စၤရၠာစးါ အိၣ်ဒီး တၢ်အိၣ်သးလၢ အထူၣ်အဆၢလၢအတဘၣ်လိာ်ဘၣ်စး‚ ဒုးကဲထီၣ်အီၤဆူ တၢ်လိၣ်ဘၣ်ပၣ်လီၢ်ဆ့ၣ်နီၤကဟၣ် ဒ်သိးကဟးဆူအံၤဆူနုၤန့ၣ်လီၤႉ တယံာ် ဖဲအ၀ဲဟး ထီၣ်လၢ ကလဲၤထီၣ်တၢ်အိၣ်ဖှိၣ်တခါ‚ အ၀ဲဒိးထီၣ် ပၣ်လီၢ်ဆ့ၣ်နီၤ ကဟၣ်ဆူ လ့ၣ်မ့ၣ်အူသန့ ဘၣ်ဆၣ်‚ ထံၣ်ဘၣ်၀ဲလၢ ကဟၣ်စိာ်ထီၣ်စိာ်လီၤတၢ်အံၤ ဟးဂီၤ၀ဲန့ၣ်လီၤႉ လၢကျဲတအိၣ် နီၤတဘိလၢ ကတုၤဆူလ့ၣ်မ့ၣ်အူပူၤ‚ အ၀ဲဘၣ်တၢ်တဲဘၣ်အီၤလၢ ကဒိးထီၣ်သိလ့ၣ်ဒိးလဲ တဆိလၢ ကလဲၤလၢသန့အဂၤတခါလၢ အစီၤစုၤ မံးနံး ၄၀ န့ၣ်လီၤႉ သိလ့ၣ်ဒိးလဲအံၤဘၣ် တၢ်ကိးဘၣ်ဆၣ်‚ တဟဲတုၤနီတဘျီဘၣ်ႉ လၢတၢ်သးဟးဂီၤ အပူၤ‚ စၤရၠာစးါ က့ၤကဒါက့ၤဆူဟံၣ်လီၤႉ
တၢ်အံၤ မ့ၢ်တၢ်လၢ အဟဲအိၣ်ထီၣ်ညီနုၢ်ဆူ စၤရၠာစးါအဂီၢ်န့ၣ်လီၤႉ ကဟၣ် စိာ်ထီၣ် စိာ်လီၤတၢ် ဟးဂီၤအဃိ တတုၤဘၣ်ဆူလ့ၣ်မ့ၣ်အူအပူၤ ဒီးတၢ်ထီၣ်လီၤတစွၤ တအိၣ်အဃိ စံၣ်လီၤ၀ဲလၢ လ့ၣ်မ့ၣ်အူတန့ၢ်န့ၣ်လီၤႉ တဘျီဘျီ‚ စၤရၠာစးါ န့ၣ် ဘၣ်တၢ်ပာ်အီၤ ဒ်ပှၤလၢအမၤအ့န့မၤတံာ်တာ်တၢ်လၢ ပှၤမၤတၢ်ဖိလၢလ့ၣ်မ့ၣ်အူ‚ မ့ၢ်လၢအ၀ဲလိၣ်ဘၣ် တၢ်မၤစၢၤ အဃိန့ၣ်လီၤႉ တလီၢ်လီၢ်‚ အ၀ဲဟီၣ်ဘၣ်အသးန့ၣ်လီၤႉ
လၢလံာ်စီဆှံတၢ်သိၣ်တၢ်သီအါမံၤအပူၤ‚ ပၣ်စ့ၢ်ကီးဒီးတၢ်ပၢဆှၢတၢ်လၢ ပှၤကူ ပှၤကညီ အတၢ်ဘၣ်ထွဲလိာ်သးတဖၣ် ‘အဲၣ်ပှၤလၢနဃၢၤ ဒ်နကစၢ်ဒၣ်နဲအသိး’ ( ၃ မိၤ ၁၉း ၁၈‚ ရၠာစးိမ့ၤ ၁၃း၈-၁၀) အံၤ မ့ၢ် နီၣ်၀ံာ်ခံန့ၣ်လီၤႉ ဒီးဖဲတၢ်အဲၣ်တၢ်ကွံအံၤ‚ ဒုးဆိကတီၢ်ပှၤလၢတၢ်လီတၢ်၀့ၤ‚ တၢ်ဟုၣ်တၢ်ဘျၣ်တၢ်ဒီး တၢ်မၤနၢၤမၤပ့ၤ ပှၤဂုၤပှၤဂၤလီၤ (၃ မိၤ ၁၉း၁၁-၁၄) ႉ တၢ်အံၤမ့ၢ်စ့ၢ်ကီး တၢ်လၢအဆီတလဲကွံာ် ပမၤတၢ်ဒ်လဲၣ်န့ၣ်လီၤႉ ပှၤမၤတၢ်ဖိတဖၣ် ကဘၣ်တၢ်မၢ အ၀ဲသ့ၣ်လၢ ကမၤတၢ်တီတီၢ့်တၢ် (း၁၃) ဒီးကဘၣ်ဟ့ၣ်ညီတၢ်ဆူ ပှၤဖှီၣ်ဖိယာ်ဖိ (း၉-၁၀) လီၤႉ လၢစၤရၠာစးါ အတၢ်ဂ့ၢ်‚ ပှၤလၢအထီထီၣ် ကဟၣ် စိာ်ထီၣ်စိာ်လီၤတၢ်ဒီး ပှၤလၢအဘှီတၢ်လီၢ်လီၤဘံတဖၣ် တမ့ၢ်ပှၤလၢ အမၤတၢ်မၤလၢ အကါတဒိၣ်တဖၣ်‚ မ့မ့ၢ် အ၀ဲသ့ၣ်မ့ၢ်ပှၤတဖၣ်လၢ အဟ့ၣ်ထီၣ်တၢ်မၤလၢ အကါဒိၣ်ဆူ ပှၤဂုၤပှၤဂၤ န့ၣ်လီၤႉ
ပမ့ၢ်ပာ်တၢ်ဖံးတၢ်မၤ ဒ်တၢ်တမံၤလၢကျိၣ်န့ၢ်စ့န့ၢ် မ့တမ့ၢ် နီၢ်တဂၤ အတၢ်န့ၢ်ဘျုး အဃိ‚ တယံာ်ပကမၤဘၣ် ပှၤဂုၤပှၤဂၤ ဒ်ပှၤလၢအမၤတံာ်တာ်တၢ်အသိးန့ၣ်လီၤႉ ဘၣ်ဆၣ်‚ ဖဲလၢပမ့ၢ်ပာ်တၢ်ဖံးတၢ်မၤ ဒ်အမ့ၢ်တၢ်ခွဲးတၢ်ယာ်ဆူ တၢ်အဲၣ်တၢ်ကွံအဃိ ဖဲန့ၣ်တၢ်လၢ ပမၤအီၤလၢကိးနံၤ‚ ကကဲထီၣ်ပနံာ်တၢ်ကၤ ကရၠာစးၢလၢအစီဆှံ၀ဲန့ၣ်လီၤႉ