ဖဲ ၂၀၀၁ နံၣ်‚ ပှၤကွဲးထါ ဘးထ်မ့လဲးဒ် ကွဲးထါသး၀ံၣ်လၢအမ့ၢ် ‘‘ထဲယဆိကမိၣ်ထီၣ် ယဲသ့’’ လၢအဘၣ်ထွဲဒီးတၢ်လီၤကမၢကမၣ်ဆူ တၢ်ကအိၣ်ဘၣ်လၢခရၠာစးံာ်အဂီၤထံး န့ၣ်လီၤႉ အ၀ဲအတၢ်သး၀ံၣ်အဖျၢၣ် ဟ့ၣ်ထီၣ် တၢ်မၤမုာ်ထီၣ်က့ၤတၢ် လၢခံတနံၣ်ဆူ ပဟံၣ်‚ ဖဲပဖိမုၣ်ဖိမဲလံစၣ်လၢ အသံသတူၢ်ကလာ်လၢ သိလ့ၣ်အတၢ်တတၢာ်တနါ‚ ဖဲအသးအိၣ်တဆံနွံနံၣ် ဒီးပဆိကမိၣ်ထီၣ် အ၀ဲကအိၣ်ဘၣ် လၢကစၢ်ယွၤအဂီၤထံးအံၤ ကမၤအသး ဒ်လဲၣ်န့ၣ်လီၤႉ
ဘၣ်ဆၣ်‚ တၢ်ဆိကမိၣ်အံၤ‚ ကတိၤတၢ်ဒီးယၤလၢ ကျဲလၢအလီၤဆီတဘိ လၢနံၤသီတဖၣ်လၢအပိာ်ထွဲထီၣ် အခံ ဖဲမဲလ်စူးကွံာ်သး၀ံၤန့ၣ်လီၤႉ ဒ်မဲလံစၣ်အသကိးအပၢ် တဖၣ် ဟဲဆူယအိၣ်လၢ တၢ်သူၣ်အိၣ်သးအိၣ်အလၢအပှဲၤ ဒီးတၢ်တူၢ်ဘၣ်တၢ်အသိး‚ အ၀ဲသ့ၣ်စံးဘၣ် ယၤလၢ ‘‘ပဆိ ကမိၣ်က့ၤတဘၣ်လၢၤလၢ မ့ၢ်နကလဲၤခီဖျိတၢ်အံၤဒ်လဲၣ်’’န့ၣ်လီၤႉ
အ၀ဲသ့ၣ်အတၢ်ပာ်ဖျါထီၣ်တၢ်တဖၣ် မ့ၢ်တၢ်လၢအကဲထီၣ်တၢ်မၤစၢၤလၢ အပာ်ဖျါထီၣ်တၢ်လၢ အ၀ဲသ့ၣ်တူၢ်ဘၣ်စ့ၢ်ကီးတၢ်လၢ ပတၢ်လီၤမၢ် လၢတၢ်ဒိသူၣ်ဒိသး တမံၤအပူၤ ဃုထံၣ်န့ၢ်တၢ်အံၤ ဒ်အမ့ၢ်‚ တၢ်လၢတၢ်ဆိကမိၣ်အီၤတသ့အသိးန့ၣ်လီၤႉ
စီၤဒၤ၀ံးဃုထံၣ်န့ၢ်တၢ် လီၤတံၢ်လီၤဆဲးလၢတၢ်လီၤမၢ်ဖးဒိၣ် ဖဲ အပာ်ဖျါထီၣ်
တၢ်လဲၤခီဖျိ ‘တၢ်သံအကဒုအကစၢၢ်ကဆူး’ (စံး ၂၃း၄) န့ၣ်လီၤႉ ပှၤလၢ တၢ်အဲၣ်ဘၣ်အီၤ တဂၤ အတၢ်သံမ့ၢ်တၢ်ဒ်န့ၣ်အသိး‚ ဒီးတဘျီဘျီ‚ ပတအိၣ်ဒီး တၢ်ဆိကမိၣ်နီတမံၤလၢ ပကလဲၤခီဖျိတၢ်သံအကဒုအကစၢၢ်ကဆူးအံၤဒ်လဲၣ်န့ၣ်ဘၣ်ႉ ပဆိကမိၣ်ထီၣ် တန့ၢ် တသ့လၢ မ့ၢ်ပကဟးထီၣ်လၢတၢ်အံၤဒီး ဂုၤဆူတၢ်လီၢ်အဂၤကသ့ဒ်လဲၣ်န့ၣ်ဘၣ်လီၤႉ
ဘၣ်ဆၣ်‚ ဒ်ယွၤအတၢ်အၢၣ်လီၤအိၣ်လၢ ကအိၣ်ဒီးပှၤလၢတၢ်သံအကဒု အကစၢၢ်ကဆူး လၢအခဲအံၤ‚ ထီဘိအ၀ဲမၤပှဲၤ တၢ်မုၢ်လၢ်ဖးဒိၣ်လၢ ခါဆူညါအဂီၢ်လၢ တၢ်မၤလီၤတံၢ်က့ၤပှၤလၢ အလဲၤတလၢကွံာ်ကစၢၢ်ကဆူးလၢ တၢ်ကအိၣ်ကဆိးဘၣ် လၢ အမဲာ်ညါန့ၣ်လီၤႉ လၢပှၤစူၢ်က့ၤနာ်က့ၤတၢ်အဂီၢ်‚ တၢ်အိၣ်ယံၤဒီး နီၢ်ခိ’’အခီပညီမ့ၢ် ‘‘တၢ်အိၣ်ဒီးကစၢ်’’ (၂ ကရၠာစးံၣ် ၅း၈) န့ၣ်လီၤႉ တၢ်အံၤ‚ မ့ၢ်တၢ်လၢအမၤစၢၤပှၤဆူ တၢ်ကမၤလိၤမၤဘျၢက့ၤတၢ်လၢ ပဆိကမိၣ်အီၤတသ့ ဒ်ပဆိကမိၣ်ထီၣ် ပခါဆူညါလၢ ပကပာ်ဖှိၣ်က့ၤဘၣ်ပသးဒီးကစၢ်ယွၤ‚ ဃုာ်ဒီးပှၤအဂုၤအဂၤအသိးန့ၣ်လီၤႉ