၀့ၢ်လိဒိၣ်တၢ်အီၣ်တၢ်အီအကျးရၠာစးၢ်ဒံၢ်ဘူးအပူၤ‚ ဖဲပှၤတဲဆိထံၣ်လိာ်သးအလီၢ်ဖိအံၤ အိၣ်၀ဲဒီးတၢ်ကပီၤဂ့ၤ‚ ခီဖံၣ်သ၀ံအစိနၢမူ လၢအထုးသူၣ်ထုးသး‚ ဒီးလီၢ်ဆ့ၣ်နီၤ အလီၢ်လဲၢ်အမုာ်တဖၣ်လီၤႉ ဘၣ်ဆၣ်ဒီးတၢ်တအိၣ်ဘၣ်တမံၤ မ့ၢ်တၢ်တဟံးန့ၢ်တၢ်အပရၤ နီတမံၤဘၣ်လီၤႉ တၢ်မၤအံၤ အခီၣ်ထံးမ့ၢ်တၢ်အိၣ်ဖှိၣ်တဖုအတၢ်မၤန့ၣ်လီၤႉ ခီဖံၣ်အကျးဖိအံၤ တနံၣ်ပှဲၤထီၣ်ဒီး တဒ်သိးလၢအခီၣ်ထံးလၢၤဘၣ်ႉ ဆီတလဲအသးန့ၣ်လီၤႉ ပှၤပၢဆှၢတၢ်မၤဖဲန့ၣ်တဂၤ အသးပၢၢ်ထီၣ် လၢကစၢ်ယွၤကိးထီၣ်အ၀ဲသ့ၣ် ဒ်သိး အကမၤတၢ်အသီ လၢာ်လၢာ်ဆ့ဆ့တမံၤလီၤႉ တၢ်အီၣ်တၢ်အီတမံၤဘၣ်တမံၤ ကိးအမံၤဒဲးလၢတၢ်ကွဲးလီၤအီၤန့ၣ် အပရၤတအိၣ်ဘၣ်ႉ မ့ၢ်ဒၣ်တၢ်ဟ့ၣ်ကလီလီၤႉ နမၤလိာ် ခီဖံၣ်‚ ကိၣ် သ့၀ဲ‚ ဒီးတလိၣ်နဟ့ၣ်အပရၤဘၣ်ႉ တၢ်တူၢ်လိာ်တၢ်မၤဘူၣ်တလါ ဒၣ်လဲာ်တအိၣ်ဘၣ်ႉ တၢ်ခဲလၢာ်မ့ၢ်ဒၣ်တၢ်ဟ့ၣ်န့ၣ်လီၤႉ
ယသံကွၢ် ပှၤပၢဆှၢတၢ်ဖဲကျးန့ၣ် လၢဘၣ်မနုၤအဃိ အ၀ဲသ့ၣ် ဟ့ၣ်ဒုးအီၣ်ကလီတၢ်အီၣ်တၢ်အီ လၢတၢ်သူၣ်လဲၢ် သးလဲၢ်ထဲန့ၣ်ညါလဲၣ်ႉ ဒီးအ၀ဲစံးဆၢလၢပအဲၣ်ဒိးမၤဘၣ်ပှၤအဂၤ ဒ်ကစၢ်ယွၤ မၤဘၣ်ပှၤအသိးန့ၣ်လီၤႉ ပစံးဘျုးယွၤမ့ၢ်ဂ့ၤ‚ တစံးဘျုးယွၤမ့ၢ်ဂ့ၤ အ၀ဲဒၣ်ဟ့ၣ်တၢ်လီၤႉ ကစၢ်ယွၤ အသူၣ်လဲၢ်သးလဲၢ်ဒိၣ်န့ၢ်အါန့ၢ်ဒံး ပဆိကမိၣ်သ့တက့ၢ်လီၤႉ
ယ့ၣ်။းသံလၢကအုၣ်က့ၤခီၣ်က့ၤပှၤ လၢပတၢ်ဒဲးဘးတဖၣ် ဒီးမၤဘၣ်လိာ်က့ၤ ပှၤ ဒီးယွၤန့ၣ်လီၤႉ အ၀ဲဂဲၤဆၢထၢၣ်သမူထီၣ်က့ၤ လၢတၢ်သံဒီးခဲအံၤမူ၀ဲလီၤႉ လၢတၢ်အံၤအဃိ ကယဲၢ်တၢ်ကမၣ်လၢပမၤတ့ၢ်ကိးမံၤဒဲးန့ၣ် တၢ်ပျၢ်ကွံာ်သ့၀ဲဒၣ်န့ၣ်လီၤႉ ဒီးတနံၤ အံၤ ပန့ၢ်တၢ်အိၣ်မူအသီသ့၀ဲလီၤ (အ့း ၂း၁-၅) ႉ တၢ်ဂ့ၢ်ဖးဒိၣ်တဖၣ်အကျါတမံၤ လၢအဘၣ်ထွဲဒီးတၢ်ဂ့ၢ်အံၤမ့ၢ်၀ဲ တၢ်ခဲလၢာ်မ့ၢ်တၢ်သဘ@လီၤႉ တၢ်အိၣ်မူအသီ လၢယ့ၣ်။းဟ့ၣ်၀ဲန့ၣ် ပပရၤအီၤတန့ၢ်ဘၣ်ႉ ပဟ့ၣ်မၤဘူၣ်မၤတီၢ်ဒၣ်လဲာ် လၢကထီၣ်ဘး တၢ်အပရၤ စ့ၢ်ကီးတသ့ဘၣ် (အ့း ၂း၈‚၉) ႉ တၢ်ခဲလၢာ်မ့ၢ်ဒၣ်ကစၢ်ယွၤ အတၢ်ဟ့ၣ်လီၤႉ
ဒ်ပှၤလၢ၀့ၢ်လိဒိၣ် တၢ်အီၣ်အကျး ဟ့ၣ်ခီဖံၣ်ဒီး ကိၣ်ညၣ့်တံာ်‚ ကိၣ်ဆီဒံၣ် အသိး‚ အ၀ဲသ့ၣ် ဒုးထံၣ်ပှၤစ့ၢ်ကီး လၢကစၢ်ယွၤအတၢ်သူၣ်လဲၢ်သးလဲၢ်အဂ့ၢ်လီၤႉ နၤ‚ ယၤ ပဘၣ်တၢ်ဟ့ၣ်ကလီပှၤ တၢ်မူအထူအယိာ်န့ၣ်‚ မ့ၢ်ဒၣ်လၢ ကစၢ်ယ့ၣ်။းဟ့ၣ်တၢ် အပရၤအဃိလီၤႉ