ပလဲၤထီၣ် နံၣ်ပီ (Nepal) အကစၢၢ်အါနံၤအါသီအတၢ်လဲၤအဆၢကတီၢ်, မ့ၢ်လၢတၢ်ဟဲစူၤလီၤအဃိ, တၢ်ဟဲခုၣ်အါထီၣ်ဝဲဒၣ်န့ၣ်လီၤ. ပအိၣ်ဟးထီၣ်လၢ ကစၢၢ်ခိၣ်အတၢ်အိၣ်ဆိးလီၢ်လၢအလၢၤ, ဒီးပကဘၣ်လဲၤ တၢ်လဲၤကျဲလၢအခုၣ်ဒိၣ်ထီၣ် ကိးမုၢ်ဂီၤဒဲးန့ၣ် ကီခဲထီၣ်တပတီၢ်ဘၣ်တပတီၢ်န့ၣ်လီၤ. ပှၤလၢအနဲၣ်ဆှၢပကျဲန့ၣ် စံးဘၣ်တဲဘၣ်ပှၤသပှၢ်ပှၢ်လၢ “မ်ပကလဲၤသကိး. ပကအိၣ်ခိးလၢမူခိၣ်ကလံၤသီၣ်ဂီၤကမုာ်ထီၣ်အဂီၢ်န့ၣ် တသ့ဘၣ်. တဘၣ်ကိၢ်တဂ့ၤ, ယကအိၣ်ဒီးသုန့ၣ်လီၤ.”

တၢ်လဲၤတၢ်က့ၤလၢ တၢ်စူၤကျါ, ဒီးဘှ့ၣ်ပစီၤတဖၣ်အကျါန့ၣ် ယသးတူၢ်ဘၣ်ယဲ တၢ်တမုာ်တလၤဒိၣ်မးန့ၣ်လီၤ. ဖျါဝဲဒၣ် ဒ်ပတၢ်လဲၤန့ၣ် အခီပညီတအိၣ်ဘၣ်အသိး န့ၣ်လီၤ. ပတထံၣ်တၢ်နီတမံၤဘၣ်. ဘၣ်ဆၣ်, နၣ်ရံၣ်အါမးလဲၤပူၤကွံာ်ဝံၤန့ၣ်ဒီး, မူခိၣ်ဖျါကဆှီထီၣ်, ဒီးကစၢၢ်ခိၣ်ထိး ဟဲအိၣ်ဖျါထီၣ်ဝဲလၢ တၢ်လီၢ်အယံၤန့ၣ်လီၤ. ပမ့ၢ်အိၣ်တ့ၢ် ဝဲဒၣ်လၢ ကစၢၢ်ခိၣ်အတၢ်အိၣ်ဆိးလီၢ်န့ၣ်ဒီး, တမ့ၢ်လၢပကထံၣ်ဘၣ် တၢ်ကွၢ်ကီလီၢ်အဃံအလၤတဖၣ်ဘၣ်န့ၣ်လီၤ.

လံာ် ၁ မိၤရှ့ ၁၂:၁ အပူၤန့ၣ် ကစၢ်ယွၤ စံးဘၣ်တဲဘၣ် စီၤအၤဘြၣ် “ဟးထီၣ်နဲလၢ နထံနကီၢ်ဒီးလၢနဘူးနတံၢ်အအိၣ်ဒီး, လၢနပၢ်အဟံၣ်ဆူ ကီၢ်တဘ့ၣ်လၢ ယကဒုးနဲၣ်နၤတက့ၢ်,” ဒ်သိးကလဲၤဝဲဒၣ်ဆူ ကီၢ်ကနၤဧၣ်န့ၣ်လီၤ. အကတီၢ်ဖဲန့ၣ် စီၤအၤဘြၣ်အဂီၢ်, ခါဆူညါတၢ်လီၤတံၢ်လီၤဆဲးတအိၣ်ဝဲဒၣ်နီတမံၤဘၣ်. တၢ်လၢစီၤအၤဘြၣ်ထံၣ်ဝဲဒၣ်န့ၣ် အတၢ်လဲၤဖးယံာ်ဖးထီ, လၢာ်ဂံၢ်လၢာ်ဘါ, ကဘၣ်လဲၤခီဖျိ ထံကီၢ်လၢ အတညီနုၢ်ဒီးအီၤတဖၣ်, တၢ်လီၢ်တၢ်ကျဲလၢ ပှၤတတူၢ်လိာ်မုာ်အဝဲသ့ၣ်, ဒီးဒုၣ်ဒါတဖၣ် အိၣ်ခိးပာ်ဝဲဒၣ်န့ၣ်လီၤ. လၢစီၤအၤဘြၣ်အဂီၢ်, တၢ်အုၣ်ကီၤ အိၣ်ဝဲဒၣ်ထဲတမံၤဧိၤန့ၣ် ယွၤ ကအိၣ်ဒီးအီၤ, ဒီးအၢၣ်လီၤအီလီၤအီၤလၢ ကကဲထီၣ် “ပှၤတကလုာ်ဖးဒိၣ်” (:၂) န့ၣ်လီၤ. “စီၤအၤဘြၣ်ဟးထီၣ်ဝဲ ဒ်ယွၤမၤလိာ်အီၤအသိး” (:၄) န့ၣ်လီၤ. ထဲဒၣ်အါနံၣ်အါလါလဲၤပူၤကွံာ်ဝံၤန့ၣ်မး, ကထံၣ်ဘၣ်ဝဲလၢ ယွၤမၤလၢပှဲၤ အတၢ်အၢၣ်လီၤအီလီၤန့ၣ်လီၤ.

ဘၣ်တဘျီဘျီန့ၣ် ယွၤ ကိးထီၣ်ပှၤ ဒ်သိးပကမၤ တၢ်မၤလၢအတၤပှၤ, တၢ်မၤယွၤ အတၢ်မၤ, (မ့) တၢ်မၤတဖၣ် ဖျါလၢအဘျုးတအိၣ်ဝဲလၢပဂီၢ်ဘၣ်န့ၣ်လီၤ. ဘၣ်ဆၣ်, ကစၢ်ယွၤ မၤစၢၤပှၤ ဒ်သိးပကနာ်သန့ၤအီၤ, ဒီးပကစးထီၣ်လဲၤတၢ်ဒီးအီၤ, လၢတၢ်နာ် အပူၤအဂီၢ်န့ၣ် အဝဲအိၣ်ဒီးပှၤထီဘိန့ၣ်လီၤ. ဖဲပစးထီၣ်လဲၤသကိးတၢ်ဒီးယွၤန့ၣ်ဒီး, အဝဲကလဲၤတၢ်ဒီးပှၤန့ၣ်လီၤ.