လၢတၢ်သးတမုာ်တလၤအပူၤန့ၣ် မဲ(န)ဒံၢ် (Mandy) ပာ်လီၤဝဲ အကွဲၤဒီနၢ်န့ၣ်လီၤ. အမိၢ် ကိးအီၤ, ဒီးဒုးသ့ၣ်ညါအီၤလၢ ဘၣ်သ့ၣ်သ့ၣ်, အပၢ်န့ၣ် တမ့ၢ်လၢအတၢ်မၤကအိၣ်လၢၤဘၣ်အဃိ, ဟံၣ်ဃီ အတၢ်လၢာ်ဘူၣ်လၢာ်စ့ၤသ့ၣ်တဖၣ်အဂီၢ်န့ၣ် အဝဲသ့ၣ် ကဘၣ်ပာ်ဂံၢ်ပာ်ဘါ ဝဲဒၣ် Mandy တဂၤဧိၤန့ၣ်လီၤ. မဲ(န)ဒံၢ် အသးကလၢၢ်ဘၣ်ဝဲ တၢ်ဝံတၢ်ယိးနးနးကျံၤကျံၤ လၢအကဘၣ်လုၢ်အီၣ်လုၢ်အီ အဟံၣ်ဖိဃီဖိအဂီၢ်န့ၣ်လီၤ. အဝဲအိၣ်ဒီးတၢ်ဖံးတၢ်မၤ, လၢအဒိးန့ၢ်လါလဲ လၢခီၣ်မံးရှၢၣ် (Commission) န့ၣ်လီၤ. အဝဲပတံထီၣ် တၢ်ဖံးတၢ်မၤလၢအကဒိးန့ၢ် လါလဲအဂၢၢ်အကျၢၤဘၣ်ဆၣ်, တဒိးန့ၢ်ဝဲ တၢ်ဖံးတၢ်မၤ နီတခါဘၣ်န့ၣ်လီၤ.
Mandy အုၣ်အသးလၢ “ယတၢ်လိၣ်တဖၣ်န့ၣ် ယဟ့ၣ်လီၤအးလီၤဆူ ကစၢ်ယွၤအစုပူၤဝံၤ, ယအိၣ်မူအိၣ်ဂဲၤယဲဆူညါ, ဒ်ညီနုၢ်အသိးန့ၣ်လီၤ. ဖဲယဟံးန့ၢ်သကိး မုၢ်ထူၣ် တၢ်အီၣ် ဒီးယတံၤသကိးန့ၣ်ဒီး, ယတဆိကမိၣ်ယဲလၢ ယကဒိးန့ၢ်တၢ်ဖံးတၢ်မၤအခွဲးယာ် လၢယဂီၢ်ဘၣ်န့ၣ်လီၤ. မ့ၢ်လၢ ကစၢ်ယွၤ ကတဲာ်ကတီၤန့ၢ်ယၤအဃိ, ယဒိးန့ၢ်ဝဲဒၣ် တၢ်မၤ န့ၣ်လီၤ.”
တၢ်အစၢလၢ ပမုၢ်လၢ်ကွၢ်စိတ့ၢ်ဝဲန့ၣ်, ဒ် ကစၢ်ယွၤ ကတဲာ်ကတီၤန့ၢ်ဝဲလၢ Mandy အဂီၢ်အသိး, တစံးဆၢပှၤ ထီဘိဘၣ်. ဘၣ်ဆၣ်, ကစၢ်ယွၤ လၢအသ့ၣ်ညါပတၢ်လိၣ်တဖၣ်, ဒီးကတဲာ်ကတီၤန့ၢ်ပှၤတၢ်တဂၤအပူၤန့ၣ် ပပာ်ပသးမုာ်မုာ် သ့ဝဲဒၣ်န့ၣ်လီၤ. ထါစံးထီၣ်ပတြၢၤ အယုၢ် ၁၁၁ ဒုးသ့ၣ်နီၣ်ပှၤလၢ ပကစၢ်ယွၤ, မ့ၢ်ကစၢ်လၢ “သးကညီၤတၢ်, ဒီးသးအိၣ်တၢ်” တဂၤအဂ့ၢ်န့ၣ်လီၤ. ကစၢ်ယွၤ မုာ်လၤသးခုဝဲဒၣ်လၢ ကဒုးနဲၣ်ပာ်ဖျါထီၣ် အတၢ်သူၣ်ကညီၤ သးကညီၤ, ဒီးအဲၣ်ဘၣ်ပှၤဒိၣ်ဒိၣ်ယိာ်ယိာ်န့ၣ်လီၤ. ဒ်သိး ကစၢ်ယွၤ ကနုာ်လီၤမၤတၢ် လၢပဂီၢ်, ဒ်သိးပသးကကလၢၢ်ဘၣ်တပယုာ်ဃီလၢ အဝဲကတဲာ်ကတီၤန့ၢ်ပှၤ, ကဟုကယာ်ပှၤအဂီၢ်, အတၢ်အဲၣ်တၢ်သးကညီၤပှၤန့ၣ် ထိၣ်ဟူးထိၣ်ဂဲၤအီၤထီဘိ (စံး ၁၁၁:၅) န့ၣ်လီၤ.
မ့ၢ်နသးတမုာ်တလၤဘၣ်ဧါ. နသးဘၣ်တံာ်တာ်နဲလၢ နတၢ်အိၣ်အသးမၤအသးတဖၣ်အဃိန့ၣ်ဧါ. ကစၢ်ယွၤအနီၢ်ကစၢ်ဒၣ်ဝဲ အသူၣ်အိၣ်အသးအိၣ်နၤန့ၣ် သ့ၣ်နီၣ်ထီၣ် က့ၤနဲတက့ၢ်. နနီၢ်ကစၢ် အတၢ်လိၣ်, ဒီးစုလီၢ်ခီၣ်ခိၣ် အတၢ်လိၣ်နီၢ်နီၢ်တဖၣ်န့ၣ် ကစၢ်ယွၤ ကဟ့ၣ်လီၤမၤလၢပှဲၤန့ၢ်ဝဲဒၣ်နၤန့ၣ်လီၤ. နကစၢ်ယွၤ လၢအတီဝဲလိၤဝဲ, ပၢ်လၢအဟ့ၣ်လီၤဒီး, မၤလၢပှဲၤတၢ်တဂၤန့ၣ် နနာ်သန့ၤအီၤသ့ဝဲဒၣ်န့ၣ်လီၤ. ကစၢ်ယွၤ ကအိၣ်ဒီးနၤလၢမုၢ်မဆါတနံၤအံၤ, ခဲမုၢ်ဆ့ၣ်, ခဲဂီၤ, ဒီးအစိၤစိၤအဃၣ်ဃၣ်န့ၣ်လီၤ.