လၢတၢ်ဟဲက့ၤဆူဟံၣ် ယံာ်ခံနၣ်ရၠာစးံၣ်လၢကျဲလိၤအကတီၢ် ဖဲပဟဲက့ၤလၢ ဒူၣ်ဖိထၢဖိတဒူၣ်အတၢ်ဖျီန့ၣ်‚ ယမိၢ်သံကွၢ်ယၤကဒီးသၢဘျီတဘျီလၢ လၢယတၢ်မၤ အပူၤ တၢ်အသီမနုၤအိၣ်လဲၣ်အဂ့ၢ်လီၤႉ ယတဲနၢ်ပၢၢ်က့ၤကဒီးအီၤ တၢ်ဂ့ၢ်အလီၤတံၢ် လီၤဆဲး ဒ်ယတဲတ့ၢ်အီၤ လၢအခီၣ်ထံးတဘျီအသိး ဒီးတဘျီဃီ ယဆိကမိၣ်ထီၣ်လၢဒ်သိးယမိၢ်တိၢ်နီၣ် ယတၢ်ကတိၤအဖျၢၣ်တဖၣ် ကန့ၢ်ဂ့ၤ အါထီၣ်အဂီၢ် မ့ၢ်ယမၤကသ့ဒ်လဲၣ်လီၤႉ ယမိၢ်ဒိးန့ၢ် တၢ်ဆါတမံၤ လၢပကိးအီၤ လၢအဲၣ်လ်စါမါ ဒီးမ့ၢ်တၢ်ဆါ တကလုာ် လၢအမၤဟးဂီၤ ပခိၣ်နူာ်အတၢ်တိၢ်နီၣ် တၢ်အဂ့ၢ်တၢ်အကျိၤတဖၣ်တဆီဘၣ်တဆီ ဒီးမၤဘၣ်ဒိ ပတၢ်အိၣ်တၢ်ဆိး‚ ပတၢ်ဟူးတၢ်ဂဲၤသ့၀ဲ ဒီးလၢခံကတၢၢ်န့ၣ် ပကတိၤတၢ်တသ့လၢၤဘၣ်‚ ဒီးတၢ်အဂုၤအဂၤအါမးဒံးလီၤႉ
ယသးအုးလၢယမိၢ်ဒိးန့ၢ်တၢ်ဆါအံၤအဃိ‚ ဘၣ်ဆၣ်ယအိၣ်ဒီးတၢ်သးခု လၢအ၀ဲအိၣ်မူဒံးဒီး‚ ပအိၣ်ဘၣ်ဒံး ဒ်သိးသိးအဃိ‚ ဒီးပကတိၤတၢ်သ့ဒံးအဃိလီၤႉ တဘျီ လၢ်လၢ် ဖဲယလဲၤထံၣ်အီၤန့ၣ် ယအိၣ်ဒီးတၢ်သးမုာ်ဖးဒိၣ်မ့ၢ်လၢယမိၢ်အမဲာ်ကပီၤမး အိၣ်ပှဲၤဒီးတၢ်သးခု ဒီးတဲဖျါစ့ၢ်ကီး၀ဲ ‘‘အဲလ်စၢၣ်ဧၢ‚ မ့ၢ်တၢ်ကမၢကမၣ်လၢအလီၤ သးမုာ်ဆံးဒိၣ်လဲၣ်’’ ပသးခုလၢ ပမၤတံၤမၤသကိးလိာ်ဘၣ်ပသး‚ ပတၢ်ကတိၤတဖၣ် မ့ၢ်တအိၣ်ဒီး တၢ်ဘရၣ်တၢ်ဘီှၣ် ဘၣ်ဆၣ်ပအိၣ်လၢ တၢ်သးတဖျၢၣ်ဃီသ့၀ဲန့ၣ်လီၤႉ
တၢ်မၤအသးအံၤ ကမ့ၢ်သ့ၣ်သ့ၣ် တၢ်ဂီၤဆံးဖိတခါ လၢအပာ်ဖျါကစၢ်ယွၤဒီး ပှၤ ပတၢ်ဘၣ်ထွဲလိာ်သးန့ၣ်လီၤႉ လံာ်စီဆှံစံးပှၤလၢ ‘ယွၤအဲၣ်ဒိးပှၤလၢအပျံၤအီၤ‚ ပှၤလၢအကွၢ်လၢ်အဘျုးအဖှိၣ်အကျဲလီၤ’ (စံး ၁၄၇း၁၁) ႉ ကစၢ်ယွၤကိးပှၤလၢ အစူၢ်နာ် ယ့ၣ်။း ဒ်အတၢ်အုၣ်ခီၣ်ကစၢ်အသိးတဖၣ် လၢ အဖိလီၤ (ယိၤ ၁း၁၂) ႉ ပမ့ၢ်ဃ့ထီၣ် တၢ်တမံၤန့ၣ်တဘျီ၀ံၤတဘျီမ့ၢ်ဂ့ၤ‚ ပတၢ်ကတိၤအဖျၢၣ်မ့ၢ်တအိၣ်ဘၣ်မ့ၢ်ဂ့ၤ‚ အ၀ဲဒၣ် ၀ံသးစူၤပှၤ‚ အဂ့ၢ်ဒ်အံၤ‚ အ၀ဲအဲၣ်ဒိးရၠာစး့လိာ်ဘၣ်ထွဲဒီးပှၤအဃိလီၤႉ အ၀ဲအသးခု ဖဲပကတိၤတၢ်ဒီးအီၤလၢ တၢ်ထုကဖၣ်န့ၣ်လီၤႉ ပတၢ်ကတိၤအဖျၢၣ်တဖၣ် မ့ၢ်တအိၣ်အခါဒၣ်လဲာ်လီၤႉ