တံၢ်ဆူ လီၢ်ထီၣ်ထီ တက့ၢ်ႉ