‘‘အကတီၢ်ခဲအံၤ‚ တ့ကၢးနအိၣ်ဖဲအံၤဘၣ်ႉ ပှၤဟးလူၤဃုနၤလီၤ’’ အံၤ မ့ၢ်တၢ်ကတိၤလၢ အဘၣ်တၢ်စံးကတိၤအီၤလၢ ပှၤ၀ီသိလ့ၣ်လၢ အတွံၢ်ယမိၢ်အသိလ့ၣ်‚ ဖဲအထုးထီၣ် အ၀ဲအသိလ့ၣ်လၢ အဘၣ်ဟးဂီၤကွံာ်လၢ ကစၢၢ်ကပၤန့ၣ်လီၤႉ အကတီၢ်ဖဲန့ၣ်‚ ယမိၢ်အိၣ်ဒီးအဟုးအသး လၢအမ့ၢ်ယၤလီၤႉ ဖဲယဒိၣ်ထီၣ်‚ ယမိၢ်စံးက့ၤယၤ တၢ်ဂ့ၢ်အံၤ တလီၢ်လီၢ် လၢအဘၣ်ထွဲဒီး ကစၢ်ယွၤမၤပူၤဖျဲးအ၀ဲဒီးယၤ လၢနံၤအ၀ဲန့ၣ် ဒ်လဲၣ်ဒီး မၤလီၤတံၢ်ယၤလၢ ကစၢ်ယွၤ ပာ်လုၢ်ပာ်ပရၤယၤ‚ တချုးလၢ အ၀ဲဆံးစၢ်ယၤ ဒံးဒၣ်လဲာ်န့ၣ်လီၤႉ
ပှၤတအိၣ်နီတဂၤလၢ ကအိၣ်သဒၢသးလၢ ပပၢ်ကစၢ်ယွၤလၢအသ့ၣ်ညါတၢ် ကိးမံၤတဂၤ အမဲာ်ညါန့ၣ်ဘၣ်ႉ ပူၤကွံာ်နံၣ် ၂၅၀၀ ဘျဲၣ်‚ ကစၢ်ယွၤ စံးဘၣ် ၀ံယံးရၠာစးမံယၤ လၢ‚ ‘‘ယသ့ၣ်ညါနၤ‚ ဒီးနတချုးဟဲထီၣ်ဒံးဘၣ်လၢ ပှၤဒၢလီၢ်အပူၤန့ၣ်ဘၣ်’’ လီၤ (ယံး ၁း၅) ႉ ကစၢ်ယွၤသ့ၣ်ညါပှၤ ဂ့ၤဒိၣ်န့ၢ်ဒံး ပှၤတဂၤဂ့ၤတဂၤဂ့ၤ အတၢ်သ့ၣ်ညါပှၤဒီးဟ့ၣ်စ့ၢ်ကီး ပသးသမူအတၢ်တိာ်ဒီးတၢ်မူအခီပညီသ့၀ဲ‚ လၢအတလီၤဂာ်လၢ ပှၤဂၤအသိးဘၣ်န့ၣ်လီၤႉ တမ့ၢ်ထဲလၢအ၀ဲတ့လီၤပှၤ ခီဖျိအတၢ်ကူၣ်သ့ ဒီး တၢ်စိကမီၤဘၣ်ႉ မ့မ့ၢ်မၤပှဲၤစ့ၢ်ကီး တၢ်လၢပလိၣ်ဘၣ်အီၤကိးမံၤ‚ လၢအပာ်ဃုာ် ဒီးနီၢ်တဂၤ အတၢ်လိၣ်လီၤတံၢ်လီၤဆဲးလၢ အဟဲကဲထီၣ်သးလၢ တၢ်အကတီၢ်ကိးကတီၢ်ဒဲး‚ ဖဲလၢပတဘၣ်ပာ်သူၣ်ပာ်သး‚ စးထီၣ်လၢပသးအဖျၢၣ်လၢအစံၣ် တုၤဆူ ပခိၣ်နူာ်အတၢ်ဖံးတၢ်မၤ တဖၣ်န့ၣ်လီၤႉ လၢတၢ်ပာ်ဖျါထီၣ်‚ ပပၢ်လၢမူခိၣ်ပၢၤဃာ် တၢ်ကိးမံၤ စီၤဒၤ၀ံးစံး၀ဲလၢ‚ ‘‘ဒီးပကစၢ်ဧၢ‚ နတၢ်ဆိကမိၣ်န့ၣ် မ့ၢ်တၢ်လုၢ်ဒိၣ်ပရၤဒိၣ် ဒီးယၤဆံးဒိၣ်လဲၣ်ႉႉႉ’’ (စံး ၁၃၉း၁၇) န့ၣ်လီၤႉ
ကစၢ်ယွၤအိၣ်ဘူးဒီးပှၤ တုၤပတၢ်သါလၢခံကတၢၢ်တစုဒၣ်လဲာ်လီၤႉ အ၀ဲတ့လီၤပှၤ‚ သ့ၣ်ညါပှၤ ဒီး အဲၣ်ပှၤကွံပှၤအဃိ‚ ့ကၢး၀ဲဒီး ပတၢ်ဘူၣ်ထီၣ်ဘါထီၣ်အီၤ ဒီးစံးပ့တၢၤအီၤ လီၤစိၤလီၤထီန့ၣ်လီၤႉ