ဘျုးလီၤသးလၢတၢ်တိာ်ကျဲၤလၢ အတံၤသကိး ထ့မ် န့ၣ် ဖဲအံၤ အဲလ်ဘ့ ကွၢ်ဆၢၣ်မဲာ်ဘၣ် တၢ်တၤတၢ်အဒိၣ်တမံၤလၢအ၀ဲဒီးထ့မ်အိၣ်ဒီး တၢ်ဆိကမိၣ်လၢအလီၤဆီလိာ်သး လၢ တၢ်ကမၤသကိးကဒီးတၢ်ဆူညါဒ်လဲၣ်န့ၣ်လီၤႉ ဖဲအ၀ဲသ့ၣ်တဂၤဒီးတဂၤ ပးကဲ လိာ်သကိးသးလၢ တဂၤအတၢ်ထံၣ်အဖီခိၣ် ဘၣ်ဆၣ်‚ အ၀ဲသ့ၣ် အတၢ်သုးဘူးသး တဖၣ် မ့ၢ်တၢ်လၢအလီၤဆီလိာ်သးလၢ‚ ဖျါလၢတၢ်သဘံၣ်ဘုၣ် ဘူးကမၤအသးန့ၣ် လီၤႉ တချုးလၢတၢ်သဘံၣ်ဘုၣ်ဟဲအိၣ်ထီၣ်‚ ပှၤခံဂၤအံၤ တူၢ်လိာ်တၢ်လၢ ကလဲၤထံၣ်လိာ် သးဒီး အပှၤကဲခိၣ်နၢ်လၢ ကကတိၤသကိး အ၀ဲသ့ၣ်အတၢ်လီၤဆီလိာ်သးတဖၣ် န့ၣ်လီၤ့ ဖဲအံၤအ၀ဲသ့ၣ် ဘၣ်တၢ်နီၤဖးလီၤအီၤလၢ က့ှူၢ်တဂၤတဖုစုာ်စုာ်န့ၣ်လီၤႉ တၢ်အံၤမ့ၢ်တၢ်လၢအကဲထီၣ် တၢ်ကူၣ်သ့တမံၤန့ၣ်လီၤႉ စးထီၣ်လၢနံၤအ၀ဲန့ၣ်‚ အဲလ်ဘ် မၤလိန့ၢ်တၢ်မၤလိလၢ ထီဘိစၢဖှိၣ်ပာ်ဖှိၣ်လိာ်သး အခီပညီန့ၣ် တမ့ၢ် တၢ်ကဘၣ်မၤသကိး တၢ်တပူၤဃီန့ၣ်ဘၣ်လီၤႉ
စီၤအၤ့ဘၤဟၣ် သ့ၣ်ညါနၢ်ပၢၢ်တ့ၢ်လံ တၢ်မ့ၢ်တၢ်တီအံၤ‚ ဖဲအ၀ဲဟ့ၣ်ကူၣ် တၢ်လၢအ၀ဲဒီး စီၤလိာ် ကမၤလီၤဖးလိာ်သးလၢ ဘ့ၤသ့လး (၁ မိၤ ၁၃း၅-၉) န့ၣ်လီၤႉ ဖဲအထံၣ်ဘၣ်လၢ တၢ်လီၢ်တၢ်ကျဲတလၢတလီၢ်လၢ အ၀ဲသ့ၣ် ခံဂၤလိာ် အဆၣ်ဖိကီၢ်ဖိ‚ ဒီး စီၤအၤ့ဘၤဟၣ် ဟ့ၣ်ကူၣ်တၢ်လၢတၢ်ကူၣ်သ့အပူၤ ဒ်သိးကနီၤဖးလီၤဖးလိာ်သး န့ၣ်လီၤႉ ဘၣ်ဆၣ် အဆိကတၢၢ်‚ အ၀ဲပာ်ဖျါထီၣ်၀ဲလၢ‚ အ၀ဲသ့ၣ် ‘မ့ၢ်ဒီပုၢ်၀ဲၢ်’ (း၈) ‚ ဒုးသ့ၣ်နီၣ် စီၤလိာ်လၢ အ၀ဲသ့ၣ်အတၢ်ဘၣ်ထွဲလိာ်သးန့ၣ်လီၤႉ ၀ံၤဒီး တၢ်ဆီၣ်လီၤသးဒိၣ်ဒိၣ် မုၢ်မုၢ်အပူၤ အ၀ဲပျဲအဖိဒိၣ်လၢ ကဃုထၢဆိတၢ်လၢညါ (း၉) ‚ ဖဲလၢအ၀ဲမ့မ့ၢ် ပှၤလၢအသးပှၢ်ဒီး ဒိၣ်န့ၢ်စီၤလိာ်ဒၣ်လဲာ်န့ၣ်လီၤႉ တၢ်အံၤမ့ၢ်တၢ် ဒ် တၢ်အိၣ်ဖှိၣ်သရၠာစးၣ် ပာ်ဖျါ၀ဲအသိး‚ လၢအမ့ၢ်တၢ်လီၤဖးလိာ်သးလၢ အဖိးမံတမံၤန့ၣ်လီၤႉ
လၢအဘၣ်တၢ်မၤအီၤလီၤလီၤဆီဆီလၢကစၢ်ယွၤ‚ ပကထံၣ်လၢ တဘျီဘျီ‚ တၢ်ဖံးတၢ်မၤတၢ်အံၤ‚ ဂ့ၤဒိၣ်လၢ ကနီၤဖးလီၤဖးလိာ်သးလၢ ကတုၤဘၣ်လၢ ဖီတၢၣ် တမံၤဃီန့ၣ်လီၤႉ တၢ်အိၣ်၀ဲတမံၤလၢ တၢ်ဃူတၢ်ဖိးလၢ တၢ်လီၤဖးလိာ်သးအပူၤန့ၣ် လီၤႉ မ်ပသုတသးပ့ၤနီၣ်နီတစုလၢ ပမ့ၢ်ဒံးဒၣ် ဒီပုၢ်၀ဲၢ်မုၢ်ဒီပုၢ်၀ဲၢ်ခွါတဖၣ်လၢ ယွၤအဒူၣ်ဖိထၢဖိတဂ့ၤႉ ပကမၤတၢ်မၤလၢအလီၤဆီလိာ်သးတဖၣ် ဘၣ်ဆၣ်‚ ပအိၣ်ဒံးလၢ တၢ်စၢဖှိၣ်ပာ်ဖှိၣ်လၢ တၢ်တိာ်တၢ်အပူၤန့ၣ်လီၤႉ