ဖဲယသုးလီၢ်သုးကျဲဆူ ထံကီၢ်အသီတဘ့ၣ်အခါ တၢ်လၢယတၢ်လဲၤခီဖျိအါမံၤအကျါ တမံၤန့ၣ် ယကလၢၢ်ဘၣ်လၢ ယတဘၣ်တၢ်တူၢ်လိာ်ယၤဘၣ်န့ၣ်လီၤႉ ဖဲယထံၣ်န့ၢ် တၢ်လီၢ်လၢယကဆ့ၣ်နီၤလၢသရၠာစးိာ်ဆံးဆံးဖိတဖျၢၣ် ဖဲယ၀ၤလဲၤ စံၣ်တဲၤတဲလီၤတၢ်လၢ နံၤအ၀ဲန့ၣ်‚ ပှၤတူၢ်ဒိၣ်ကီၤဒိၣ်သးပှၢ်တဂၤ ကတိၤယၤဆူၣ်ဆူၣ်ကိၤကိၤ ဒီး မၤဖုးသံပျီၤသံယၤ ဖဲအကတိၤထီၣ်ယၤလၢ ‘သုးနသးယံၤယံၤ ဆူတၢ်လီၢ်ခံ’ န့ၣ်လီၤႉ အ၀ဲအမါဃ့ကညးယၤဒီး တဲပၠး၀ဲလၢ တၢ်လီၢ်လၢယဆ့ၣ်နီၤ မ့ၢ်တၢ်လီၢ်လၢအ၀ဲသ့ၣ်ဆ့ၣ်နီၤ၀ဲ ထီဘိန့ၣ်လီၤႉ လၢခံ‚ နံၣ်တဖၣ် ယသ့ၣ်ညါဘၣ်လၢ တၢ်အိၣ်ဖှိၣ် ဒိးလဲကွံာ် လီၢ်ဆ့ၣ်နီၤတဖၣ်‚ ဒ်သိးကဒိးန့ၢ် စ့အတၢ်ဟဲနုာ်လၢ တၢ်အိၣ်ဖှိၣ်အဂီၢ်ဒီး တၢ်လၢအလီၤတံၢ်မ့ၢ်‚ မတၤတဂၤမးဆ့ၣ်နီၤလၢ ပှၤအဂၤတဂၤအလီၢ် တသ့၀ဲဘၣ်အဃိန့ၣ်လီၤႉ ဖျါလၢတၢ်ပာ်သးဒ်သိးအံၤ ဘၣ်တၢ်စိာ်မူစိာ်ဂဲၤအီၤလၢ နံၣ်လၢအဆံတဖၣ်အဆံန့ၣ်လီၤႉ
လၢခံ‚ ယဆိကမိၣ်ထီၣ်က့ၤတၢ်ဂ့ၢ်လၢ ကစၢ်ယွၤမၤလိာ် ပှၤအံၣ်စရၠာစး့လးဖိ တဖၣ် ဒ်သိးကဘၣ်အဲၣ် ပှၤတခီဘီမုၢ်ဖိ တဖၣ်ဒ်လဲၣ်‚ လၢအလီၤဆီဆူ လုၢ်လၢ်ထူသနူ လၢအဘၣ်တၢ်မၤအီၤ ဒ်ယကွၢ်ဆၢၣ်မဲာ်ဘၣ်တ့ၢ်၀ဲအသိးန့ၣ်လီၤႉ လၢတၢ်ပာ်လီၤတၢ်သိၣ်တၢ်သီ ဒ်သိးကပျဲ အပှၤဂီၢ်မုၢ်လၢ ကဖီထီၣ်သၣ်ထီၣ်အဂီၢ်န့ၣ် ကစၢ်ယွၤ ဒုးပလီၢ်အ၀ဲသ့ၣ်လၢ ကအဲၣ်တူၢ်လိာ် ပှၤတခီဘီမုၢ်ဖိတဖၣ် မ့ၢ်လၢ အ၀ဲသ့ၣ် အကစၢ်ဒၣ်၀ဲ‚ တဘျီမ့ၢ်တ့ၢ်၀ဲ ပှၤတခီဘီမုၢ်ဖိတဖၣ်အဃိန့ၣ်လီၤ (၃ မိၤ ၁၉း၃၄) ႉ တမ့ၢ်ထဲလၢ အ၀ဲသ့ၣ် ကဘၣ်သးကညီၤ ပှၤတခီဘီမုၢ်ဖိတဖၣ်ဘၣ် (း၃၃) မ့မ့ၢ်အ၀ဲသ့ၣ် က‘ဘၣ်အဲၣ်အ၀ဲသ့ၣ် ဒ်အအဲၣ်လီၤအသးအသိး’ (း၃၄) လီၤႉကစၢ်ယွၤမၤထူၣ်ဖျဲးထီၣ် အ၀ဲသ့ၣ်လၢ တၢ်ဆီၣ်ဘံၣ်ဆီၣ်ဘၢ တၢ်လၢကီၢ်အဲၤကူပတူးအပူၤ‚ ဟ့ၣ်အ၀ဲသ့ၣ် ဟံၣ်ဃီ လၢထံကီၢ်လၢ ‘အယွၤ၀ဲဒီး တၢ်နုၢ်ထံဒီးကနဲစီ’န့ၣ်လီၤ (၂မိၤ ၃း၁၇) ႉ ကစၢ်ယွၤမုၢ်လၢ်လၢအပှၤဂီၢ်မုၢ် ကအဲၣ်ပှၤဂုၤပှၤဂၤလၢ အဟဲအိၣ်ဆိးလၢ အ၀ဲသ့ၣ် အထံအကီၢ်န့ၣ်လီၤႉ
ဖဲနမ့ၢ်ထံၣ်ဘၣ် ပှၤတခီဘီမုၢ်ဖိလၢအအိၣ်လၢနသိးနကျါ‚ ဃ့ကစၢ်ယွၤ ဒ်သိး ကလီၣ်ဖျါထီၣ်န့ၢ်နၤ လုၢ်လၢ်ထူသနူတမံၤဂ့ၤတမံၤဂ့ၤလၢ ကပၢၤဃာ်နၤလၢ ကနီၤဟ့ၣ်အတၢ်အဲၣ်တၢ်ကွံလၢ အ၀ဲသ့ၣ်န့ၣ်တက့ၢ်ႉ