ကသံၣ်သရၠာစးၣ်လၢအယါဘျါသး ရၠာစးီဘၢးခိလ်‚ ပာ်သူၣ်ပာ်သးလၢ တၢ်လၢအမၤသး လၢ ပှၤတဂၤလၢအသးလီၤဘှံးနးနးကလဲာ်‚ ဖဲအဟ့ၣ်လီၤအသးလၢ အဂုၤဂၤကတီၢ် န့ၣ်လီၤႉ တၢ်ဒုးပလီၢ်တၢ်ပနီၣ်အဆိကတၢၢ် မ့ၢ်တၢ်လီၤဘှံးလီၤဘှါလီၤႉ လၢခံတဆီ‚ ထံၣ်ပှၤဂုၤပှၤဂၤတဖၣ် ဒ်ပှၤလၢအတဂ့ၤ‚ တၢ်သူၣ်ဒိၣ်သးဟ့‚ တၢ်သးဟးဂီၤ‚ တၢ်သးအုးဖးဒိၣ် ဒီးလၢခံကတၢၢ်‚ တၢ်သးလီၤဘှံး နးနးကလဲာ် န့ၣ်လီၤႉ
ဖဲယကွဲးလံာ်လၢ တၢ်ဂ့ၤထီၣ်က့ၤလၢ တၢ်မံမီၢ်တဂ့ၤတဖၣ်၀ံၤဒီး ယတၢ်ဖံး တၢ်မၤအါက့ၤ၀ဲလၢ ယဘၣ်ကတိၤတၢ်လၢ တၢ်အိၣ်ဖှိၣ်ဖးဒိၣ်တခါအပူၤန့ၣ်လီၤႉ မၤစၢၤ ပှၤကူပှၤကညီတဖၣ် ကထံၣ်န့ၢ်က့ၤတၢ်မုၢ်လၢ် ဖဲတၢ်သးဟးဂီၤ၀ံၤအလီၢ်ခံန့ၣ် မ့ၢ် အဘျုးဒိၣ်၀ဲ‚ ဘၣ်ဆၣ်‚ ယဘၣ်ဟ့ၣ်အဘူးအလဲဖးဒိၣ်လီၤႉ ဘၣ်တနံၤ‚ ဖဲယကထီၣ်ယဲ ဆူ စီၢ်နီၤခိၣ်န့ၣ် ယဆိကမိၣ်ထီၣ်လၢ ယလီၤသံလီၤ၀ါယဲလီၤႉ ယမံယဲတန့ၢ်ဂ့ၤဂ့ၤ‚ အိၣ်ဘှံးကသုၣ် တဘၣ်ဘျိးဘၣ်ဒါဒီး ယတၢ်လီၤဘှံးလီၤတီၤဘၣ်ႉ တၢ်ဆိကမိၣ်လၢ ကနၢ်ဟူဘၣ် ပှၤဂၤအတၢ်ဂ့ၢ်ကီတဖၣ်စ့ၢ်ကီး မၤပှဲၤယသးလၢ တၢ်ပျံၤတၢ်ဖုးဒိၣ်ဒိၣ် ကလဲာ်လီၤႉ ယပိာ်ထွဲယဲ ခိလ်အတၢ်အဒိလၢ အမၤညီနုၢ်အသးလီၤႉ
လံာ်စီဆှံဟ့ၣ်ထီၣ်ကျဲကူၣ်နၢၤခံမံၤလၢ တၢ်ဘၣ်ဒိဘၣ်ထံးလၢတၢ်သးလီၤဘှံး နးနးကလဲာ်လီၤႉ ဖဲယ့ှှါယၤ ၄၀‚ လၢပှၤလၢအသးလီၤဘှံးအံၤ အဂံၢ်အဘါဆူၣ်ထီၣ်က့ၤ ဖဲမုၢ်လၢ်တၢ်လၢယွၤ (း၂၉-၃၀) န့ၣ်လီၤႉ ယလိၣ်ဘၣ်တၢ်အိၣ်ဘှံးလၢယွၤအပူၤ‚ နာ်န့ၢ်အီၤလၢ တၢ်ဆၢမၤတၢ် အါန့ၢ်ဒံး ယကမၤလၢယဂံၢ်ယဘါဒၣ်ယဲန့ၣ်လီၤႉ ဒီးဖဲ စံးထီၣ်ပ့တၢၤ ၁၀၃ စံး ယွၤဒုးမၤပှဲၤကဒါက့ၤပှၤ ခီဖျိ ဒုးမံသူၣ်မံသးပှၤ ဒီး တၢ်ဂ့ၤလၢ ပတၢ် အိၣ်မူအပူၤန့ၣ်လီၤ (း၅) ႉ လၢတၢ်အံၤအပူၤ အိၣ်စ့ၢ်ကီး တၢ်ပျၢ်တၢ်ကမၣ်ဒီးပရၤက့ၤတၢ် (း၃-၄) ‚ မၤပှဲၤတၢ်သးခုဒီး တၢ်မၤစၢၤန့ၣ် ဟဲစ့ၢ်ကီးလၢ အ၀ဲအအိၣ်န့ၣ်လီၤႉ ဖဲယမၤက့ၤယဆၢကတီၢ်လၢ တၢ်ဖံးတၢ်မၤ‚ ဃုာ်ဒီး တၢ်ထုကဖၣ်အါထီၣ်တၢ်‚ အိၣ်ဘှံးအိၣ်သါဒီး ယမၤယတၢ်သးစဲလၢ တၢ်ဒိတၢ်ဂီၤဒီး ယအိၣ်ဆူၣ်ထီၣ်က့ၤကဒီး န့ၣ်လီၤႉ
တၢ်သးလီၤဘှံးနးနးကလဲာ် စးထီၣ်လၢ တၢ်သးလီၤဘှါန့ၣ်လီၤႉ မ်ပကပာ် ကတီၢ်သကိးတၢ်အံၤ ဒ်သိး ကလဲၤသးဆူညါန့ၣ်တက့ၢ်ႉ ပမၤတၢ်လၢ ပှၤဂုၤပှၤဂၤ အဂီၢ် အဂ့ၤကတၢၢ်‚ ဖဲလၢပတၢ်အိၣ်မူ မ့ၢ်ပၣ်ဃုာ်ဒီး တၢ်ဘူၣ်ထီၣ်ဘါထီၣ်ယွၤဒီး တၢ်အိၣ်ဘှံးအိၣ်သါန့ၣ်လီၤႉ