၀ီလ်လံးစ်စတဲးနၢၣ် အမိၢ်စူးကွံာ်သး ဖဲအသးအိၣ်အနံၣ်ယဲၢ်ဆံန့ၣ်လီၤႉ ဖဲ၀ီလ်လံး အသးအိၣ်အနံၣ်ဃိးဆံ‚ အ၀ဲကွဲးတၢ်ကွဲးဖုၣ်ကိာ်တခါလၢ အဘၣ်ထွဲဒီးအမိၢ် ‘‘လံာ်ပရၠာစးၢလၢအစဲၤခံဒိၣ်မး’’ လၢအဘၣ်ထွဲဒီး အ၀ဲစံးပ့တၢၤပိာ်မုၣ်တဂၤလၢ အဒိၣ်ထီၣ်လၢ လုၢ်လၢ်အဂ့ၤအ၀ါ‚ ဆီဟံၣ်ဆီဃီဒီးလုၢ်ဒုးဒိၣ်ထီၣ် ဖိခွါခံဂၤကီကီခဲခဲလၢ ကီၢ်မုၢ်နုာ် အမဲရၠာစးကၤလၢ တၢ်ကတီၢ်လၢ အဆိတဖၣ်အပူၤန့ၣ်လီၤႉအ၀ဲမ့ၢ်မါဒီး မိၢ်လၢ အဟ့ၣ်ဂံၢ်ဟ့ၣ်ဘါတၢ်တဂၤ‚ ဆူပှၤတအဲၣ်ဒိး ဆၢန့ၢ်အီၤတဖၣ်အလိၤန့ၣ်လီၤႉ ၀ီလ်လံးသ့ၣ်နီၣ်ထီၣ် တၢ်ဂံၢ်တၢ်ဘါလၢ အမိၢ် ပာ်ဖျါထီၣ်တၢ်လၢ အဘၣ်ထွဲဒီးတၢ်လၢ အကလုၢ်အဖီခိၣ်န့ၣ်လီၤႉ အ၀ဲကွဲးဖျါ ထီၣ်၀ဲလၢ ‘‘နတပျဲဖျဲး တၢ်ခွဲးတၢ်ယာ် နီတစု ဆူနကသး၀ံၣ် တၢ်ဘၣ်န့ၣ်ဘၣ်’’ႉ အ၀ဲအသးသမူတစိၤ‚ မိၢ်အံၤ သူၣ်၀ံၣ် သးဆၢတၢ်‚ စံးဘျုးက့ၤကစၢ်ယွၤလၢ တၢ်ဆိၣ်ဂ့ၤဒိၣ်ဂ့ၤဆံးဂ့ၤအဖီခိၣ်န့ၣ်လီၤႉ
ပှၤကွဲးထါစံးပ့တၢၤစ့ၢ်ကီး ဟံးန့ၢ်တၢ်ခွဲးတၢ်ယာ်လၢ ကသး၀ံၣ်စံးထီၣ်ပ့တၢၤ ယွၤလီၤႉ အ၀ဲသး၀ံၣ်ထီၣ်ယွၤ ဖဲအဘၣ်မုာ်ဂ့ၤဖှီၣ်ဂ့ၤန့ၣ်လီၤႉ တၢ်သး၀ံၣ်တဖၣ် တမ့ၢ် တၢ်မၤဆူၣ်တၢ်ဘၣ်ႉ မ့မ့ၢ် တၢ်အံၤမ့ၢ် တၢ်မၤဆၢက့ၤတၢ်အန့ဆၢၣ်လၢ ‘‘ပှၤလၢ အတ့ လီၤမူခိၣ်ဒီးဟီၣ်ခိၣ် (၁၄၆း၆) ဒီး အ၀ဲ ‘‘ဟ့ၣ်လီၤတၢ်အီၣ်တၢ်အီလၢ ပှၤတၢ်သၣ်၀ံၤ အသး’’ (း၇) ဒီး ‘‘မၤကပီၤထီၣ် ပှၤမဲာ်ဘျီၣ်’’ (း၈) ႉ ဒီး ‘မၤစၢၤပှၤဖိၣ်ဃဲဒီးမုၣ်ကမဲ’ (း၉) ဒ်လဲၣ်န့ၣ်လီၤႉ တၢ်အံၤ မ့ၢ်နီၢ်နီၢ် တၢ်အိၣ်မူအိၣ်ဂဲၤအကျိၤကျဲတမံၤ လၢအစံးထီၣ်ပ့တၢၤ တၢ်လၢထါသး၀ံၣ်‚ တၢ်တမံၤလၢ အသူၣ်ထီၣ်တၢ်ဂံၢ်ဆူၣ်ဘါဆူၣ်လၢ တၢ်အကတီၢ် တဖၣ်‚ ဒ်ကိးနံၤတၢ်စူၢ်တၢ်နာ်အံၤ မ့ၢ်တၢ်လၢ အဘၣ်တၢ်ပာ်ထီၣ်အီၤဆူ ‘စီၤယၤကိာ် အကစၢ်’ လၢ ‘အပၢၤဃာ်တၢ်မ့ၢ်တၢ်တီ လီၤထူလီၤယိာ်’ (း၅-၆) န့ၣ်လီၤႉ
ပကလုၢ်အမုာ်တမုာ်တမ့ၢ်တၢ်လၢအကါဒိၣ်‚ မ့မ့ၢ် ပတၢ်မၤဆၢက့ၤ ကစၢ်ယွၤ လၢအမၤစၢၤပှၤ ဒီးတၢ်လၢအဂ့ၤအ၀ါအံၤ‚ ကမ့ၢ်ပတၢ်အိၣ်မူအိၣ်ဂဲၤ အကျိၤအကျဲ တမံၤလၢ အစံးထီၣ်ပ့တၢၤက့ၤအီၤန့ၣ်လီၤႉ မ်ကမ့ၢ်ဒၣ်၀ဲ ဒ်ထါသး၀ံၣ်ကစၢ်ယွၤလၢပျၢၤ တယုၢ် ပာ်ဖျါ၀ဲအသိး ‘လၢယသးပူၤ တၢ်သး၀ံၣ်သီၣ်ထီၣ်’တက့ၢ်ႉ