မ့ၢ်ယအဲၣ်ဒိးလဲၤခီဖျိဘၣ်နံၤဃံလၤတနံၤသတး‚ ယဟးထီၣ်ဆူ တၢ်ချၢဒီးဟးကျဲန့ၣ် တယံာ်ဘၣ်ဒီး ယထံၣ်လိာ်သးဒီးတံၤသကိးအသီတဂၤလီၤႉ အ၀ဲမၤအိၣ်ကတီၢ်ယၤဒီး တဲသ့ၣ်ညါလီၤအသးလၢ ‘‘ယမံၤမ့ၢ် ကၠဲနစ့း‚ ဒီးယသးအိၣ် ၆ နံၣ်တခီလီၤ’’ႉ
ယစံးဆၢက့ၤအီၤလၢ ‘‘ကၠဲနစ့းန့ၣ် မ့ၢ် မံၤအဂ့ၤဖးဒိၣ်တခါ‚ မ့ၢ်လံာ်လၢ အအိၣ်လၢလံာ်စီဆှံပူၤတဘ့ၣ်လီၤ’’ႉ ဒီးအ၀ဲသံကွၢ်ယၤ ‘‘လံာ်စီဆှံစံးတၢ်န့ၣ် မ့ၢ်တၢ်မနုၤလဲၣ်’’ န့ၣ်လီၤႉ
‘‘မ့ၢ်ကစၢ်ယွၤအလံာ်တၢ်တဲတဘ့ၣ်‚ လၢအတဲကစၢ်ယွၤတ့လီၤ ဟီၣ်ခိၣ်ဒီး ပှၤကညီတဖၣ်အဂ့ၢ်‚ ဒီးအဲၣ်ပှၤထဲလဲၣ်ထဲလဲၣ်အဂ့ၢ်လီၤ’’ႉ
အ၀ဲအတၢ်သံကွၢ်လၢ ကဆူးကတ့ၤအံၤ မၤနံၤကမှံထီၣ်ယၤလီၤႉ ‘‘ဘၣ်မနုၤ လၢ ကစၢ်ယွၤတ့လီၤ ဟီၣ်ခိၣ်ဒီးပှၤကညီ ဒီးသိလ့ၣ်တဖၣ်ဒီးဟံၣ်တဖၣ်လဲၣ်ႉ မ့ၢ်၀ံၤန့ၣ်‚ လၢကစၢ်ယွၤအလံာ်ပူၤန့ၣ် ယတၢ်ဂီၤပၣ်ဒံးဧါ’’ န့ၣ်လီၤႉ လၢယွၤကလုၢ်ကထါအပူၤ‚ ယတံၤသကိးအသီကၠဲနစ့း ဂ့ၤ ပ၀ဲတဖၣ်ဂ့ၤ‚ ပဂီၤတဖၣ်မ့ၢ်တပၣ်လိၤလိၤဘၣ်ဆၣ်‚ ပမ့ၢ်သကိးကစၢ်ယွၤအလံာ်တၢ်တဲအက့ဖးဒိၣ်တနီၤန့ၣ်လီၤႉ ပထံၣ်ဘၣ်ဖဲ ၁ မိၤဒီးအဆၢဒိၣ် ၁ န့ၣ် လၢ ‘‘ယွၤတ့လီၤပှၤကညီ ဒ်အဂီၤဒၣ်၀ဲအသိး‚ တ့လီၤ၀ဲလၢယွၤအဂီၤလီၤ’’ (း၂၇) ႉ ကစၢ်ယွၤ ဟးကျဲဒီးအ၀ဲသ့ၣ်လၢ ဖီကရၠာစးၢၢ်အပူၤ‚ တၢ်န့ၣ်၀ံၤဟ့ၣ်ပလီၢ်အီၤ ဘၣ်ဃး တၢ်ဟ့ၣ်လီၤသးဆူ တၢ်လ့ပစီအပူၤ ဒ်သိးကကဲထီၣ်အနီၢ်ကစၢ်ဒၣ်၀ဲ အယွၤလီၤ (အဆၢဒိၣ် ၃) ႉ လၢခံက့ၤ‚ လၢယွၤအလံာ်အပူၤန့ၣ် ကစၢ်ယွၤစံးကတိၤ ဘၣ်ဃး အဖိခွါ‚ ကစၢ်ယ့ၣ့်ှှူးန့ၣ်လၢ တၢ်အဲၣ်အပူၤ‚ ကဟဲဒီးဟးကျဲဒီးပှၤ ကဒီးတဘျီဒီး ဟဲစိာ်တၢ်ကူၣ်လၢတၢ်ပျၢ်ပှၤ ပတၢ်ကမၣ် ဒီးတၢ်ဘှီမၤဂ့ၤထီၣ်က့ၤ ယွၤအတၢ်တ့လီၤတၢ်မၤတဖၣ်လီၤႉ
ဖဲပကွၢ်လီၤလံာ်စီဆှံန့ၣ်‚ ပမၤလိန့ၢ်လၢ ပတၢ်တ့ကစၢ်အဲၣ်ဒိး၀ဲလၢ ပကသ့ၣ်ညါအီၤ‚ ကတိၤတၢ်ဒီးအီၤ‚ ဒီးသံကွၢ်အီၤလၢ ပတၢ်သံကွၢ်တဖၣ်ဒၣ်လဲာ်လီၤႉ ယွၤအံးထွဲကွၢ်ထွဲပှၤ အါန့ၢ်ဒိၣ်န့ၢ် ပဆိကမိၣ်သ့တက့ၢ်လီၤႉ