ယလံၤခွါလၢအသးအိၣ်လွံၢ်နံၣ် တဲဘၣ်ယမါ ခါရၠာစးံၣ်လၢ ‘ယသ့ၣ်ညါကစၢ်ယွၤအိၣ်ဖဲလဲၣ် န့ၣ်လီၤ’ႉ လၢတၢ်သးဆူၣ်အဲၣ်ဒိးသ့ၣ်ညါတၢ်အပူၤ‚ အ၀ဲသံကွၢ်က့ၤလၢ ‘‘ကစၢ်ယွၤ အိၣ်ဖဲလဲၣ်’’ န့ၣ်လီၤႉ ဖိသၣ်အံၤစံးဆၢက့ၤတၢ်လၢ ‘‘အ၀ဲအိၣ်လၢနဟံၣ်ကပၤပှၢ်ပူၤန့ၣ်လီၤ’’ႉ
ဖဲခါရၠာစးံၣ်တဲပၠးယၤ အ၀ဲသ့ၣ် ကတိၤလိာ်သကိးသး တၢ်အဂ့ၢ်အကျိၤ‚ အ၀ဲကမၢကမၣ်ဘၣ်လၢ လံၤခွါအံၤ အတၢ်ဆိကမိၣ်န့ၣ်လီၤႉ ယစံးဆၢက့ၤအီၤလၢ ‘ယသ့ၣ်ညါလီၤႉ ဖဲပလဲၤဟးသကိးလၢပှၢ်ပူၤ ဖဲအ၀ဲဟဲဟးလၢပအိၣ်ပူၤကွံာ်တဘျီ‚ ယတဲပၠးအီၤလၢ ဖဲလၢပမ့ၢ်တထံၣ် ကစၢ်ယွၤလၢပမဲာ်ချံဘၣ်ဆၣ်‚ ပထံၣ်တၢ်လၢအ၀ဲတ့လီၤပာ်လီၤ၀ဲ တဖၣ်လီၤ’’ ဖဲပလဲၤဟးလၢထံကၢၢ်နံၤ မဲးကျါ‚ ယသံကွၢ်အီၤလၢ ‘‘မ့ၢ်နထံၣ်ယခီၣ်လီၢ်လၢ မဲးခိၣ်လိၤဧါ’’လီၤႉ ယတဲဘၣ်စ့ၢ်ကီးအီၤ လၢ‚ ‘‘ဆၣ်ဖိကီၢ်ဖိတဖၣ်‚ ဒီးသ့ၣ်မုၢ်၀ၣ်ဘိ ဒီးထံကျိထံကွာ်တဖၣ် မ့ၢ်တၢ်ဒ်ကစၢ်ယွၤအခီၣ်လီၢ်တဖၣ်အသိးန့ၣ်လီၤႉ ပသ့ၣ်ညါလၢအ၀ဲအိၣ်ဖဲအံၤ မ့ၢ်လၢပထံၣ်ဘၣ် တၢ်လၢအ၀ဲတ့လီၤ၀ဲတဖၣ် လၢပမဲာ်ချံသ့၀ဲအဃိန့ၣ်လီၤႉ
ပှၤကွဲးထါစံးပ့တၢၤ ၁၀၄ စ့ၢ်ကီး နဲၣ်ဖျါထီၣ်တၢ်ဆူတၢ်အုၣ်သးလၢကစၢ်ယွၤ အတၢ်ဘၣ်တ့တဖၣ်အဂီၢ်‚ ဒီးတဲဖျါထီၣ်လၢ ‘‘နမၤတၢ်ဆံးအါလဲၣ်ယွၤဧၢ‚ နမၤအီၤခဲလၢာ် လၢတၢ်ကူၣ်သ့လီၤႉ ဟီၣ်ခိၣ်ပှဲၤ၀ဲဒီး နတၢ်ဖိတၢ်လံၤလီၤ’’ (း၂၄) ႉ ဧ့ၤ့ဘံၤ အကျိာ် လၢ တၢ်ကူၣ်သ့လၢတၢ်ထံၣ်အီၤဖဲအံၤ‚ တလီၢ်လီၢ်ဘၣ်စူးကါအီၤလၢ လံာ်စီဆှံအပူၤ ဒ်သိးကပာ်ဖျါထီၣ် ပှၤစုသ့တဂၤအတၢ်သ့တၢ်ဘၣ်န့ၣ်လီၤႉ ကစၢ်ယွၤအစုတၢ်မၤလၢ န့ဆၢၣ်လီၣ်ဖျါထီၣ် ကစၢ်ယွၤအိၣ်၀ဲဒီးသးအိၣ်လၢ ပကစံးထီၣ်ပ့တၢၤအီၤန့ၣ်လီၤႉ
ထါစံးထီၣ်ပ့တၢၤ ၁၀၄ စးထီၣ်ဒီးကတၢၢ်ကွံာ်လၢ တၢ်ကတိၤအဖျၢၣ်လၢ ‘‘စံးထီၣ်ပ့တၢၤယွၤတက့ၢ်’’ (း၁‚၃၅) ႉ စးထီၣ်လၢဖိသၣ်အီနုၢ်ထံအစု ဆူလံာ်Bကီ့ကာ် တဘ့ၣ်အမဲာ်ချံ‚ ပတၢ်ဘၣ်တ့ကစၢ် တ့လီၤ၀ဲဒီး တဲဖျါထီၣ်တၢ်လၢအ၀ဲအတၢ်သ့ တၢ် ဘၣ်တဖၣ်လၢ အဖျါထီၣ်လၢတၢ်လၢအတ့လီၤ၀ဲန့ၣ်လီၤႉ မ်ပကကွၢ်တၢ်သ့ၣ်တဖၣ်အံၤ လၢတၢ်လီၤလးအပူၤ‚ လၢတနံၤအံၤဒီး စံးထီၣ်ပ့တၢၤအီၤလၢတၢ်အံၤန့ၣ်တက့ၢ်ႉ