၀ီလ်ထၢၣ်ဒံးကစၢၣ် ဒိးန့ၣ်ဘၣ် အခွဲး ၅ သီ လၢ ကလဲၤ၀ဲ ပှၤထီၣ်ပှၢ်သီ အတၢ်ဟးလိာ်ကွဲ တချုးဖဲအဟးထီၣ်လၢ ခိၣ်ရၠာစးံယါတၢ်ဒုးကတီၢ်န့ၣ်လီၤႉ စှၤန့ၢ်ဒံးတနံၣ်‚ အလီၢ်ခံ‚ သုးမုၢ်တဖၣ်ထံၣ်ဘၣ် ဒံးကစၢၣ်အဆ့ကၤလၢ တၢ်ဒုးပျီ‚ လၢလံာ်ပရၠာစးၢတဖၣ်လၢ အဟဲလၢ အမါအအိၣ်လၢ အဆ့ကၤထၢၣ်ပူၤန့ၣ်လီၤႉ ပှၤဘၣ်မူဘၣ်ဒါလၢသုးတဖၣ်‚ ဒုးသ့ၣ်ညါ အမါသးစၢ်အံၤလၢ‚ အ၀ၤဘၣ် တၢ်မၤသံကွံာ်ဖဲတၢ်ဒုးအကတီၢ်န့ၣ်လီၤႉ နီၢ်နီၢ်န့ၣ်ဒံးကစၢၣ်‚ မူဒံး၀ဲဒီး ဘၣ်အိၣ်လၢတၢ်ဒုးတၢ်ယၤအဃိာ်ပူၤ ခံနံၣ်တခီန့ၣ်လီၤႉ ဖဲအဖုသံနီၣ် တကတီၢ်ဂ့ၤတကတီၢ်ဂ့ၤ‚ အ၀ဲကူၣ်ထီၣ်တၢ်ဒ်သိး ကက့ၤကဒါက့ၤဆူ အဟံၣ်န့ၣ်လီၤႉ အ၀ဲဃ့ၢ်ထွးထီၣ်ယဲၢ်ဘျီ ဘၣ်ဆၣ်‚ ဘၣ်တၢ်ဖီၣ်န့ၢ်က့ၤအီၤ ကိးဘျီဒဲးလီၤႉ လၢခံကတၢၢ်‚ အ၀ဲဘၣ်တၢ်ပျဲထူၣ်ဖျဲးအီၤလီၤႉ နတယာ်ကွၢ်‚ တၢ်ဖုးသံပျီၢ်သံ ကဟဲအိၣ်ထီၣ် ဖဲအ၀ဲက့ၤကဒါက့ၤဆူအဟံၣ်‚ သ့၀ဲန့ၣ်လီၤႉ
ယွၤအပှၤဂီၢ်မုၢ်တဖၣ် သ့ၣ်ညါ တၢ်တူၢ်ဘၣ်လၢ အဘၣ်တၢ်ဖီၣ်န့ၢ်အ၀ဲသ့ၣ်‚ စိာ်ကွံာ်ဆူ တၢ်လီၢ်အယံၤ ဒီး ကဆၢမုၢ်လၢ်က့ၤကဒါက့ၤဆူ အတၢ်အိၣ်တၢ်ဆိးအလီၢ် န့ၣ်လီၤႉ ခီဖျိအ၀ဲသ့ၣ်အတၢ်ပူထီၣ် ထီဒါယွၤအဃိ‚ အ၀ဲသ့ၣ် ဘၣ်တၢ်စိာ်မၢကဲကုၢ်အီၤန့ၣ်လီၤႉ ကိးဂီၤအ၀ဲသ့ၣ်ဖုးပၢၢ်ထီၣ်ဒီး ဆၢက့ၤကဒါက့ၤဘၣ်ဆူအအိၣ်ဆိးအထံအကီၢ် ဘၣ်ဆၣ်‚ ကျဲတအိၣ်နီတဘိလၢ အ၀ဲသ့ၣ်ကထူၣ်ဖျဲးထီၣ်န့ၣ်ဘၣ်ႉ မ့ၢ်တၢ်ဘျုးလၢယွၤအၢၣ်လီၤလၢ အတသးပ့ၤနီၣ် အ၀ဲသ့ၣ်နီတစုန့ၣ်လီၤႉ ‘‘ယကဒုးဆူၣ်ထီၣ် ယူဒၤအပှၤဟံၣ်ဖိဒီး ယကအုၣ်က့ၤခီၣ်က့ၤ ယိၤသးအပှၤဟံၣ်ဖိဒီး ယကဟဲစိာ်က့ၤအီၤလီၤႉ အဂ့ၢ်ဒ်အံၤ‚ ယသးအိၣ်အီၤလီၤ’’ (စကၤ ၁၀း၆) ႉ အ၀ဲတုၤအိၣ်တၢ်ဆူ ပှၤဂီၢ်မုၢ် အတၢ်ကက့ၤတုၤဆူဟံၣ်‚ လၢအတမ့ၢ်ဘၣ်အ၀ဲသ့ၣ်အတၢ်သးစွံကတုၤ မ့မ့ၢ်‚ မ့ၢ်လၢအ၀ဲ အတၢ်သးကညီၤ‚ ‘‘ယကညိၣ်က့ၤအီၤႉႉႉ ဒီးဟဲက့ၤကဒါက့ၤလီၤ’’ (း၈-၉) ႉ
ပတၢ်ကလၢၢ်ဘၣ်လၢ ပဘၣ်တၢ်စိာ်ကွံာ် ပှၤဆူတၢ်လီၢ်အယံၤကဟဲ အိၣ်ထီၣ် မ့ၢ်လၢပတၢ်ဃုထၢတဖၣ်လၢ အတဂ့ၤ မ့တမ့ၢ်‚ မ့ၢ်လၢတၢ်ကီတၢ်ခဲတဖၣ် လၢအလဲၤတလၢကွံာ် တၢ်လၢအပၢၤအီၤန့ၢ်၀ဲအဃိန့ၣ်လီၤႉ ကမ့ၢ်ဒၣ်၀ဲဒ်လဲၣ်‚ ကစၢ်ယွၤ တသးပ့ၤနီၣ်ပှၤဘၣ်ႉ အ၀ဲသ့ၣ်ညါပတၢ်ဆၢမိၣ်န့ၢ်တၢ် ဒီးကကိးက့ၤပှၤလီၤႉ ဒီးပမ့ၢ်စံးဆၢအီၤအဃိ‚ ပကထံၣ်လီၤက့ၤပသးလၢ ပဟဲက့ၤကဒါက့ၤဆူအအိၣ် တၢ်ဟဲက့ၤ ကဒါက့ၤ ဆူဟံၣ်န့ၣ်လီၤႉ