ယိၣ်-ယိၣ် မၣ် (Yo-Yo Ma) မ့ၢ်ပှၤအမံၤဟူသၣ်ဖျါလၢ ထံကီၢ်အါဘ့ၣ်, လၢအဖူးသံကျံ သီတူၢ်ခၠဲလိၣ် (cello) တဂၤ, ဟဲဆဲးဝဲဒၣ် ကိဘ့း ၁၉ တၢ်ဆါအၢ အကသံၣ်ဒီတဒၢ, ဖဲဝ့ၢ် ဘးရှဲယၤ (Berkshire), လၢ မဲးစဲၣ်ခၠူးဆဲး (Massachusetts) ကီၢ်စဲၣ်န့ၣ်ဝံၤ, ဖူးသံကျံ ဒုးနဲၣ်ဝဲဒၣ် ရှူဘၢး (Schubert) အတၢ်သးဝံၣ် “အါဘ့ၣ်-မၣ်ရံယၣ်” (Ave Maria) လၢသီတူၢ်အကလုၢ်န့ၣ် အိၣ်ဟဲသီၣ်ထီၣ်ဝဲလၢ ပှၤတဆိကမိၣ်တၢ်အလီၢ်အကျဲ, ဖဲပှၤဟဲဆဲးကသံၣ်ဒီတဒၢ အတၢ်ဆါဟံၣ်ဆံးဖိန့ၣ်လီၤ. အဝဲအဲၣ်ဒိး ဟ့ၣ်ခီနီၤလီၤ တၢ်သးဝံၣ်ဖိတယုၢ်လၢ အမၤမုာ်ထီၣ်က့ၤအသးန့ၣ်လီၤ.

ဖဲတၢ်ဘၣ်ယိၣ်ဘၣ်ဘီ, ဒီးတၢ်နးတၢ်ဖှီၣ်အကတီၢ်, လံာ်စီဆှံ အတၢ်ဒုးနဲၣ်ဟ့ၣ်ဒိတဖၣ် ဒုးသ့ၣ်နီၣ်ထီၣ်ပှၤလၢ တၢ်သံကျံသူၣ်ဝံၣ်သးဆၢတၢ်န့ၣ် မ့ၢ်တၢ်လၢအအိၣ်ဒီးအစိအကမီၤအဂ့ၢ်န့ၣ်လီၤ. လံာ် ၁ ရှမူၤအ့လး ၁၆ ပာ်ဖျါဝဲလၢ “စီၤဒၤဝံး ဟံးန့ၢ်တနၢ်တဆိ, ဒီးဒ့တၢ်လၢအစု, ဒီးစီၤစီလူးအသးမုာ်ထီၣ်က့ၤ” (:၂၃) ဝဲဒၣ်န့ၣ်လီၤ. ဒီးလၢလံာ်မၤတၢ်အပူၤန့ၣ် ပကဖးဘၣ် စီၤပီလူးဒီးစီၤစံလၤအဂ့ၢ်န့ၣ်လီၤ. မ့ၢ်လၢအဝဲသ့ၣ် စံၣ်တဲၤတဲလီၤဝဲ ကစၢ်ယ့ၣ်ရှူး အတၢ်သးခုကစီၣ်အဂ့ၢ်အဃိ, ပှၤဖီၣ်ဒိတီၢ် စီၤပီလူးဒီးစီၤစံလၤ, “ဒီးဒၢနုာ်ဝဲလၢဃိာ်ပူၤ” (:၂၃) န့ၣ်လီၤ. လၢဃိာ်ပူၤတၢ်ခံးကျါန့ၣ် စီၤပီလူးဒီးစီၤစံလၤ တူၢ်ဘၣ်ခီၣ်ဘၣ်ဝဲ တၢ်နးတၢ်ဖှီၣ်အကတီၢ်, “ဘါထုကဖၣ်တၢ်, ဒီးသးဝံၣ်သးဆၢယွၤ” (:၂၅) န့ၣ်လီၤ. တၢ်လၢအလီၤသးစဲတမံၤန့ၣ် လံာ်စီဆှံ ပာ်ဖျါဝဲဒၣ်လၢ ပှၤဃိာ်ဖိတဖၣ် ဒိကနၣ် အဝဲသ့ၣ်သးဝံၣ်စံးထီၣ်ပတြၢၤယွၤအဂ့ၢ်န့ၣ်လီၤ.

ဖဲအဝဲသ့ၣ်ဘါထုတဖၣ်တၢ်, ဒီးသးဝံၣ်စံးထီၣ်ပတြၢၤယွၤအကတီၢ်, သးအတၢ်ဃူတၢ်ဖိး လၢကစၢ်ယွၤန့ၣ် ဖျါအိၣ်ဆိးဝဲဒၣ်လၢ စီၤပီလူးဒီးစီၤစံလၤခံဂၤ အတၢ်အိၣ်အသးအပူၤန့ၣ်လီၤ. ဒီးတၢ်အစၢ ဟဲထီၣ်ဝဲလၢ ကစၢ်ယွၤ အစိကမီၤ လီၣ်ဖျါထီၣ်အသးလၢ တၢ်ဂံၢ်ဆူၣ်ဘါဆူၣ်အကျိၤအကျဲ (:၂၆), ဒီးထိၣ်ဟူးထိၣ်ဂဲၤထီၣ် ဃိာ်ဒိၣ်, ဒ်သိးကဃုထံၣ်န့ၢ်ဝဲဒၣ် “တၢ်အုၣ်က့ၤခီၣ်က့ၤ” (:၃၀) အဂီၢ်န့ၣ်လီၤ.

ပမ့ၢ်ဟ့ၣ်လီၤအးလီၤ ပတၢ်ပျံၤတၢ်ဖုးတဖၣ်ဆူ ကစၢ်ယွၤအစုပူၤ, ခီဖျိတၢ်ထုကဖၣ်, ဒီးတၢ်သးဝံၣ် စံးထီၣ်ပတြၢၤတဖၣ်အပူၤန့ၣ် ကမ့ၢ်ပကွဲမုာ်ဝဲဒၣ် ကစၢ်ယွၤအသးအတၢ်ဃူတၢ်ဖိး လၢပတၢ်အိၣ်မူအပူၤ, ဒီးကကဲထီၣ် ကျိၤကျဲလၢကမၤဂ့ၤမၤဘျုး ပှၤအိၣ်ဆိးလၢ ပခိၣ်ပဃၢၤတဖၣ်အဂီၢ်န့ၣ်လီၤ.