ဒဲနံၤယၢၣ် လံဘံတ့ၢ် စံး၀ဲ ‘‘လၢအပူၤကွံာ်ယဲၢ်နံၣ်အတီၢ်ပူၤ ပဒုးအိၣ်ထီၣ်တၢ်ကစီၣ်‚ တၢ်ဂ့ၢ်တၢ်ကျိၤအါမး‚ အါန့ၢ်ဒံး ပှၤကူပှၤကညီအတၢ်စံၣ်စိၤတဲစိၤလၢအပူၤကွံာ် ဒီးတၢ်ကစီၣ်တဖၣ်အံၤ ဟဲအိၣ်ထီၣ်ဒၣ်တဘိယူာ်ဃီလီၤႉ’’ အ၀ဲစံး၀ဲဒၣ်‚ လၢကျဲတဘိဘိအပူၤန့ၣ် ပစံးသ့လၢပတၢ်သးစဲအါတလၢ၀ဲဒၣ် လၢတၢ်လၢအထိၣ်ဟူးထိၣ်ဂဲၤပသး တဖၣ်န့ၣ်လီၤႉ တၢ်ကစီၣ်ဒီးတၢ်သ့ၣ်ညါနၢ်ပၢၢ်အါမး လၢအဟဲပၢၢ်ထီၣ် ကိးဆၢကိးကတီၢ်အံၤ ဒုးပှဲၤလုၢ်ကွံာ် ပသး သ့၀ဲဒၣ်န့ၣ်လီၤႉ တနံၤအံၤ တၢ်အိၣ်အသး လၢကမျၢၢ်တၢ်ဆဲးကျၢဆဲးကျိးလိာ်သးတၢ်ကစီၣ် ကျိၤကျဲတဖၣ် အိၣ်အါမး အကတီၢ်အံၤ ပကဃုထံၣ်န့ၢ် တၢ်ဆၢကတီၢ် လၢပကအိၣ်ဘရၣ်ဘှီၣ်‚ ဆိကမိၣ်ဒီး ထုကဖၣ်တၢ်အဂီၢ်န့ၣ် ကီခဲအါထီၣ်သပှၢ်ကတၢၢ်လီၤႉ
ထါစံးထီၣ်ပ့တၢၤ ၄၆း၁၀ စံး၀ဲ ‘‘အိၣ်ဃိကလာ် ဒီးသ့ၣ်ညါလၢယမ့ၢ်ယွၤ တက့ၢ်ႉလံာ်စီဆှံအံၤ ဒုးသ့ၣ်နီၣ်ထီၣ်ပှၤ လၢတၢ်လိၣ်လၢပကဟံးန့ၢ် တၢ်ဆၢကတီၢ် လၢပကဖှိၣ်ဃီၤပသး ဆူယွၤအအိၣ်န့ၣ်လီၤႉ ပှၤအါဒံအါဂၤ ထံၣ်န့ၢ်၀ဲဒၣ်လၢ ‘‘တၢ်အိၣ်ဘရၣ်အိၣ်ဘှီၣ်’’ အဆၢကတီၢ်အံၤ မ့ၢ်မုၢ်နံၤတနံၤအကတီၢ်တခါ လၢအကါဒိၣ်မး လၢပကဖး လံာ်စီဆှံ‚ ထုကဖၣ်‚ ဒီးဆိကမိၣ် ယွၤအတၢ်ဂ့ၤတၢ်၀ါ ဒီးအတၢ်ဒိၣ်မုၣ်တဖၣ်လီၤႉ
ဒ်ပှၤကွဲးထါစံးထီၣ်ပ့တၢၤ ၄၆ အသိး‚ ပမ့ၢ်လဲၤခီဖျိဘၣ် တၢ်မ့ၢ်တၢ်တီ နီၢ်နီၢ် လၢ ‘‘ယွၤမ့ၢ်ပတၢ်ပူၤဖျဲးအလီၢ် ဒီးပဂံၢ်ပဘါလီၤႉ လၢတၢ်မၤကိၢ်မၤဂီၤန့ၣ် ပှၤထံၣ် န့ၢ်အီၤ လၢတၢ်မၤစၢၤလီၤဆီဒၣ်တၢ်န့ၣ်လီၤ’’‚ ဒီးတၢ်မ့ၢ်တၢ်တီၤအံၤ ကမၤဟါမၢ်ကွံာ် ပတၢ်ပျံၤတၢ်ဖုးတဖၣ်‚ ကလဲလိာ်ကွံာ် ပတၢ်ဖှိၣ်ဃီၤပသး လၢဟီၣ်ခိၣ်တၢ်တၢထီၣ် တၢလီၤတဖၣ် ဆူယွၤအတၢ်ဃူတၢ်မုာ် ဒီးကဒုးအိၣ်ထီၣ် တၢ်နာ်ကျၢၤမူဆှု လၢပကစၢ်ပၢတၢ်န့ၣ်လီၤႉ
ပခိၣ်ပဃၢၤဟီၣ်ခိၣ်အံၤ မ့ၢ်သဘံၣ်ဘုၣ်ဆးကး‚ တအိၣ်ဘၣ်လီၢ်ဘၣ်ကျဲ ထဲလဲၣ်ထဲလဲၣ်ဘၣ်ဆၣ် ပထံၣ်န့ၢ် တၢ်ဘရၣ်တၢ်ဘှီၣ် ဒီးတၢ်ဂံၢ်တၢ်ဘါလၢမူခိၣ် ပပၢ် အတၢ်အဲၣ် ဒီးအစိကမီၤအပူၤသ့၀ဲဒၣ်လီၤႉ