ဖဲလါနိၣ်၀့ဘၢၣ် ၂၇ သီ‚ ၁၉၃၉ နံၣ် ပှၤသၢဂၤလၢအဟးဃုတၢ်ထူးတၢ်တီၤလၢ တၢ်ဘျၢလီၤလး‚ ပိာ်ထီၣ်အခံဒီး ပှၤမၤတၢ်ဖိတဖၣ်လၢ ကခူၣ်တၢ်လၢ ဟီလံၣ်၀ူး တၢ်လီၢ် ဖဲတၢ်ဒုးနဲၣ် တၢ်ဂဲၤဒိအလီၢ်အချၢလၢ ကလံၤထံး ခဲလဖိနံယၣ်န့ၣ်လီၤႉ အ၀ဲသ့ၣ် ဟးဃု ကၣ်ဟူကၣ်တၢ်ထူးတၢ်တီၤလၢ အပၣ်ဃုာ်ဒီး ထူ‚ လၢၢ်၀ါဒီး ပလဲတဖၣ်လၢတၢ်ကစီၣ်လၢ အဟူထီၣ်သါလီၤလၢ တၢ်ခူၣ်လီၤဘျၢလီၤတၢ်ဖဲန့ၣ်လၢ အပူၤကွံာ် ၇၅ နံၣ်န့ၣ်လီၤႉ
အ၀ဲသ့ၣ်တထံၣ်န့ၢ်ဘၣ် တၢ်နီၤတမံၤဘၣ်ႉ ဖဲအခူၣ်တၢ်ပှဲၤထီၣ် ၂၄ သီ၀ံၤ‚ အ၀ဲသ့ၣ်ခူၣ်ဘၣ် လၢၢ်ဖးဒိၣ်တဖျၢၣ်ဒီး ဆိကတီၢ်ကွံာ်အတၢ်ခူၣ်လီၤအတၢ်မၤလီၤႉ တၢ်လၢ အမၤ၀ံၤဘၣ်၀ဲန့ၣ် မ့ၢ်ထဲဒၣ် တၢ်ပူၤအလဲၢ်လၢအအိၣ်ထဲဒၣ် ၉ (ပ့ၣ်) တပူၤ‚ အယိာ် ၄၂ (ပ့ၣ်) န့ၣ်လီၤႉ အ၀ဲသ့ၣ်လဲၤသဒၣ်ကွံာ်တၢ်အံၤလီၤႉ
ပှၤကူပှၤကညီန့ၣ် မ့ၢ်ပှၤလၢအမၤကမၣ်တၢ်သ့လီၤ ပ၀ဲကိးဂၤ‚ တဘျီဘျီ ပလီၤတူာ်လီၤကာ်စ့ၢ်ကီးလီၤႉ လံာ်စီဆှံစံးဘၣ်ပှၤလၢ သးစၢ်စီၤမၢ်ကူးဟးသဒၣ်ကွံာ် စီၤပီလူး ဒီး ဘၢ်နါဘၤ လၢတၢ်သးခုကစီၣ် တၢ်လဲၤတခါ ‘ဒီးတလဲၤမၤဘၣ်တၢ်ဒီးအီၤ’ ဘၣ်လီၤႉ မ့ၢ်လၢတၢ်အံၤအဃိ‚ ‘စီၤပီလူးဆိကမိၣ်၀ဲလၢ အတဂ့ၤလဲၤ’ ဃုာ်တၢ်ဒီးအီၤ လၢ တၢ်လဲၤလၢခံအခါ (မၤတၢ် ၁၅း၃၈) ‚ ဒီးတၢ်အစၢဟဲ ထီၣ်လၢ‚ တၢ်ဂ့ၢ်လိာ်ဘှီလိာ် ဆူၣ်ဆူၣ် အိၣ်ထီၣ်ဒီးစီၤဘၢ်နါဘၤန့ၣ်လီၤႉ ဖဲလၢတၢ်လီၤတူာ်လီၤကာ် မ့ၢ်ဟဲအိၣ်ထီၣ်လၢတၢ်အတိခိၣ်ဘၣ်ဆၣ်‚ နံၣ်လၢခံတဖၣ် စီၤမၢ်ကူးပာ်ဖျါထီၣ် တၢ်မၤတၢ်သးခုကစီၣ်အတၢ်မၤလၢ အဒုးကမၢကမၣ်ဘၣ်တၢ်အါမးန့ၣ်လီၤႉ ဖဲစီၤပီလူး ဘၣ်အိၣ် ထဲတဂၤဧိၤလၢဃိာ်ပူၤ ဒီးဆူအတၢ်အိၣ်မူဘူးကကတၢၢ်‚ အ၀ဲဃ့ဒီး ကိးစီၤမၢ်ကူးလၢ အမ့ၢ် ပှၤတဂၤလၢ ‘အခ့အပှၤအတၢ်မၤန့ၣ်အပူၤ‚ အ၀ဲဒၣ် မၤတၢ်လၢယဂီၢ်အဘျုးအိၣ်လီၤ’ (၂
တံၤ ၄း၁၁) ႉ ကစၢ်ယွၤအသးစီဆှံ မၤတၢ်တုၤစီၤမၢ်ကူးကွဲးတၢ်ဆူ လံာ်တၢ်သးခုကစီၣ် လၢအပၣ်ဃုာ်ဒီးအမံၤဒၣ်လဲာ်န့ၣ်လီၤႉ
စီၤမၢ်ကူးအတၢ်အိၣ်မူ ပာ်ဖျါထီၣ်န့ၢ်ပှၤလၢ ကစၢ်ယွၤတပာ်တ့ၢ်ကွံာ်ပှၤလၢ ကကွၢ်ဆၢၣ်မဲာ် ပတၢ်မၤကမၣ်ဘၣ်တၢ်ဒီး လီၤတူာ်လီၤကၣ်ဘၣ်ႉ ဃၣ်ကွံာ်ဘၣ်ပသး ထဲတဂၤဧိၤန့ၣ်ဘၣ်ႉ ပအိၣ်ဒီးတံၤသကိးတဂၤလၢ အဒိၣ်န့ၢ်ဒံး တၢ်ကမၣ်လၢ ပမၤကမၣ်ဘၣ်အီၤန့ၣ်လီၤႉ ဖဲပမ့ၢ်ပိာ် ပပှၤအုၣ်က့ၤခီၣ်က့ၤတၢ်အခံ‚ အ၀ဲကမၤပှဲၤ တၢ်မၤစၢၤဒီး တၢ်ဂံၢ်ဆူၣ်ဘါဆူၣ်လၢ ပလိၣ်ဘၣ်၀ဲန့ၣ်လီၤႉ