ဖဲတၢ်ကိၢ်ထီၣ်သီ ဒီးတၢ်ကိၢ်ခါအဆၢကတီၢ်န့ၣ် ယဘၣ်ယသးဒိၣ်မး လၢတၤသၣ် လၢအသၣ်ထီၣ်လၢ ပှၤလၢယဟံၣ်ကပၤအကရၠာစးၢၢ်ပူၤန့ၣ်လီၤႉ စပံးထူၣ်လၢအ၀ဲသ့ၣ် သူၣ်၀ဲတဖၣ် ဒိးထီၣ်လၢတၢ်ဒူၣ်အလိၤ ဒီးသၣ်ထီၣ်၀ဲဒၣ် စပံးသၣ်အချံၣ်ဖးဒိၣ်တဖၣ်လီၤႉ သ့ၣ်ဒ့ပှဲၤဒီးထံမိၤတိၤသၣ်ဂီၤလုးတဖၣ် ဒီးစူၢ်၀ံၣ်သၣ်အဖျၢၣ်ဘီၣ်သိတဖၣ် လီၤစဲၤ၀ဲဒၣ် လၢပထဲးအီၤသ့အလီၢ်န့ၣ် စ့ၢ်ကီးလီၤႉ
ပတထဲၣ်ဟီၣ်ခိၣ်‚ ပတသူၣ်လီၤတၢ်ချံ‚ ပတလူထံ ဒီးထဲးကွံာ်နီၢ်လၢကရၠာစးၢၢ်ပူၤ ဘၣ်ဆၣ် နီၢ်ဒီမိၤ၀ၤခံဂၤ လၢပဟံၣ်ကပၤအံၤ နီၤဟ့ၣ် အတၢ်ပှဲၤလုၢ်ကွံာ်ဒီးပှၤန့ၣ်လီၤႉ အ၀ဲသ့ၣ်ဟံးန့ၢ်မူဒါ လၢကကဟုကယာ် ဒုးဒိၣ်ထီၣ် တၢ်မုၢ်တၢ်ဘိတဖၣ် ဒီးပျဲပအီၣ်တၤသၣ်လၢအကူးက့ၤ၀ဲ အကျါ တနီၤန့ၣ်လီၤႉ
သ့ၣ်ထူၣ် ဒီးစပံးမုၢ် လၢအအိၣ်လၢတၢ်ဒူၣ်လၢဘးခီ အတၤသၣ်တဖၣ်အံၤ ဒုးသ့ၣ်နီၣ်ထီၣ်က့ၤယၤလၢ တၢ်ကူးက့ၤလၢခံတမံၤ လၢအမၤဂ့ၤယၤ ဒီးပှၤလၢ ယွၤပာ်လၢယတၢ်အိၣ်မူအပူၤတဖၣ်လီၤႉ တၢ်ကူးက့ၤတခီ မ့ၢ်၀ဲသးအတၤသၣ်တဖၣ်လီၤႉ
ပှၤပိာ်ခရၠာစးံာ်အခံတဖၣ်န့ၣ်ဘၣ်တၢ်မၢအီၤလၢကဃ့န့ၣ် တၢ်အိၣ်မူ အတၢ်န့ၢ်ဘျုးတဖၣ် ခီဖျိသးစီဆှံအစိအကမီၤန့ၣ်လီၤ (ကလၤ ၅း၁၆-၂၁) ႉ တၢ်အချံဘၣ်ဃး ဒီးယွၤအတၢ်မ့ၢ်တၢ်တီတဖၣ် ဖဲအမဲထီၣ်ဒိၣ်ထီၣ် လၢပသးကံၢ်ပူၤန့ၣ်ဒီး‚ သးစီဆှံ ဒုးအါထီၣ် ပတၢ်သ့ပာ်ဖျါ ‘‘တၢ်အဲၣ်တၢ်ကွံ‚ တၢ်သူၣ်ခုသးခု‚ တၢ်ဃူတၢ်ဖိး‚ တၢ်၀ံသးစူၤ‚ တၢ်သူၣ်စူၤသးစူၤ‚ တၢ်မၤဂ့ၤတၢ်‚ တၢ်စူၢ်တၢ်နာ်‚ တၢ်ဆီၣ်လီၤပသး ဒီးတၢ်ကီၤသူၣ်ကီၤသးတဖၣ်’’ န့ၣ်လီၤ (း၂၂-၂၃) ႉ
ဖဲပဟ့ၣ်လီၤ ပတၢ်အိၣ်မူဆူကစၢ်ခရၠာစးံာ်အစုပူၤန့ၣ်ဒီး ပတဘၣ် တၢ်ပၢဆှၢပှၤလၢ သးလၢအကွၢ်ထဲပဂီၢ်န့ၢ်လၢၤဘၣ်ႉ ဆၢကတီၢ်မ့ၢ်ယံာ်ထီၣ်ဒီး သးမုၢ်စီဆှံ လဲလိာ်န့ၢ်ပတၢ်ဆိကမိၣ်‚ ပတၢ်ပာ်သူၣ်ပာ်သး‚ ဒီးပတၢ်ဖံးတၢ်မၤတဖၣ်သ့၀ဲဒၣ်လီၤႉ ဖဲလၢပဒိၣ်ထီၣ် ဒီးဒိၣ်တုာ်ခိၣ်ပှဲၤ လၢခရၠာစးံာ်အပူၤန့ၣ် ပတၢ်သးခုဘၣ်ဃး တၢ်အဲၣ်ပှၤလၢပဃၢၤ ကအါထီၣ်၀ဲ‚ ခီဖျိတၢ်နီၤဟ့ၣ် ပတၢ်ဘၣ်ဘျုးဘၣ်ဖှိၣ် လၢပဒိးန့ၢ်ဘၣ် လၢယွၤအတၢ်ကူးက့ၤတၤသၣ် လၢအပှဲၤလုၢ်ကွံာ်၀ဲန့ၣ်လီၤႉ