ယဖိမုၣ်ဒီးယၤ ပသုးကျဲၤကတဲာ်ကတီၤပသး လၢပကလဲၤဟံၣ်ဒူၣ်ဃီထၢ အတၢ်ထံၣ်လိာ်သးန့ၣ်လီၤႉ မ့ၢ်လၢအ၀ဲသူၣ်ကိၢ်သးဂီၤ လၢတၢ်လဲၤတဘျီအံၤအဃိ‚ ယဃ့နီၣ်သိလ့ၣ်န့ၣ်လီၤႉ အ၀ဲသံကွၢ်ယၤ‚ ‘‘ဂ့ၤလံ‚ ဘၣ်ဆၣ် ယပလၢၢ်ဘၣ် တၢ်တဒီတဒၢ လၢယသိလ့ၣ်ပူၤလီၤႉ နနီၣ်နံယၤကသ့ဧါ’’ႉ ယဆိမိၣ်လၢအ၀ဲအဲၣ်ဒိး အသိလ့ၣ် လၢအဒိၣ်အလဲၢ်ဒိၣ်န့ၢ် ယသိလ့ၣ်အဆံးအဃိ ယတဲဆၢအီၤ လၢ‚ ‘‘ယသိလ့ၣ် ကတံာ်ကတူးကဲာ်ဆိးအဃိဧါ’’ န့ၣ်လီၤႉ ‘‘တမ့ၢ်ဘၣ်ႉ မ့ၢ်ဒၣ်လၢယသိလ့ၣ်မ့ၢ် ယတၢ်ပူၤဖျဲးအလီၢ် အဃိန့ၣ်လီၤႉ ယဘၣ် တၢ်တဒီတဒၢယၤဖဲန့ၣ်လီၤႉ’’
အတၢ်ကတိၤ တၤတၢ်ဒီးယၤလၢ ယကဆိကမိၣ် က့ၤ ‘‘ယတၢ်ပူၤဖျဲးအလီၢ်’’ န့ၣ်လီၤႉ တဘျီဃီ ယဆိကမိၣ် ထီၣ် ကတိၤဒိ ၁၈း၁၀‚ ‘‘ ယွၤအမံၤမ့ၢ်တၢးထီခၢၣ်သနၢၢ်လီၤႉပှၤတီပှၤလိၤန့ၣ် ဃ့ၢ်နုာ်ဆူအပူၤ‚ ဒီးအိၣ်ပူၤဖျဲး၀ဲလီၤႉ’’ လၢလံာ်စီဆှံအလီၢ်လံၤတက့တူၢ် အကတီၢ်အခါ‚ ဂီၤပၤတဖၣ်ဒီး ၀့ၢ်အပျိာ်ကွၢ်စိတၢ် ဟ့ၣ်ထီၣ်တၢ်ပလီၢ် လၢတၢ်လီၤပျံၤလီၤဖုးတဖၣ်ဒီး ကတီၤဃး အပှၤခူဖိ၀့ၢ်ဖိ အအိၣ်လၢ အပူၤန့ၣ်လီၤႉ ပှၤကွဲးလံာ် အတၢ်ပညိၣ်မ့ၢ် ကစၢ်ယွၤအမံၤ လၢအဆၢထၢၣ် လၢအသကဲာ်ပ၀း‚ အနီၢ်ကစၢ်ဒီး တၢ်ခဲလၢာ်လၢအမ့ၢ်တၢ်အံၤ ဟ့ၣ်ထီၣ် တၢ်တဒီတဒၢ လၢအပှၤဂီၢ်မုၢ်အဂီၢ်န့ၣ်လီၤႉ
ဟီၣ်ခိၣ် အတၢ်လီၢ်လီၤတံၢ်လီၤဆဲးတဖၣ် အၢၣ်လီၤအသး လၢကဟ့ၣ်ပှၤ တၢ်ပူၤဖျဲး ဖဲလၢတၢ်လီၤပျံၤလီၤဖုးအိၣ်ထီၣ်အခါန့ၣ်လီၤႉ ဟံၣ်ခိၣ်ဒုးအကျၢၤ လၢပဖီခိၣ် လၢကလံၤမုၢ်တွၤအခၢၣ်သး‚ တၢ်ဆါဟံၣ် လၢဟ့ၣ်ထီၣ်ကသံၣ်ကသီ တၢ်အံးထွဲ ကွၢ်ထွဲ‚ ဒီး ပှၤလၢပအဲၣ်အတၢ်ဖိးဟုတဖၣ်န့ၣ်လီၤႉ
နတၢ် ‘‘ပူၤဖျဲးအလီၢ်’’ မ့ၢ်မနုၤလဲၣ်ႉ တၢ်လီၢ်တပူၤဂ့ၤတပူၤဂ့ၤ လၢပဃု တၢ်ပူၤဖဲျးအလီၢ်န့ၣ်‚ ကစၢ်ယွၤအိၣ်ဒီးပှၤ လၢတၢ်လီၢ်၀ဲန့ၣ် ဟ့ၣ်ထီၣ်ပှၤ တၢ်ဂံၢ်ဘါဒီး တၢ်ဒီတဒၢလၢ ပလိၣ်ဘၣ်နီၢ်နီၢ်န့ၣ်လီၤႉ