ဖဲယမၤစၢၤယဖိခွါလၢ အတၢ်ဂံၢ်တၢ်ဒွးအလံာ်လၢ ကဘၣ်မၤ၀ဲလၢဟံၣ်အခါန့ၣ်‚ ဖျါထီၣ် လၢ အ၀ဲအသးတဆူၣ်မၤတၢ်သံကွၢ်အါဘီ ဘၣ်ဃးဒီး နီၢ်ဂံၢ်ခံဖျၢၣ်ဂံၢ်ထီၣ်အဂ့ၢ် န့ၣ်ဘၣ်ႉ အ၀ဲစံးသပှၢ်ပှၢ် ‘‘ယသ့ၣ်ညါလံ‚ ပါပၢ်’’‚ ဒီးမုၢ်လၢ်၀ဲလၢယကပျဲ အ၀ဲမၤအကၠိလံာ်တၢ်မၤထဲတနီၤဧိၤန့ၣ်လီၤႉ ယတဲနၢ်ပၢၢ်အီၤကပုာ်လုးဖိလၢ တၢ်ဆိကမိၣ်န့ၣ် မ့ၢ်ဒၣ် တၢ်ဆိကမိၣ်တမံၤဧိၤ‚ တုၤလၢပမၤလိသ့ၣ်ညါလၢ ပကဘၣ်မၤလ့ၤအီၤဒ်လဲၣ်တစု န့ၣ်လီၤႉ
စီၤပီလူးကွဲး ဘၣ်ဃးတၢ်မၤထွဲအဂ့ၢ် ဆူအတံၤသကိးတဖၣ်လၢ ၀့ၢ်ဖံလံးပံၤ န့ၣ်လီၤႉ ‘‘တၢ်လၢသုမၤလိ‚ ဒီးသုဒိးန့ၢ်‚ ဒီးသုနၢ်ဟူ‚ ဒီးသုထံၣ်ဘၣ်လၢယၤတဖၣ်န့ၣ် မၤသု၀ဲတက့ၢ်’’ (ဖံး ၄း၉) ႉ အ၀ဲပာ်ဖျါထီၣ်တၢ် ၅ မံၤ‚ တၢ်အိၣ်ဃူအိၣ်ဖိးလိာ်သး‚ ဒ်အ၀ဲဟ့ၣ်သဆၣ် နီၢ်အူအိဒံၤ ဒီးနီၢ်စူၢ်တူဃ့ၤလၢအကမၤ၀ဲ (း၂-၃) ‚ တၢ်သးခု‚ ဒ်အ၀ဲမၤ သ့ၣ်နီၣ်ထီၣ်က့ၤ အပှၤဖးတၢ်ဖိတဖၣ်လၢ ကဒုးအိၣ်ထီၣ် (း၄) တၢ်သူၣ်စူၤသးစူၤ‚ ဟ့ၣ် သဆၣ်ထီၣ် အ၀ဲသ့ၣ်တဖၣ်လၢ အတၢ်ရၠာစး့လိာ်ဘၣ်ထွဲဒီး ဟီၣ်ခိၣ်‚ တၢ်ထုကဖၣ်‚ ဒ် အ၀ဲကဲတ့ၢ်အဒိလၢအ၀ဲသ့ၣ်အဂီၢ်လၢ အနီၢ်ကစၢ်ဒီးလၢအတၢ်ကွဲးအပူၤ (း၆-၇) ‚ ဒီး တၢ်ဆိကမိၣ်‚ ဒ်အ၀ဲပာ်ဖျါ၀ဲဒၣ်လၢ ဃိာ်ပူၤဒၣ်လဲာ် (း၈) န့ၣ်လီၤႉ တၢ်အိၣ်ဃူအိၣ်ဖိးလိာ်သး‚ တၢ်သးခု‚ တၢ်သူၣ်စူၤသးစူၤ‚ တၢ်ထုကဖၣ်ဒီး တၢ်ဆိကမိၣ်တဖၣ်န့ၣ် မ့ၢ်တၢ်လၢ ပကဘၣ်မူထွဲမၤထွဲ ဒ်ပှၤစူၢ်က့ၤနာ်က့ၤတၢ်ဖိတဖၣ်လၢ ကစၢ်ယ့ၣ့်ှှူးအပူၤန့ၣ်လီၤႉ ဒ်လုၢ်လၢ်တမံၤဂ့ၤတမံၤဂ့ၤအသိး‚ ပါရၠာစးမံတဖၣ်အံၤ ပကဘၣ်မၤထွဲအီၤ ဒ်သိးကဒိၣ်ထီၣ် အါထီၣ်လၢပပူၤအဂီၢ်န့ၣ်လီၤႉ
ဘၣ်ဆၣ်ဒီး တၢ်သးခုကစီၣ်အတၢ်ကစီၣ်လၢအဂ့ၤန့ၣ်‚ ဒ်စီၤပီလူးတဲတ့ၢ် ပှၤဖံလံးပံၤဖိတဖၣ်အသိး‚ မ့ၢ်၀ဲ ‘‘ပှၤလၢအမၤ၀ဲ ဖဲဒၣ်အသးဂ့ၤလၢသုပူၤ‚ ဒ်သိးသုသး ကအိၣ်‚ ဒီးဒ်သိးသုကမၤတၢ်န့ၣ် မ့ၢ်ယွၤလီၤ’’ (၂း၁၃) ႉ ပတမၤဒၣ်လၢ ပစိကမီၤအပူၤ နီတဘျီဘၣ်ႉ ယွၤကကတဲာ်ကတီၤန့ၢ် တၢ်လၢပလိၣ်န့ၣ်လီၤ (၄း၁၉) ႉ