အ၀ဲအမံၤမ့ၢ် ဒံၢ်ညၣ် ဒီးအ၀ဲဆိကမိၣ်လီၤအသးလၢ အမ့ၢ်ကၠိဖိတဂၤလၢဟီၣ်ခိၣ်န့ၣ်လီၤႉ ဖဲအ၀ဲလဲၤခီဂာ်ဘၣ် ၀့ၢ်ခိၣ်၀့ၢ်ဆံးတဖၣ်‚ အ၀ဲတဲထီၣ်၀ဲလၢ‚ ‘‘တၢ်အံၤမ့ၢ်တၢ်မၤလိကၠိဖးဒိၣ် တဖျၢၣ်န့ၣ်လီၤ’’ႉ အ၀ဲစးထီၣ် အတၢ်လဲၤလွံၢ်နံၣ်လၢတၢ်ဒိးလ့ၣ်ယီၢ်ခီၣ် ဖဲ ၂၀၁၆ ဒ်သိး ကထံၣ်လိာ်သးဒီး မၤလိန့ၢ်တၢ်လၢပှၤကူပှၤကညီဆၢ အထံၣ်ဘၣ်၀ဲတဖၣ်အအိၣ်န့ၣ်လီၤႉ တဘျီလၢ်လၢ်‚ ဖဲအ၀ဲဘၣ်ကွၢ်ဆၢၣ်မဲာ်ဒီး တၢ်ကတိၤအကျိာ်တၢ်ဒူၣ်တၢ်ထၢ အ၀ဲထံၣ်ဘၣ်လၢတဘျီဘျီ ပှၤကညီတဖၣ်နၢ်ပၢၢ်တၢ်သ့၀ဲ ခီဖျိတၢ်ကွၢ်လိာ်သးမဲာ်ကဒဲကဒဲန့ၣ်လီၤႉ အ၀ဲသန့ၤထီၣ်သးလၢ တၢ်ကျိးထံတၢ်ကတိၤလၢ အအိၣ်လၢအကွဲၤဒီနၢ် ဒ်သိးကဆဲးကျိးဒီး ပှၤဂုၤပှၤဂၤန့ၣ်လီၤႉ အ၀ဲတထိၣ်ဒွးအတၢ်လဲၤကျဲယံၤ မံးလာ်ထဲလဲၣ် မ့တမ့ၢ် တၢ်လၢအထံၣ်ဘၣ်၀ဲလၢ တၢ်လဲၤကျဲအပူၤန့ၣ်ဘၣ်ႉ လၢတၢ်အံၤအလီၢ် အ၀ဲထိၣ်ဒွးတၢ်အံၤလၢ ပှၤကူပှၤကညီ လၢ အပာ်တ့ၢ်တၢ်စဲပနီၣ်တၢ်လၢ အ၀ဲအသးပူၤ‚ ‘‘ကမ့ၢ်ဒၣ် ယတနၢ်ပၢၢ်သုကျိာ်အဃိ‚ ဘၣ်ဆၣ် ယသးအိၣ်ဃုထံၣ်န့ၢ်လၢ မ့ၢ်သုမ့ၢ်မတၤန့ၣ်လဲၣ်’’လီၤႉ
တၢ်အံၤမ့ၢ်ဟီၣ်ခိၣ်လၢ အဒိၣ်နီၢ်မးဘၣ်ဆၣ်‚ ကစၢ်ယွၤသ့ၣ်ညါတၢ်ကိးမံၤလၢ အအိၣ်လၢ ဟီၣ်ခိၣ်အပူၤဒီး ပှၤကူပှၤကညီလၢအအိၣ်လၢဟီၣ်ခိၣ်အံၤ လၢလၢပှဲၤပှဲၤန့ၣ် လီၤႉ ပှၤကွဲးထါစံးထီၣ်ပ့တၢၤ ကမၢကမၣ်ဘၣ်တၢ်‚ ဖဲအ၀ဲဆိကမိၣ်ထီၣ် ကစၢ်ယွၤအစု တၢ်မၤတဖၣ်လၢ အမ့ၢ်မူခိၣ်‚ လါဒီးဆၣ်တဖၣ် (စံး ၈း၃) န့ၣ်လီၤႉ အ၀ဲကမၢကမၣ်လၢ‚ ‘‘ပှၤကညီလၢနကသ့ၣ်နီၣ်ထီၣ်က့ၤအီၤ ဒီးပှၤကညီဖိလၢနကအိၣ်သကိးအီၤန့ၣ် မ့ၢ်မနုၤလဲၣ်’’ (း၄) ႉ
ကစၢ်ယွၤ သ့ၣ်ညါနၤလီၤတံၢ်လီၤဆဲးန့ၢ်ဒံး ပှၤတဂၤဂၤလၢ အသ့ၣ်ညါနၤဒီး အ၀ဲကဟုကယာ်စ့ၢ်ကီးနၤလီၤႉ ပကဘၣ်မၤဆၢက့ၤတၢ်လၢ ‘‘ယွၤ‚ ပကစၢ်ဧၢ‚ နမံၤလၢဟီၣ်ခိၣ် ဒီဘ့ၣ်ညါန့ၣ် ဂ့ၤဆံးဒိၣ်လဲၣ်’’ (း၁‚၉) ႉ