ဖဲယအိးထီၣ် ကဟၣ်သ့သဘံၣ်လီခီန့ၣ် ယဆိကမိၣ် တၢ်လဲၤကမၣ်အသး တမံၤမံၤ လံလီၤႉ ခွး‚ နီၢ်တၢၤ ဒီးသပၢၤလၢအဘၣ်တၢ် သ့စီကြပုၢ်ကပြီၤအလီၢ်န့ၣ် ယထံၣ်န့ၢ် သဘံၣ်လီခီဒီးလီခီဆှံတဖၣ် လၢအအိၣ်လီၤဘၢလၢတၢ်ကမူၣ်ကမီ‚ ဖၣ်ဆါအပူၤန့ၣ်လီၤႉ ယဆိကမိၣ်ပလီၢ်က၀ီၤအထံ လၢအပာ်ဃုာ်ဒီးကဲလဆံယၢၣ် ဒီးဟီၣ်လာ်အံသၣ် မၤဟးဂီၤတၢ်‚ မ့တမ့ၢ် တဘၣ်လီၢ်ဘၣ်စး‚ မ့တမ့ၢ် ကဟၣ်သ့ သဘံၣ်လီခီ ဟးဂီၤ၀ဲဒၣ်န့ၣ်လီၤႉ
ကဟၣ်သ့ သဘံၣ်လီခီအံၤ အကမူၤအကမၣ်အိၣ်၀ဲ‚ တမၤတၢ်ဂ့ၤဂ့ၤ ဘၣ်ဆၣ် ကစၢ်ယွၤအတၢ်သ့စီ ပှၤတခီ မၤကဆှီကွံာ် ပတၢ်တဂ့ၤတ၀ါတဖၣ် ခဲလၢာ်လီၤႉ လံာ်၀ံယဃ့းစက့လးအပူၤန့ၣ် ၀ံတဲဖျါ၀ဲ ယွၤအတၢ်အဲၣ် ဒီးတၢ်ပျၢ်တၢ်ဒဲးဘးအကစီၣ် ဒီးပထံၣ်ဘၣ် ယွၤအတၢ် ကိးက့ၤ အပှၤဂီၢ်မုၢ် ဆူအအိၣ်န့ၣ်လီၤႉ ဖဲလၢပှၤအံၣ်စရၠာစး့လးဖိတဖၣ် ပိာ်ထွဲမၤထွဲ ပှၤကလုာ်အဂၤတဖၣ်ဒီး အကစၢ်တဖၣ်အခံန့ၣ် မ့ၢ်တၢ်ဒဲးဘးလၢအ၀ဲသ့ၣ် မၤဘၣ်၀ဲ န့ၣ်လီၤႉ ဘၣ်ဆၣ် ကစၢ်ယွၤတခီ သးကညီၤအ၀ဲသ့ၣ် ဒီးတူၢ်လိာ်မုာ်က့ၤ‚ ကကိးက့ၤ ဆူအ၀ဲအအိၣ်လီၤႉ ကစၢ်ယွၤအၢၣ်လီၤ၀ဲဒၣ်လၢ ‘‘ယကသ့စီသုတၢ်ဘၣ်အၢ လၢသုလိၤခဲလၢာ်‚ ဒီးသုတၢ်ဂီၤအတၢ်ဘၣ်အၢလၢသုလိၤခဲလၢာ်လီၤ’’ (ဃ့း ၃၆း၂၅) ႉ ဖဲကစၢ်ယွၤ ပာ်အသး လၢအပှၤဂီၢ်မုၢ်အပူၤ (း၂၇) ‚ ဒီးအ၀ဲကမၤအါထီၣ် အတၤသၣ်‚ ဒီးတၢ်အါထီၣ်လၢစံာ်ပူၤ‚ ဒ်သိးအသုတဘၣ်လၢၤ တၢ်သၣ်၀ံၤ လီၤဒိလၢၤတဂ့ၤန့ၣ်လီၤ (း၃၀) ႉ
ဒ်လၢ၀ံယဃ့စက့လး အမုၢ်နံၤတဖၣ်အသိးန့ၣ်‚ တနံၤအံၤစ့ၢ်ကီး ကစၢ်ယွၤ တူၢ်လိာ်မုာ်ပှၤဆူအအိၣ် ဖဲလၢပဟးဖျိးကျဲအခါန့ၣ်လီၤႉ ဖဲလၢပဟ့ၣ်လီၤပသး လၢအီၤအခါန့ၣ် အ၀ဲလဲလိာ်က့ၤပှၤ ဖဲအ၀ဲသ့စီဆှံကွံာ် ပတၢ်ဒဲးဘးခဲလၢာ်န့ၣ်လီၤႉ ဖဲလၢ ယွၤအသးမုၢ်စီဆှံ အိၣ်ဆိးလၢပပူၤန့ၣ်ဒီး‚ အ၀ဲမၤစၢၤပှၤဒ်သိး ပကပိာ်အခံ တနံၤဘၣ် တနံၤန့ၣ်လီၤႉ