ဖဲ ၁၉၆၈ နံၣ်‚ လါအ့ြဖ့ၣ် ၃ သီ အမုၢ်နံၤ‚ ဒီးကထၢၣ်မၣ်တ့ၣ်လူသၢၣ်ခ့ ကတိၤလီၤ တၢ်လၢခံ ကတၢၢ်‚ လၢအစံး၀ဲ‚ ‘‘ယအိၣ်ဘၣ်လၢ ကစၢၢ်ဒီခိၣ်’’ န့ၣ်လီၤႉ လၢတၢ်အံၤအပူၤ‚ ဖျါလၢ အ၀ဲနာ်လၢကမ့ၢ် တမူဘၣ်ယံာ်ယံာ်လၢၤဘၣ်န့ၣ်လီၤႉ အ၀ဲစံးလၢ ‘‘ပအိၣ်ဒီးနံၤသီလၢ အကီခဲတဖၣ်လၢပမဲာ်ညါလီၤႉ ဘၣ်ဆၣ်‚ တၢ်အံၤ တမ့ၢ်တၢ်လၢအမၤတံာ်တာ်ယၤ‚ လၢအခဲအံၤ အကတီၢ်န့ၣ်လၢၤဘၣ်ႉ မ့ၢ်လၢယအိၣ်ဘၣ်ယဲလၢ တၢ်စိခိၣ် (ကစၢၢ်ဒီခိၣ်) အဃိန့ၣ်လီၤႉ ဒီးယကွၢ်လီၤတၢ်လီၤႉ ဒီးယထံၣ်ဘၣ်ယဲ ကီၢ်တၢ်စံးပာ်လီၤႉ တမ့ၢ်ယကလဲၤတုၤဘၣ်ဒီးသု ႉႉႉ (ဘၣ်ဆၣ်) တနၤအံၤ ယသးခုယဲဒိၣ်မးလီၤႉ ယတသူၣ်ကိၢ်သးဂီၤ လၢတၢ်ဂ့ၢ်တမံၤဂ့ၤတမံၤဂ့ၤလၢၤဘၣ်ႉ ယတပျံၤ ပှၤနီတဂၤဘၣ်ႉ ယမဲာ်ချံထံၣ်ဘၣ် ယကစၢ်အလၤကပီၤ လၢအဟဲဖျါထီၣ်န့ၣ်လီၤ’’ႉ လၢခံတနံၤ‚ အ၀ဲဘၣ်တၢ်ကူၣ်မၤသံအီၤလီၤႉ
တချုးလၢအသံ‚ စီၤပီလူး ကွဲးလံာ်ဆူ စီၤတံၤမသ့းအအိၣ် ‘‘ခဲကနံၣ်အံၤဒၣ်လဲာ်‚ တၢ်လူလီၤဂၢ်လီၤယၤ‚ ဒီးယက့ၤတၢ်အဆၢကတီၢ်ဘၣ်လံႉႉႉ တုၤအံၤဆူညါ‚ တၢ်တီတၢ်လိၤ အခိၣ်သလုးလၢကစၢ် ပှၤစံၣ်ညီၣ်ကွီၢ်အတီအလိၤ တဂၤ‚ ကဟ့ၣ်လီၤယၤ လၢမုၢ်နံၤန့ၣ်‚ အိၣ်ပာ်လီၤအသးလၢယဂီၢ်ႉႉႉ’’ (၂ တံၤ ၄း၆‚၈) လီၤႉ စီၤပီလူးသ့ၣ်ညါ အတၢ်ဆၢကတီၢ်လၢဟီၣ်ခိၣ်အံၤ ဘူးထီၣ်လၢကကတၢၢ် ဒ် ဒီးကထၢၣ်ခ့ အသိးန့ၣ်လီၤႉ ပှၤခံဂၤလိာ်အံၤ သ့ၣ်ညါသးသမူ မ့ၢ်တၢ်လၢအကါဒိၣ်၀ဲ‚ တဘျီဃီ တလီၤတူာ်လီၤကၣ်နီတစုလၢတၢ်မူနီၢ်နီၢ်လၢအအိၣ်ခိးပာ်စၢၤအ၀ဲသ့ၣ်န့ၣ်ဘၣ်ႉ ပှၤခံဂၤလိာ်အံၤ‚ တူၢ်လိာ်တၢ်ကမၤအသးလၢကဟဲလၢခံတမံၤန့ၣ်လီၤႉ
ဒ်ပ၀ဲသ့ၣ်အသိး မ့ၢ် ‘‘ပတကွၢ်ဘၣ်တၢ်လၢအအိၣ်ဖျါဘၣ်‚ မ့ၢ်တၢ်လၢ အတအိၣ်ဖျါဘၣ်လီၤႉ အဂ့ၢ်ဒ်အံၤ‚ တၢ်လၢအအိၣ်ဖျါန့ၣ် အိၣ်တစိၢ်ဖိဧိၤလီၤႉ မ့မ့ၢ် တၢ်လၢ အတအိၣ်ဖျါဘၣ်န့ၣ် အိၣ်၀ဲလီၤထူလီၤယိာ်လီၤ’’ (၂ ကရၠာစးံၣ် ၄း၈) ဘၣ်ဧါႉ