ဖဲအတံၤသကိးတဖၣ် အလီၢ်အလၤထီၣ်တဂၤဘၣ်တဂၤန့ၣ် ဘဲကၠမ့ လၢအသးပူၤတခီ ကလၢၢ်ဘၣ် တၢ်သးကါတဆံးတက့ၢ်လီၤႉ တံၤသကိးတနီၤစံးဘၣ်အီၤလၢ‚ ‘ဘၣ်မနုၤ လၢ နတကဲထီၣ်ဘၣ်ဒံး မဲန့ၢ်ကၠၢၣ်န့ၣ်လဲၣ်ႉ နကၢကီၣ်ဒီး လီၢ်လၤအ၀ဲန့ၣ်လီၤ’ႉ ဘၣ်ဆၣ်‚ ဘဲ ဆၢတဲာ်လၢ‚ ကအးလီၤအတၢ်မၤလၢ အမၤ၀ဲလၢ ကစၢ်ယွၤအစုပူၤ‚ ဒီး စံးဆၢက့ၤတၢ်လၢ ‘တၢ်အံၤ မ့မ့ၢ်ယွၤ အတၢ်တိာ်လၢယဂီၢ်အဃိ‚ ယကမၤယတၢ်မၤ ဂ့ၤဂ့ၤန့ၣ်လီၤ’ႉ
ဖဲစှၤနံၣ်တနီၤလဲၤပူၤကွံာ်၀ဲအလီၢ်ခံ‚ လၢခံကတၢၢ်ဘဲအလီၢ်အလၤထီၣ်လီၤႉ စးထီၣ်ဖဲန့ၣ်‚ အ၀ဲအတၢ်ကတိၤခီဖျိလၢ အပာ်ဖှိၣ်ထီၣ်သးတဖၣ်‚ ဒုးကဲထီၣ်လိၣ်ထီၣ် အီၤ ဒ်သိးကမၤတၢ်မၤလၢတၢ်နာ်န့ၢ်လီၤသးအလၢအပှဲၤဒီး ဒုးကဲထီၣ်အီၤလၢတၢ် မၤန့ၢ်မၤနၢၤ လၢတၢ်ဒိးဘၣ်တၢ်ပးကဲန့ၣ်လီၤႉ ဖဲအကတီၢ်အ၀ဲန့ၣ်‚ အတံၤသကိးတဖၣ် လၢ အလီၢ်အလၤထီၣ်ဆိလၢ အမဲာ်ညါတဖၣ်‚ ဘၣ်ဂုာ်ကျဲးစၢးလၢ မူဒါတဖၣ်လၢ အလီၤဘၣ်အ၀ဲသ့ၣ်လၢ တၢ်ဘၣ်ပၢဆှၢတၢ်အပူၤန့ၣ်လီၤႉ ဘဲ နာ်လၢ ကစၢ်ယွၤဆှၢအီၤ လၢ ‘ကျဲလၢအယံၤဒီးထီ’ အဃိ‚ အ၀ဲကတဲာ်ကတီၤဘၣ်အသးအါထီၣ်လၢ လီၢ်လၤလၢ ကဒိးန့ၢ်၀ဲအဂီၢ်န့ၣ်လီၤႉ ဖဲကစၢ်ယွၤ ထုးထီၣ်ကွံာ် ပှၤဂီၢ်မုၢ်အံၣ်စရၠာစး့လးလၢအဲၤကူပတူး န့ၣ် (၂မိၤ ၁၃း၁၇-၁၈) ‚ အ၀ဲဃုထၢကျဲလၢအယံၤ ဒီးထီတဘိမ့ၢ်လၢ ‘ကျဲလၢအဖုၣ်’ ဆူကတုၤလၢကနၤဧၣ်အံၤ‚ ပှဲၤဒီးတၢ်လၢအလီၤဘၣ်ယိၣ်ဘၣ်ဘီန့ၣ်လီၤႉ ပှၤလၢအကူၣ်သ့လၢလံာ်စီဆှံတဖၣ် ပာ်သူၣ်ပာ်သးတၢ်လဲၤကျဲလၢအယံၤ‚ ဟ့ၣ်အါထီၣ် တၢ်ဆၢ ကတီၢ်‚ ဒ်သိးကဒုးဆူၣ်ထီၣ်အ၀ဲသ့ၣ်အနီၢ်ခိ‚ သးဒီးနီၢ်သး‚ ဖဲတၢ်ဒုးတၢ်ယၤတဖၣ် မၤသး၀ံၤ အလီၢ်ခံန့ၣ်လီၤႉ
ကျဲလၢအဖုၣ်‚ ထီဘိတမ့ၢ် ကျဲအဂ့ၤကတၢၢ်န့ၣ်ဘၣ်ႉ တဘျီဘျီ‚ ကစၢ်ယွၤ ပျဲလၢပကဟံးန့ၢ်ကျဲလၢ အထီဒီးယံၤလၢပသးသမူအပူၤ‚ ဖဲလၢကမ့ၢ်တၢ်ဖံးတၢ်မၤဂ့ၤ‚ မ့တမ့ၢ် ဒ်ပှၤကျဲးစၢးတၢ်ဖိတဖၣ်အသိးဂ့ၤလၢ ပကကတဲာ်ကတီၤဂ့ၤထီၣ်၀ါထီၣ် တၢ်လၢပတၢ်လဲၤကျဲဆူညါအဂီၢ်န့ၣ်လီၤႉ ဖဲတၢ်အိၣ်သးမ့ၢ်တဟဲဖျါထီၣ် ခ@သဒံး လၢလၢပှဲၤပှဲၤဘၣ်ဆၣ်‚ ပနာ်န့ၢ်တၢ်လၢကစၢ်ယွၤအပူၤသ့ မ့ၢ်လၢအ၀ဲမ့ၢ်ကစၢ်တဂၤလၢ အဆှၢပှၤဒီးနဲၣ်ပှၤန့ၣ်လီၤႉ