ဖဲတၢ်ကိၢ်ခါကတီၢ်တဘျီ‚ ယကွၢ်ဆၢၣ်မဲာ်ဘၣ်ယဲ တၢ်မၤတခါလၢ အကဲထီၣ်၀ဲတသ့‚ လၢအမ့ၢ် တၢ်ကွဲးလီၤတၢ်တိာ်ကျဲၤဖးဒိၣ်တမံၤဃုာ်ဒီး တၢ်ဆၢကတီၢ်လၢ ကဘၣ်မၤ ၀ံၤအီၤန့ၣ် အဆၢကတီၢ်ဘူးဒိၣ်မးန့ၣ်လီၤႉ ယကစၢ်ဒၣ်ယဲ ယဂုာ်ကျဲးစၢးလၢ ကဒိးန့ၢ် လံာ်မဲာ်ဖျၢၣ်လၢ ယကကွဲးလီၤအဂီၢ် တနံၤဘၣ်တနံၤ ယစူးကါတၢ်ဆၢကတီၢ်အါမး ဒီး ယကလၢၢ်ဘၣ် ယသူၣ်လီၤဘှံးသးလီၤတီၤဒီး သးဟးဂီၤဒီး ယသးအိၣ်လၢယအဲၣ်ဒိး မၤကတၢၢ်ကွံာ်ဒၣ်လဲာ်တၢ်အံၤန့ၣ်လီၤႉ ယတံၤသကိး ပှၤကူၣ်ဘၣ်ကူၣ်သ့တဂၤ သံကွၢ် ယၤလၢ‚ ‘မ့ၢ်နကလၢၢ်ဘၣ် နအိၣ်ပှဲၤဂံၢ်ပှဲၤဘါလၢခံကတၢၢ်တဘျီန့ၣ် ဆံးယံာ်လဲၣ်ႉ ကမ့ၢ်နလိၣ်ဘၣ် တၢ်ကပျဲအိၣ်ဘှံးအိၣ်သါ နနီၢ်ကစၢ်ဒီး အီၣ်တၢ်ဘဲဘဲ’’ န့ၣ်လီၤႉ
တဘျီဃီ ယသ့ၣ်ညါလၢ အ၀ဲတဲတၢ်အံၤ မ့ၢ်တၢ်လၢ အဘၣ်၀ဲလီၤႉ အ၀ဲ အတၢ်ဟ့ၣ်ကူၣ် ဒုးသ့ၣ်နီၣ်ထီၣ်က့ၤယၤလၢ ၀ံအ့ၤလံယၤ ဒီးတၢ်ကစီၣ်လၢ အလီၤပျံၤလၢ အ၀ဲဒိးန့ၢ်၀ဲလၢ နီၢ်အံၤစ့ဘ့ၤလးလီၤ (၁ စီၤ ၁၉း၂) ႉ ဖဲလၢယတၢ်ကွဲးထီၣ်တၢ်တိာ်ကျဲၤ အံၤ တနးထဲသိး ၀ံအံၤ အတၢ်လဲၤခီဖျိဘၣ်န့ၣ်လီၤႉ ဖဲ၀ံၤအ့ၤလံယၤ မၤနၢၤ ၀ံအဘျၣ် တဖၣ်လၢ ကစၢၢ်ကၢ်မ့ၤလးန့ၣ် နီၢ်အံၤစ့ဘ့ၤလး ဆှၢလီၤတၢ်ကလုၢ်လၢကဖီၣ်အီၤဒီး မၤသံအီၤ‚ ဒီးဖဲအံၤအ၀ဲစးထီၣ်သးဟးဂီၤဒီး ဆၢမုၢ်လၢ်လၢ တၢ်သံတၢ်ပှၢ်န့ၣ်လီၤႉလၢခံ‚ အ၀ဲမံလၢမံ၀ံၤဒီး အီၣ်တၢ်အီၣ်လၢ ကလူးတဂၤ ဟဲစိာ်န့ၢ်အီၤ‚ ဖဲအတၢ်ဟဲအိၣ် သကိးအီၤ ခံဘျီန့ၣ်လီၤႉ ဖဲကစၢ်ယွၤမၤသီထီၣ်က့ၤ အဂံၢ်အဘါလၢ နီၢ်ခိ၀ံၤ‚ အ၀ဲ စးထီၣ်ကဒီးက့ၤ အတၢ်လဲၤန့ၣ်သ့၀ဲလီၤႉ
ဖဲ ‘ကျဲဧိၤကပူၤဧိၤ ယံၤကဲၣ်ဆိး’ (း၇) လၢပဂီၢ်‚ အလီၢ်အိၣ်လၢ ပကဘၣ် ဟံးန့ၢ် တၢ်အိၣ်ဘှံးအိၣ်သါဒီး အီၣ်တၢ်အီတၢ်လၢ တၢ်ကန့ၢ်ဂံၢ်န့ၢ်ဘါအဂီၢ်လီၤႉ မ့ၢ်လၢ ပမ့ၢ် လီၤဘှံးလီၤတီၤ မ့တမ့ၢ် သူၣ်၀ံၤသးစ့ၤဒီး ညီဒိၣ်မးလၢ ပကခီၣ့်ှှူပသး‚ မ့ၢ်လၢ ပသးဟးဂီၤဒီး ပျံၤတၢ်ဖုးတၢ်န့ၣ်လီၤႉ ဘၣ်ဆၣ်‚ ဖဲကစၢ်ယွၤမၤပှဲၤ ပနီၢ်ခိအတၢ်လိၣ် ခီဖျိယွၤအတၢ်ဂံၢ်ထံးတဖၣ်၀ံၤ‚ တၢ်လၢအကဲထီၣ်အသးတသ့၀ဲလၢ ပဟီၣ်ခိၣ်လၢ အတလၢတပှဲၤအံၤ ဟ့ၣ်ထီၣ်ဒၣ်လဲာ်‚ ပခါထီၣ်ခီၣ်ကါလၢခံတကါသ့၀ဲ ဒ်သိးပကမၤ အ၀ဲအတၢ်မၤန့ၣ်လီၤႉ