တံတံၢ်စဲးကံၢ်န့ၣ် မ့ၢ်ပှၤလၢအနၢမုာ်ဒီး စကီလၣ်ခဲနဲးဘ့လံၣ် အါန့ၢ်ဒံး တံၤသကိးတဂၤ‚ အ၀ဲမ့ၢ် ပှၤဆှၢတၢ်တွၤတၢ်တဂၤလၢ စကီလၣ်ခဲနဲး နာ်န့ၢ်အီၤလၢ အတၢ်လဲၤ ဟးကသုၣ်လၢ ဆၣ်ဟၣ်ရၠာစးး မဲးမုၢ်ခိၣ်ဒီး က့ှူၢ်ဖိတဖၣ်န့ၣ်လီၤႉ ခီဖျိ တၢ်ပိာ်ထီၣ် တံတံၢ် စဲးကံၢ်အခံန့ၣ် ဘ့လံၣ် စံးလၢအ၀ဲဒီးအက့ှူၢ်ဖိတဖၣ်‚ ပာ်ဖျါထီၣ် တၢ်နာ်န့ၢ်ဘၣ် ဖါတံၢ် အံၤ လၢလၢပှဲၤပှဲၤန့ၣ်လီၤႉ တၢ်အကံၢ်အစီလၢ အဟဲအိၣ်ထီၣ်တခီ အ၀ဲသ့ၣ် ပာ်ဂၢၢ် ပာ်ကျၢၤတၢ်အံၤန့ၣ်လီၤႉ ‘‘ပတသ့ၣ်ညါ ကျဲလၢပကဘၣ်လဲၤ၀ဲဒီး ပမ့ၢ်ဟးကမၣ်ကျဲ အဃိ‚ ပသံကွံာ်သ့ကိးဂၤဒဲးလီၤႉ လၢတၢ်အံၤအဃိ‚ ပပာ်ထီၣ်ပတၢ်နာ်န့ၢ် နတၢ်ကဲခိၣ်ကဲနၢ်လၢာ်လၢာ်ဆ့ဆ့လီၤ’’ႉ
လၢတၢ်အကတီၢ်တတီၤလၢ တၢ်သူၣ်လီၤဘှံးသးလီၤဘှံးဖးဒိၣ်န့ၣ် စီၤဒၤ၀ံး လဲၤတလၢကွံာ်၀ဲ ပှၤကူပှၤကညီအတၢ်ဆှၢတၢ်တွၤဒီး ဃုထံၣ်တၢ်နဲၣ်ကျဲလၢ အဟဲလၢကစၢ်ယွၤလၢအ၀ဲမၤ၀ဲအတၢ်မၤန့ၣ်လီၤႉ ဖဲထါစံးထီၣ်ပ့တၢၤ ၆၁း၂ အပူၤ ပဖးဘၣ်လၢ ‘တုၤယသးဘၣ်တၢ်လုၣ်ဘၢအီၤဒီး‚ ယကိးထီၣ်နၤလၢ ဟီၣ်ခိၣ်အကတၢၢ်ပူၤန့ၣ်လီၤႉ ဆှၢယၤဆူလၢၢ်လၢ အထီန့ၢ်ယၤအအိၣ်န့ၣ်တက့ၢ်’ႉ အ၀ဲဆၢမုၢ်လၢ် တၢ်ဘံၣ်တၢ်ဘၢဒီး တၢ်မၤမုာ်ထီၣ် တၢ်လၢကစၢ်ယွၤအတၢ်အိၣ်ဒီးအီၤဒီး အတၢ်ဆှၢတၢ်တွၤအီၤ သီသံၣ် ဘှဲတဖၣ်န့ၣ်လီၤ (း၃-၄) ႉ
ကစၢ်ယွၤအတၢ်ဆှၢတၢ်တွၤလၢ သးသမူအပူၤအံၤ မ့ၢ်တၢ်လၢအလိၣ်၀ဲ နီၢ်နီၢ်လၢ ပှၤကညီတဖၣ်‚ ဒ်အဘၣ်တၢ်ပာ်ဖျါထီၣ်လၢ လံာ်စီဆှံအပူၤ‚ ဒ်အမ့ၢ်သိတဖၣ် လၢ ‘ဟးဖျိးကျဲ’ (ယ့ှှါ ၅၃း၆) အသိးန့ၣ်လီၤႉ မ့မ့ၢ်လၢ ပဂံၢ်ပဘါဒၣ်ပ၀ဲန့ၣ် ပကကဲထီၣ်ပှၤလၢအတၢ်မုၢ်လၢ်လၢာ်ကွံာ်ဒီး လီၤမၢ်ကွံာ်လၢ ဟီၣ်ခိၣ်တဘ့ၣ် အမဲးမုၢ်ခိၣ်အပူၤ န့ၣ်လီၤႉ
ဘၣ်ဆၣ်‚ ပတဘၣ်တၢ်ပာ်တ့ၢ်ပှၤထဲတဂၤဧိၤလၢ ပကမူလၢပဂံၢ်ပဘါဒၣ်ပ၀ဲ ဘၣ်ႉ ပအိၣ်ဒီးပှၤကွၢ်သိတဂၤလၢ အဆှၢပှၤဆူ ‘ထံဂၢၢ်နံၤ’ မၤခုမၤဖှံထီၣ် ပသူၣ်ပသးဒီး နဲၣ်ပှၤန့ၣ်လီၤ (စံး ၂၃း၂-၃) ႉ
တနံၤအံၤ‚ မ့ၢ်နလိၣ်ဘၣ် အ၀ဲအတၢ်ဆှၢနၤလၢတၢ်လီၢ်မနုၤန့ၣ်လဲၣ်ႉ ကိးထီၣ်အီၤတက့ၢ်ႉ အ၀ဲတပာ်တ့ၢ်နၤ နီတစုဘၣ်ႉ