မုၢ်လီၤနုာ်ယံာ်တ့ၢ်မးလံဒီး ပလီမ့ၣ်အူသဟီၣ် သံကွံာ်သတူၢ်ကလာ်န့ၣ်လီၤႉ ယအိၣ် လၢဟံၣ် ဃုာ်ဒီးယဖိဆံးဖိခံဂၤ ဒီးတၢ်အံၤမ့ၢ်တၢ်အဆိကတၢၢ်လၢ အ၀ဲသ့ၣ်အဂီၢ်လၢ မ့ၣ်အူသံကွံာ်၀ဲန့ၣ်လီၤႉ ဖဲလီမ့ၣ်အူသဟီၣ်အခီပနံၣ် သ့ၣ်ညါလၢမ့ၣ်အူသံ‚ ၀ံၤ‚ ယဒွဲၣ်ထီၣ် ပနဲတၢၣ်တဖၣ်ဒီး ယၤဒီးယဖိတဖၣ် ပလဲၤအိၣ်လၢဖၣ်ကပူၤ အမ့ၣ်အူလၢအကပီၤအကပၤန့ၣ်လီၤႉ ဖျါလၢအ၀ဲသ့ၣ် ကနိးကစုာ်ဒီး အိၣ်ဂၢၢ်တန့ၢ်ဘၣ်အဃိ‚ ပစးထီၣ် သး၀ံၣ်သကိးတၢ်လီၤႉ တယံာ်ဘၣ် ဒီးအ၀ဲသ့ၣ်အမဲာ်သၣ်ဖိတဖၣ် နံၤကမှံထီၣ်လီၤႉ တဘျီဘျီ‚ လၢပနံၤသီလၢ အခံးသူကတၢၢ်ကတီၢ်‚ ပလိၣ်ဘၣ်ထါသး၀ံၣ်တယုၢ်လၢပကသး၀ံၣ်ထီၣ်န့ၣ်လီၤႉ
ထါစံးပ့တၢၤ ၁၀၃ ကမ့ၢ်ထါတယုၢ်လၢအမ့ၢ်တၢ်ထုကဖၣ် မ့တမ့ၢ် ထါသး၀ံၣ် ဖဲယွၤအပှၤဂီၢ်မုၢ်တဖၣ် ဟဲက့ၤကဒါက့ၤလၢ တၢ်စိာ်မၢကဲကုၢ်ဆူ အထံကီၢ် ဒၣ်၀ဲလၢ အအိၣ်ကလီတ့ၢ်တဘ့ၣ်န့ၣ်လီၤႉ ဖဲတၢ်အကတီၢ်ကီခဲန့ၣ် အ၀ဲသ့ၣ် လိၣ်ဘၣ် လၢ တၢ်ကသး၀ံၣ်တၢ်န့ၣ်လီၤႉ ဘၣ်ဆၣ်‚ တမ့ၢ်တၢ်သး၀ံၣ် အဂုၤအဂၤဘၣ်ႉ မ့မ့ၢ် အ၀ဲသ့ၣ်လိၣ်ဘၣ် ဒ်သိးကသး၀ံၣ်တၢ်လၢ ယွၤမ့ၢ်မတၤ ဒီးအ၀ဲမၤတၢ်မနုၤန့ၣ်လဲၣ် လီၤႉ ထါစံးထီၣ်ပ့တၢၤ ၁၀၃ မၤစၢၤစ့ၢ်ကီးပှၤလၢ ပကဒုးသ့ၣ်နီၣ်ထီၣ်ပှၤလၢ အ၀ဲ (ယွၤ) အတၢ်သူၣ်အိၣ်ပှၤ‚ သးကညီၤပှၤ‚ အသူၣ်စူၤသးစူၤဒီးပှဲၤဒီး အဘျုးအဖှိၣ် (း၈) န့ၣ်လီၤႉ ဒီးဖဲလၢပမ့ၢ်ကမၢကမၣ်လၢ မ့ၢ်တၢ်စံၣ်ညီၣ်လၢတၢ်ဒဲးဘးလၢ ပမၤဘၣ်တဖၣ်လုၣ်ဘၢကွံာ်ဒၣ်လဲာ် ပနီၢ်ကစၢ်ဘၣ်ဆၣ်‚ ထါအံၤ တဲဘၣ်ပှၤလၢကစၢ်ယွၤ မ့ၢ်ကစၢ်လၢအသးဒိၣ်ထီၣ်ကီ‚ အ၀ဲပျၢ်ပတၢ်ဒဲးဘးဒီး သးကညီၤပှၤန့ၣ်လီၤႉ တၢ်ဒ်သိးအံၤတဖၣ် မ့ၢ်တၢ်ဂ့ၢ်လၢပကဘၣ်သး၀ံၣ်ထီၣ် ဖဲမုၢ်နၤလၢအခံးသူတဖၣ်လၢ ပသးသမူ အတၢ်လဲၤ ခီဖျိအပူၤန့ၣ်လီၤႉ ကမ့ၢ်သ့ၣ်သ့ၣ် နထံၣ်လီၤနသးလၢနအိၣ်ဘၣ်လၢ‚ တၢ်လီၢ်ခံးသူ တတီၤဒီးတၢ်လီၢ်လၢအကီခဲ‚ ကမၢကမၣ်ဘၣ်လၢမ့ၢ်ကစၢ်ယွၤအံၤဂ့ၤ၀ဲ နီၢ်နီၢ်‚ ဒီးသံကွၢ်ဘၣ်တၢ်သံကွၢ်လၢ အဘၣ်ထွဲဒီး အတၢ်အဲၣ်တၢ်ကွံလၢနဖီခိၣ်န့ၣ်ဧါႉ မ့မ့ၢ်ဒ်န့ၣ်ဒီးဃ့ထုကဖၣ် ဒီးသး၀ံၣ်ထီၣ်တၢ်ဆူ ယွၤလၢအလၢအပှဲၤဒီးတၢ်အဲၣ် တၢ်ကွံန့ၣ်တက့ၢ်ႉ