ယနူၤအါရၠာစးံၤအမုၢ်တဂီၤ‚ ယပၢၢ်ထီၣ်လၢလီၢ်မံ ဒီးဆိကမိၣ်ဘၣ်ယဲဒၣ်လၢ ကထံၣ်ဘၣ် တၢ်ခုၣ်အလါလၢ ယထံၣ်ညီနုၢ်လၢ အတလီၤသးစဲလၢ အသးဂၢၢ်တ့ၢ်လံယၤလၢ အါနွံ‚ တပံၢ်တမါအလွဲၢ်ဘီဃးလၢ အဘၣ်တၢ်ခဲဘၢအီၤလၢမူခိၣ်ဖီ‚ မူခိၣ်မူလိၤ အလွဲၢ်၀ါဃး ဒီးသ့ၣ်မုၢ်၀ၣ်ဘိလၢ သ့ၣ်လၣ်လီၤဆှုကွံာ်တဖၣ်န့ၣ်လီၤႉ ဘၣ်ဆၣ် လၢတနၤအတီၢ်ပူၤ‚ တၢ်ဟဲအိၣ်ထီၣ်တမံၤ မ့ၢ်လၢအတမၤညီနုၢ်န့ၣ်လီၤႉ ပစီၤထံ လီၤသကၤကျၢၢ်ဘၢအီၤဒီး တၢ်မူ အတၢ်ဟူးတၢ်ဂဲၤတအိၣ် သ့ၣ်တဖၣ်န့ၣ် ကဲထီၣ်တၢ်လၢဃံလၤတမံၤလၢ အက့တ့ၣ် ဖဲမုၢ်ဆဲးကပီၤဒီး ဒုးသူၣ်ဟူးဟးဂဲၤယသးလီၤႉ
တဘျီဘျီ‚ ပထံၣ်တၢ်ကီတၢ်ခဲတဖၣ်လၢ ပတအိၣ်ဒီး တၢ်စူၢ်တၢ်နာ်တၢ်ယိာ်ယိာ်ဘၣ်ႉ ပမုၢ်လၢ်တၢ်လၢအမၤဆါ ပှၤ‚ တၢ်ပျံၤတၢ်ဖုးဒီး တၢ်သးဟးဂီၤလၢ အဟဲသဂၢၢ်ပှၤ ကိးမုၢ်ဂီၤ‚ ဒီးလီၤတူာ်လီၤကာ်လၢ ကဟဲအိၣ်ထီၣ်သ့ၣ်တဖၣ် န့ၣ်လီၤႉ ဒီးပတမုၢ်လၢ်၀ဲလၢ တၢ်လီၤလးတဖၣ်ကဟဲအိၣ်ထီၣ်န့ၣ်လီၤႉ ပတမုၢ်လၢ်လၢ တၢ်ကအိၣ်ဆူၣ်အိၣ်ခ@ထီၣ်‚ တၢ်ဒိၣ်ထီၣ် မ့တမ့ၢ် တၢ်မၤနၢၤလၢ အဟဲခီဖျိလၢ ယွၤအစိကမီၤန့ၣ်ဘၣ်ႉ လံာ်စီဆှံစံးဘၣ်ပှၤလၢ ယွၤမ့ၢ်ပှၤလၢအမၤစၢၤပှၤ ဖဲပလဲၤခီဖျိဘၣ် တၢ်ကီတၢ်ခဲအကတီၢ်န့ၣ်လီၤႉ အ၀ဲဘှီက့ၤ ပသူၣ်ပသးလၢ အလီၤကလဲ ဒီး ဒုးထူၣ်ဖျဲးပှၤလၢ အဘၣ်တၢ်စၢဃာ်လီၤႉ အ၀ဲမၤမုာ်ထီၣ် ပှၤလၢအသူၣ်အုးသးအုးလၢ ခိၣ်သလုးဖၣ်ဆါအလီၢ်‚ တၢ်သးခုအသိလၢ တၢ်သးအုးအလီၢ်‚ တၢ်စံးထီၣ်ပ့တၢၤ အဆ့ကၤလၢ တၢ်သးအုးအလီၢ်န့ၣ်လီၤ’’ (ယ့ှှါ ၆၁း၃) ႉ
တမ့ၢ်ယွၤဘၣ်သူၣ်ဘၣ်သးလၢ ကမၤသးဖှံထီၣ်ပှၤ‚ ဖဲပကွၢ်ဆၢၣ်မဲာ် တၢ်ဂ့ၢ် တဖၣ် ဘၣ်န့ၣ်ဧါလီၤႉ တၢ်အံၤ‚ တမ့ၢ်အ၀ဲအကစၢ်ဒၣ်၀ဲလၢ အမ့ၢ်ပတၢ်မုၢ်လၢ်‚ ဖဲပဘၣ် တၢ်နးတၢ်ဖှီၣ်တဖၣ်ဘၣ်န့ၣ်ဧါႉ ဖဲလၢပမ့ၢ်အိၣ်ခိးတၢ်လၢ တၢ်ကဃုထံၣ်န့ၢ် တၢ်မၤ မုာ်ထီၣ်လၢ မူခိၣ်ဘီမုၢ်အခါဒၣ်လဲာ်‚ ယွၤမ့ၢ်တ့ၢ်လံ ကစၢ်လၢအအိၣ်ဒီးပှၤ‚ ဟ့ၣ်ဂံၢ် ဟ့ၣ်ဘါပှၤ ဒီး တလီၢ်လီၢ်ဟ့ၣ်ပှၤတၢ်ထံၣ်တဖျဲးလၢ အ၀ဲအကစၢ်ဒၣ်၀ဲန့ၣ်လီၤႉ လၢ သးသမူအတၢ်လဲၤခီဖျိအပူၤ‚ မ့ၢ်ပသ့ၣ်ညါနၢ်ပၢၢ် ပှၤစီဆှံ အီကၢးစတံအတၢ်ကတိၤ လၢ ‘‘လၢယတၢ်ပူၤလီၢ်ပူၤကျဲအယိာ်အနးကတၢၢ်အပူၤ‚ ယထံၣ်ဘၣ်ယဲ နလၤကပီၤ ဒီးတၢ်အံၤမ့ၢ်တၢ်လၢအထိၣ်ဂဲၤယၤလီၤ’’စ့ၢ်ဧါႉ