ယတၢ်မၤလီၢ်အပဲ့တီအချၢန့ၣ်‚ လံၣ်ပအီတဖၣ် လၢတၢ်ထီဒါတၢ်ဂိၢ်ကတီၢ်အပူၤ ဃ့ၢ်ခူၣ်လီၤအသ့ၣ်ထိးဖးအသၣ်တဖၣ် လၢတၢ်လီၢ်လၢအတဒီတဒၢအသးဒီး လဲၤ၀ဲသ့ အလီၢ်န့ၣ်လီၤႉ အ၀ဲသ့ၣ် အတၢ်ဟူးတၢ်ဂဲၤအံၤ မၤမုာ်မၤဖှံယသးန့ၣ်လီၤႉ သမီၣ် ဒီတက့ှူၢ် ခီဂာ်ပကရၠာစးၢၢ်အလီၢ်ခံ ဒီးတမၤသီၣ်အကလုၢ်နီတဘီသ့၀ဲ ဘၣ်ဆၣ် လံၣ်ပအီတဒုအကလုၢ် မၤသး ဒ်ဟဲဂုာ်ဆူၣ်ပျိဆူၣ်တၢ်အသိးန့ၣ်လီၤႉ
ဆၣ်ဖိကီၢ်ဖိခံကလုာ်အံၤ လီၤဆီလိာ်အသး လၢကျဲအဂၤတမံၤစ့ၢ်ကီးန့ၣ်လီၤႉ သမီၣ်တဖၣ် တကတဲာ် ကတီၤအသး လၢတၢ်ဂိၢ်ကတီၢ်အဂီၢ်ဘၣ်ႉ ဖဲ မူခိၣ်ဖီလီၤန့ၣ် အ၀ဲသ့ၣ်အီၣ်၀ဲ တၢ်လၢအထံၣ်န့ၢ်၀ဲ လၢအကျဲဒီတဘိ ပာ်ဃုာ်ဒီး တၢ်အမုၢ်လၢပကယၢကယဲ ပကရၠာစးၢၢ်တဖၣ်စ့ၢ်ကီးလီၤႉ ဘၣ်ဆၣ် လံၣ်ပအီတဖၣ် မ့ၢ်မၤဒိး အ၀ဲသ့ၣ်န့ၣ် ကသၣ်၀ံၤလီၤဒိသပှၢ်တၢၢ်န့ၣ် အ၀ဲသ့ၣ် ဃုတၢ်အီၣ်လၢအ့ကၢးတသ့ဘၣ်န့ၣ်လီၤႉ
သမီၣ်ဒီး လံၣ်ပအီ ဒုးနဲၣ်ဖျါကျဲတဖၣ် လၢကစၢ်ယွၤကဟုကယာ်ပှၤန့ၣ်လီၤႉ အ၀ဲ ဒုးမၤသ့ပှၤတၢ်မၤတဖၣ်ဒီး မၤပူၤဖျဲးပှၤ လၢခါဆူညါအဂီၢ် ဒီး အ၀ဲမၤပှဲၤပတၢ်လိၣ် ဖဲပဂံၢ်ထံးတဖၣ် စှၤအခါန့ၣ်လီၤႉ ဒ်လံာ်တၢ်ကူၣ်သ့တဖၣ် သိၣ်လိပှၤအသိး‚ ကစၢ်ယွၤ ဟ့ၣ်ပှၤတၢ်ဆၢကတီၢ် လၢအလၢပှဲၤ ဒ်သိးပကကတဲာ်ကတီၤပသးလၢ တၢ်ဆၢကတီၢ် လၢအလိၣ်အဂီၢ်န့ၣ်လီၤ (ကတိၤဒိ ၁၂း၁၁) ႉ ဒီးဒ် ထါစံးထီၣ်ပ့တၢၤ ၂၃ စံး၀ဲ‚ ကစၢ်ယွၤ ဆှၢခီဖျိပှၤ လၢတၢ်လီၢ်လၢလီၤဘၣ်ယိာ်ဘၣ်ဘီ ဆူအီၣ်ဆၣ်အလီၢ်လါဟ့န့ၣ်လီၤႉ
ကစၢ်ယွၤလုၢ်အီၣ်ပှၤ လၢကျဲလၢခံတမံၤမ့ၢ်၀ဲ နဲၣ်လိပှၤ ဒ်သိးပှၤလၢအတၢ် အိၣ်အါတဖၣ် ကဟ့ၣ်ခီနီၤလီၤဆူ ပှၤလၢအလိၣ်ဘၣ်တဖၣ်အအိၣ်န့ၣ်လီၤ (၅မိၤ ၂၄း၁၉) ႉ အဃိ ဖဲဘၣ်ဃးဒီး ကစၢ်ယွၤအတၢ်လုၢ်အီၣ်ပှၤန့ၣ်‚ လံာ်စီဆှံအတၢ်ကစီၣ် မ့ၢ်၀ဲ‚ မၤတၢ်ဖဲပမၤသ့အခါ‚ ပာ်ကီၤတၢ်ဖဲပသ့‚ ဟ့ၣ်နီၤတၢ်ဖဲပသ့ ဒီး နာ်ယွၤလၢ ကမၤလၢပှဲၤပတၢ်လိာ်တဖၣ်န့ၣ်တက့ၢ် န့ၣ်လီၤႉ