ဖဲ တၢ်ဟုၣ်န့ၢ် မဲး ဝ့ၣ်လယၢၣ် (Matt Williams) အလံၥ်စီဆှံလၢ အပၥ်ဝဲဒၣ် လၢသိလ့ၣ်အလီၢ်ခံတဘ့ၣ်န့ၣ် လၢလံာ်စီဆှံအကုပူၤန့ၣ် မ့ၢ်လၢအတၢ်ဂီၤလုၢ်ဒိၣ်ပှ့ၤဒိၣ်တဖၣ် အိၣ်ဝဲဒၣ်အဃိ, အဝဲဘၣ်ယိၣ်ဝဲလၢ တထံၣ်န့ၢ်က့ၤလၢၤအလံာ်စီဆှံန့ၣ်လီၤ. လၢတၢ်န့ၣ်အဃိ, အဝဲဃ့ဘါထုကဖၣ်တၢ်ဖုၣ်ကိၥ်, “ကစၢ်ယွၤဧၢ, တၢ်မၤအသးအံၤ မၤဘၣ်ဒိယသးန့ၣ်လီၤ. လၢယဂီၢ်, တၢ်လၢအအိၣ်ဒီးအခီပညီတဖၣ်အါမံၤန့ၣ် အိၣ်ဝဲလၢလံာ်စီဆှံတဘ့ၣ်အံၤအပူၤအဃိ, ယအဲၣ်ဒိး ဃုထံၣ်န့ၢ်က့ၤအီၤန့ၣ်လီၤ. ဘၣ်ဆၣ်, ဒ်နစံးတ့ၢ်နဲထီဘိအသိး, တမ့ၢ်ဒ် တၢ်ဘၣ်ယသးအသိးဘၣ်. မ့မ့ၢ်ဖဲဒၣ်နသး” န့ၣ်လီၤ. ထဲဒၣ်စှၤနံၤစှၤသီဖိလဲၤပူၤကွံာ်ဝံၤ, လၢတၢ်တဆိကမိၣ်အပူၤန့ၣ် Williams ဃုထံၣ်သ့ၣ်ညါဝဲဒၣ် သိလ့ၣ်လၢအဘၣ်တၢ်ဟုၣ်န့ၢ်အီၤတခိၣ်အပူၤန့ၣ် တၢ်ထံၣ်န့ၢ်က့ၤ အလံၥ်စီဆှံအဂ့ၢ်, ခီဖျိလၢတၢ်ရ့လိၥ်ဘၣ်ထွဲအပှာ်ဘျးစဲအ့ထၢၣ်နဲးအပူၤန့ၣ်လီၤ. အလံၥ်စီဆှံ, ဒီးသိလ့ၣ် အကစၢ်အလံၥ်စီဆှံန့ၣ် တၢ်ပၥ်သဃဲၤအီၤ ဖဲပှၤဒိးသိလ့ၣ်အလီၢ်န့ၣ်လီၤ. Williams မၤန့ၢ်က့ၤဝဲ တၢ်လၢအပာ်လုၢ်ပာ်ပှ့ၤဝဲဒိၣ်မးတမံၤန့ၣ် ကဟဲကဲထီၣ်လိၢ်ထီၣ်အဂီၢ်တညီဘၣ်ဆၣ်, ကစၢ်ယွၤ စံးဆၢ အတၢ်ထုကဖၣ်န့ၣ်လီၤ.

၂ စီၤပၤ ၆:၁-၇ အပူၤန့ၣ် ပဖးဘၣ်ဃး ဝံအလံၤရှါ ဘၣ်ကွၢ်ဆၢၣ်မဲာ်ဒီးတၢ်လၢအဖျါကဲထီၣ်အသးတသ့တမံၤန့ၣ်လီၤ. ဒ်သိးကတ့ထီၣ် တၢ်သူၣ်ထီၣ်ဘျီၣ်ရိဖှိၣ်ဖးဒိၣ်အဂီၢ်, ဝံအလံၤရှါဒီးဝံအကရူၢ်တဖု လဲၤကူာ်လီၤသ့ၣ်လၢထံကျိယၢ်ဒ့ၣ်အကပၤန့ၣ်လီၤ. ဝံအကျါတဂၤန့ၣ် ကူာ်လီၤသ့ၣ်တကျီၣ်အကတီၢ်, “အကွါအကနၣ်လီၤတဲၥ်လၢထံကျါ, ဒီးစံးဝဲဒၣ်, အၣ်လါ, ကစၢ်ဧၢ, မ့ၢ်ယလိၢ်အီၤ” (:၅) န့ၣ်လီၤ. လၢတၢ်သူၣ်ကိၢ်သးဂီၤ အပူၤန့ၣ် ဝံတဂၤအံၤ ဒုးနဲၣ်ဝဲဒၣ် ဝံအလံၤရှါလၢ အကွါအကနၣ်လီၤတဲၥ်အလီၢ် န့ၣ်လီၤ. ဒီးဝံအလံၤရှါ “ဖဲးန့ၢ်သ့ၣ်တဘိ, ဒီးတ့ၢ်လီၤဖဲန့ၣ်, ဒီးထးထီၣ်ဖီဝဲ” (:၆) န့ၣ်လီၤ. လၢတၢ်လီၤလိၢ်လီၤလးအပူၤန့ၣ် ဝံတဂၤအံၤ ဒိးန့ၢ်က့ၤဝဲ အတၢ်ပိးတၢ်လီလုၢ်ဒိၣ်ပှ့ၤဒိၣ် လၢအလီၤမၢ်တမံၤန့ၣ်လီၤ.

ပဘၣ်ယိၣ်တၢ်အလီၢ်တအိၣ်နီတမံၤလၢ ပကဒုးသ့ၣ်ညါ ကစၢ်ယွၤလၢ တၢ်ဂ့ၢ်အဆံး, (မ့) တၢ်အလုၢ်အပှ့ၤအဆံး, ခီဖျိလၢပတၢ်ထုကဖၣ်န့ၣ်ဘၣ်. ကယဲၢ်တၢ်အိၣ်အသးတမံၤလၢ်လၢ်အပူၤန့ၣ် ပဃ့တၢ်မၤစၢၤလၢ ကစၢ်ယွၤအအိၣ် ခီဖျိလၢတၢ်ထုကဖၣ်န့ၣ် သ့ဝဲ, ဒီးလၢပတဆိကမိၣ်, လၢပတမုၢ်လၢ်တၢ်ကျိၤကျဲအပူၤန့ၣ် ကစၢ်ယွၤ ကစံးဆၢပတၢ်ထုကဖၣ်သ့ၣ်တဖၣ်န့ၣ်လီၤ.