မ့ရၠာစး့ၣ် မ့ၢ်အဲၣ်ကစၢ်ယ့ၣ့်ှှူးဘၣ်ဆၣ်‚ အသးသမူအတၢ်လဲၤခီဖျိန့ၣ် မ့ၢ်တၢ်လၢအနး‚ နး၀ဲနီၢ်နီၢ်လီၤႉ အဖိခွါခံဂၤ သံသဒၣ်ကွံာ်အီၤ‚ ဒီးအလံၤခွါခံဂၤသံလၢ ဘၣ်တၢ်ခးသံ ကွံာ်အ၀ဲသ့ၣ်လီၤႉ ဒီး မ့ရၠာစး့ၣ်အနီၢ်ကစၢ်ဒၣ်၀ဲ ဘၣ်တူၢ်ကလံၤကျီတၢ်ဆါလၢ အဘၣ်ဒိ အစုတခီခီၣ်တခီလၢဟူး၀း၀ဲတသ့န့ၣ်လီၤႉ ဘၣ်ဆၣ်‚ ဖဲအ၀ဲဘျါထီၣ်၀ဲဒီး လဲၤဆူ တၢ်ဘါသရၠာစးိာ်‚ ဒီးစံးဘျုးစံးထီၣ်ပ့တၢၤ ကစၢ်ယွၤလၢ ‘‘ယအဲၣ်ဘၣ်နၤလီၤ ယွၤဧၢႉ မ်နမံၤ ဘၣ်တၢ်စံးထီၣ်ပ့တၢၤတက့ၢ်’’ န့ၣ်လီၤႉ
တချုးလၢ မ့ရၠာစး့ၣ်ပာ်ဖျါထီၣ် အတၢ်စံးထီၣ်ပ့တၢၤဆူကစၢ်ယွၤအအိၣ်‚ လၢနံၣ်လၢအကထိတဖၣ် အကထိ‚ စီၤဒၤ၀ံးကွဲးထါစံးထီၣ်ပ့တၢၤ ၆၃ န့ၣ်လီၤႉ ထါအခိၣ်တီပာ်ဖျါထီၣ် ပှၤကွဲးထါအံၤ မ့ၢ်စီၤဒၤ၀ံး ဖဲအအိၣ်လၢယူၤဒၤပှၢ်မုၢ်ကနၢ န့ၣ်လီၤႉ ဖဲလၢ အ၀ဲမ့ၢ်အိၣ်ဘၣ်လၢ တၢ်လီၢ်လၢအစှၤန့ၢ်ဒံး တၢ်ဆၢအိၣ်၀ဲအလီၢ်‚ တုၤဒၣ်လဲာ်လၢ တၢ်မုၢ်လၢ်တအိၣ်ဒၣ်လဲာ်‚ အ၀ဲအသးတဟးဂီၤဘၣ်ႉ မ့ၢ်လၢအတၢ် မုၢ်လၢ် အိၣ်လၢ ယွၤအပူၤအဃိန့ၣ်လီၤႉ ယွၤဧၢ‚ နမ့ၢ်ယကစၢ်လီၤႉ ယဃုနၤဂီၤဂီၤ‚ ယသးအံၤသူအသးလၢနၤ‚ ဖဲထံတအိၣ်ဘၣ်’’ (း၁)
ဘၣ်သ့ၣ်သ့ၣ်‚ နကထံၣ်လီၤက့ၤနသးလၢ နအိၣ်ဘၣ်လၢ တၢ်လီၢ်လၢအကီခဲ လၢ အတအိၣ်ဒီး တၢ်နဲၣ်ကျဲလၢအဆှံ မ့တမ့ၢ် တၢ်ဂံၢ်ထံးတဖၣ် တလၢတပှဲၤ၀ဲန့ၣ်လီၤႉ တၢ်အိၣ်သးလၢအတမုာ်တခုၣ် မၤသဘံၣ်ဘုၣ်ပှၤသ့လီၤႉ ဘၣ်ဆၣ် အလီၢ်တအိၣ်လၢ ကမၤလီၤတလံာ်ပှၤ‚ ဖဲပစဲဘူးဆူ ပှၤတဂၤလၢအအဲၣ်ပှၤ (း၃) ‚ မၤမံသူၣ်မံသးပှၤ (း၅) ‚ မၤစၢၤပှၤ (း၇) ဒီး လၢပှၤလၢအစိာ်ထီၣ်ပှၤလၢအစုထွဲ (း၈) န့ၣ်ဘၣ်ႉ မ့ၢ်လၢ ယွၤအဘျုးအဖှိၣ်အံၤ ဂ့ၤဒိၣ်န့ၢ်တၢ်မူအဃိ‚ ဒ် မ့ရၠာစး့ၣ် ဒီး စီၤဒၤ၀ံးအသိး‚ ပပာ်ဖျါထီၣ် ပတၢ်သူၣ်မံ သးမံသ့၀ဲလၢ ပထးခိၣ်လၢအစံးထီၣ်ပ့တၢၤတၢ်ဒီး မၤလၤကပီၤယွၤ (း၃-၅) န့ၣ်လီၤႉ