လၢနံၣ်လၢအပူၤကွံာ်‚ ယမါဒိးန့ၢ်စ့အဘျဲၣ်လၢဘၣ်တၢ်ဟ့ၣ်ကဒါက့ၤအီၤ‚ လၢအပရၤတ့ၢ် တၢ်တမံၤမံၤန့ၣ်လီၤႉ တၢ်အံၤ‚ တမ့ၢ်တၢ်လၢအ၀ဲမုၢ်လၢ်၀ဲန့ၣ်ဘၣ်ႉ ဒီးတၢ်အံၤ ဘၣ်တၢ်ဆှၢလီၤ ခီဖျိလံာ်ပရၠာစးၢတၢးန့ၣ်လီၤႉ လၢတၢ်တကတီၤဃီအပူၤ‚ တံၤသကိး လၢအဂ့ၤတဂၤနီၤဟ့ၣ်အီၤ လၢတၢ်ဂ့ၢ်လၢအဘၣ်ထွဲဒီး ပိာ်မုၣ်ပိာ်မၢၤအဂုၤအဂၤ လၢ အအိၣ်လၢ ထံဂုၤကီၢ်ဂၤ လၢအလိၣ်ဘၣ် တၢ်မၤစၢၤ လၢအသးအိၣ်မၤဂုၤထီၣ်ပသီထီၣ် သးလၢ တၢ်ကူၣ်သ့ဒီးပနံာ်တၢ်ကၤတကပၤန့ၣ်လီၤႉ တလီၢ်လီၢ်‚ ဒ်တၢ်ဂ့ၢ်အံၤအသိး အ၀ဲသ့ၣ် အတၢ်ဒူၣ်တၢ်ဆၢအံၤ မ့ၢ်ကျိၣ်စ့တၢ်ဂ့ၢ်ကီလီၤႉ
ယမါဟံးထီၣ်စ့လၢအဘၣ်တၢ်ဆှၢကဒါက့ၤအံၤ ဒီးဒုးကဲထီၣ်အီၤဆူ တၢ်ဒုးလိၢ်လီၤစ့ဆူ ပှၤတဖုလၢ အမၤစၢၤပိာ်မုၣ်ဒ်သိးအံၤတဖၣ် အအိၣ်လီၤႉ ဖဲစ့လၢ အဘၣ်တၢ်ဒုးလိၢ်ဟဲက့ၤကဒါက့ၤ အ၀ဲဒုးလိၢ်ကဒီး၀ဲတဘျီ၀ံၤတဘျီ ဒီးလၢစ့လၢ အဟဲအါထီၣ်‚ အ၀ဲဘျၢလီၤဘၣ်စ့ဆူ တၢ်ဒုးလိၢ်လၢ စ့အဖုခံဆံနွံဖုန့ၣ်လီၤႉ ယမါ သးခုဘၣ် လၢတၢ်အါမံၤအဖီခိၣ်‚ ဘၣ်ဆၣ် တၢ်သးခုလၢ တၢ်မၤအံၤဟ့ၣ်ထီၣ် ဒုးနံၤကမှံဘၣ်အီၤ ဖဲအဒိးန့ၢ် တၢ်ကစီၣ်လၢ‚ စ့အံၤ မၤဘၣ်တၢ်လၢ ပိာ်မုၣ်ပိာ်မၢၤအါဂၤ အတၢ်အိၣ်မူအပူၤ‚ လၢအ၀ဲတသ့ၣ်ညါဒီး ထံၣ်လိာ်ဘၣ်သးနီတစု တဖၣ်န့ၣ်လီၤႉ
တလီၢ်လီၢ်‚ ပနၢ်ဟူဘၣ်တၢ်ဟ့ၣ်တၢ်အတယၢၤဆူ လံာ်စီဆှံအဆၢဖိ လၢအမ့ၢ် ‘‘အဂ့ၢ်ဒ်အံၤ‚ ယွၤဘၣ်အသးလၢပှၤလၢအဟ့ၣ်ညီတၢ်’’ (၂ ကရၠာစးံၣ် ၉း၈) ဒီး မ့ၢ်စ့ၢ်ကီး တၢ်လၢအမ့ၢ်၀ဲတီ၀ဲန့ၣ်လီၤႉ ဘၣ်ဆၣ်‚ တၢ်ဟ့ၣ်လၢ ပဟ့ၣ်အီၤအံၤ ကဘၣ် မ့ၢ် တၢ်အကံၢ်အစီလၢအလီၤတံၢ်လီၤဆဲးတမံၤ‚ လၢတမ့ၢ်တၢ်ကဘၣ်ဟ့ၣ်အီၤ‚မၤအီၤ လၢ ‘တၢ်သးအုးဒီး တၢ်မၤဆူၣ်’ လၢ‘တၢ်ပံာ်တၢ်ကီ’ (း၆-၇) န့ၣ်ဘၣ်ႉ လၢကျဲအဂၤ တဘိ‚ ပကဘၣ်ဟ့ၣ်တၢ်လၢ ‘တၢ်သူၣ်ညီသးညီ’န့ၣ်လီၤႉ ဒီးဖဲလၢပ၀ဲတဂၤစုာ်စုာ် မ့ၢ်ဟ့ၣ်တၢ်လၢကျဲလၢအလီၤဆီတဆံးတက့ၢ်‚ ပမဲာ်တဖၣ်ဖျါထီၣ် ဒ်တၢ်အုၣ်သးလၢ ပအိၣ်ဒီးသးလၢ အဟ့ၣ်ညီတၢ်အသိးန့ၣ်လီၤႉ