ဖဲ ၂၀၁၁ နံၣ်အခါ လၢ ကီၢ်ယပၣ် ကလံၤစိးမုၢ်ထီၣ်န့ၣ် ဟီၣ်ခိၣ်ဟူး၀ဲအပတီၢ် အိၣ်၀ဲ နီၣ်ဂံၢ် ၉ န့ၣ်လီၤႉ ဒီးကဲထီၣ် ဆူၣ်နၣ်မံၣ်လပီ လၢအဟံးထီၣ်ကွံာ် ပှၤကညီအသးသမူ အဂၤ ၁၉‚၀၀၀ ဃၣ်ဃၣ်ဒီး မၤဟးဂီၤကွံာ် ဟံၣ်ဒူၣ်အဖျၢၣ်၂၃၀‚၀၀၀ ညါန့ၣ်လီၤႉတၢ်ဘၣ်ဒိဘၣ်ထံးဖးဒိၣ်အံၤ၀ံၤအလီၢ်ခံန့ၣ် နိၣ်စိၢ်မံၣ် တၢ်ဟူးတၢ်ဂဲၤ လၢအဒုးကဲ ထီၣ် တၢ်အခီပညီ လၢယပၣ်ကျိာ် မ့ၢ်၀ဲ ‘‘တၢ်မုၢ်လၢ်’’ အိၣ်ဟဲကဲထီၣ်၀ဲ ဒ်သိးကပၢၤဃာ် အစ့ဟဲနုာ်‚ ပခိၣ်ပဃၢၤ‚ပှၤကညီသူးသ့ၣ် ဒီးတၢ်မုၢ်လၢ် လၢယွၤ လၢကတဲာ်ကတီၤ တၢ်တဂၤအပူၤန့ၣ်လီၤႉ
နိၣ်စိၢ်မံၣ် ပိာ်မုၣ်တဖၣ် ဃုထံၣ်၀ဲ ဟံၣ်လီၤပှီၢ် အက့အခီတဖၣ်၀ံၤဒီး ဆီတလဲက့ၤ၀ဲဆူ တၢ်စုသ့မၤကယၢကယဲ ဃံလၤလုၢ်ပရၤဒိၣ်အသိးန့ၣ်လီၤႉ ဒီးတၢ် ကယၢကယဲဃံလၤတဖၣ်အံၤ ဘၣ်တၢ်ဆါလီၤအီၤ ဆူ ဟီၣ်ခိၣ်ဒီဘ့ၣ် ဒီးဘၣ်တၢ်ကတဲာ်ကတီၤအီၤ လၢပိာ်မုၣ် တဖၣ် အသးသမူအတၢ်လိၣ်ဘၣ်အဂီၢ် လၢအ၀ဲသ့ၣ် ရၠာစးၤလီၤ တၢ်စူၢ်က့ၤနာ်က့ၤ ကစၢ်ခရၠာစးံာ်အဂ့ၢ်န့ၣ်လီၤႉ
လၢလံာ်စီဆှံအသီတ့တူၢ်အဆၢကတီၢ်အခါန့ၣ် ပှၤညီနုၢ်ပာ်ခူသူၣ် တၢ်လုၢ်ဒိၣ်ပရၤဒိၣ်တဖၣ် လၢသပၢၤဟီၣ်ခိၣ်အပူၤန့ၣ်လီၤႉ စီၤပီလူး ပာ်ဖျါထီၣ်၀ဲ တၢ်သးခုကစီၣ် အိၣ်လၢပှၤဟီၣ်ခိၣ်ဖိ လၢအပှဲၤဒီးတၢ်ဂံၢ်စၢ်ဘါစၢ် လၢအပိာ် ကစၢ်ခရၠာစးံာ်အခံတဖၣ်အပူၤန့ၣ် လုၢ်ဒိၣ်ပရၤဒိၣ် ဆံးအါလဲၣ်န့ၣ်လီၤ (၂ ကရၠာစးံၣ် ၄း၇) ႉ ဒီးအ၀ဲဟ့ၣ်ကူၣ်၀ဲတၢ်တစဲးဖိ – ဒီးပတၢ်အိၣ်မူအက့အခီတဖၣ်န့ၣ် ဒုးဖျါထီၣ် ကစၢ်ယွၤအစိကမီၤ လၢအထီဒါ ပတၢ်တလၢတပှဲၤတဖၣ်သ့၀ဲလီၤႉ
ဖဲလၢကစၢ်ယွၤဟဲအိၣ် လၢပတၢ်အိၣ်မူ လၢအတၢ်ကၢ်မုၢ်ကၢ်ဘျဲး ဒီး တလၢတပှဲၤအပူၤန့ၣ် တၢ်မုၢ်လၢ် လၢအမၤဘျါက့ၤ တၢ်အစိကမီၤအံၤ အိၣ်ဖျါ၀ဲဆူ ပှၤကညီအမဲာ်ညါလီၤႉ မ့ၢ်လီၤႉ အ၀ဲအတၢ်ဘှီဂ့ၤထီၣ်တၢ်မၤန့ၣ် အိၣ်လၢပသးပူၤ ဒီးဒုးဟးထီၣ်ကွံာ်တၢ်ဆူးတၢ်ဆါ လၢအပူၤခဲလၢာ်လီၤႉ တၢ်အံၤ ကမ့ၢ်၀ဲ တၢ်လၢ အဒုးဖျါထီၣ် ယွၤအက့ၢ်အဂီၤကံၢ်စီသူးသ့ၣ် ဆူပှၤဂၤလၢပပူၤန့ၣ်လီၤႉ