တၢ်ဂီၤမူလၢအဒုးနဲၣ်ဝဲဒၣ် ပှၤဒူပှၤဃိၤ, လၢအသးစၢၢ်ဆၢမၤ တၢ်ဒုးထီဒါ တၢ်အၢတၢ်သီတဖၣ် (crime) န့ၣ် ဖျါလၢအဘၣ်ဂဲၤလိာ် ဒုးတၢ်ဒီးတၢ်ဒုးတၢ်ယၤလၢ ကမၤနၢၤဝဲဒၣ် တန့ၢ်တသ့ဘၣ်န့ၣ်လီၤ. ဝ့ၢ်လၢအအိၣ်ဝဲဆိးဝဲန့ၣ် တမ့ၢ်ထဲလၢ အအိၣ်ပှဲၤဝဲဒီးတၢ်မၤဆူၣ်မၤစိးတၢ်တဖၣ်, ဒီးတၢ်ဟုၣ်တၢ်ဘျၣ်တဖၣ်န့ၣ်ဘၣ်. မ့မ့ၢ်, အဝဲဃုထံၣ်သ့ၣ်ညါ စ့ၢ်ကီးဝဲလၢ ပၢၤကီၢ်တဖၣ်, တၢ်စံၣ်ညီၣ်အကျိၤကျဲတဖၣ်, ဒီးခိၣ်နၢ်ပှၤဘၣ်မူဘၣ်ဒါတဖၣ်န့ၣ် ဟံးန့ၢ် ခိၣ်ဖးလာ်ဆိၣ်, ဒီးအီၣ်ကဘျံးကဘျၣ်တၢ်န့ၣ်လီၤ. ဒ်သိးကဆိကတီၢ်, ပာ်တ့ၢ်ကွံာ်အတၢ်မၤ, ဒီးဟးထီၣ်ဝဲဒၣ်လၢဝ့ၢ်အံၤအဂီၢ်န့ၣ် တၢ်လ့ပစီဘၣ်အီၤ တလီၢ်လီၢ်န့ၣ်လီၤ. ဘၣ်ဆၣ်, ပှၤဝ့ၢ်ဖိတဖၣ် လိၣ်ဘၣ်တၢ်န့ၣ် မ့ၢ်ဝဲဒၣ် တၢ်မုၢ်လၢ်လီၤန့ၣ် ပပှၤဒူပှၤဃိၤတဂၤအံၤ သ့ၣ်ညါဝဲ, ဒီးဃုထၢဝဲဒၣ် ဒ်သိးကအိၣ်ဆိးဖဲအဝ့ၢ်န့ၣ်လီၤ.

တၢ်တဲပူအပူၤ, အတၢ်အိၣ်အသးလၢ ပှၤဆိကမိၣ်မှံဒုးအိၣ်ထီၣ်အီၤန့ၣ် တလီၤဆီလိာ်အသးဒီးပဟီၣ်ခိၣ်အတၢ်အိၣ်အသးတဖၣ်န့ၣ်ဘၣ်. တၢ်အၢတၢ်သီတဖၣ် အိၣ်ပှဲၤဝဲ, ဒီးပှၤန့ၢ်စိန့ၢ်ကမီၤတဖၣ် ကမၤဟးဂီၤပသးန့ၣ်လီၤ. ဘၣ်ဆၣ်, တၢ်အၢတၢ်သီတဖၣ် ကဟဲမၤနးမၤဖှီၣ်ပှၤ ဒ်လဲၣ်ဂ့ၤ,ဒ်လဲာ်ဂ့ၤန့ၣ် မ့ၢ်လၢယွၤတလဲၤသဒၣ် အပှၤဂီၢ်မုၢ်တဖၣ် နီတဘျီဘၣ်အဃိ, ပကဘၣ်စံးဘျုးစံးဖှိၣ်ကစၢ်ယွၤန့ၣ်လီၤ. ပကထံၣ်ဘၣ် တၢ်ဂ့ၢ်အုၣ်အသးလၢ စီၤပၤ စီၤဒၤဝံး သးဝံၣ်စံးထီၣ်ပတြၢၤယွၤ, ဖဲပှၤဟဲက့ၤစိာ် တလါစီၤဆှံဆူ ဝ့ၢ်ယရူၤရှလ့ၣ်အကတီၢ်န့ၣ်လီၤ. စီၤဒၤဝံး ဟ့ၣ်သဆၣ်ထီၣ် ပှၤအံၣ်စရ့လးဖိတဖၣ်လၢ ကစံးထီၣ်ပတြၢၤ ယွၤ, မ့ၢ်လၢ “သ့ၣ်နီၣ်ထီၣ်က့ၤ အတၢ်အၢၣ်လီၤအီလီၤအထူအယိာ်” (၁ ကွဲး ၁၆:၁၅), ဒီးစိာ်ဆှၢအဝဲသ့ၣ်ဆူ ကီၢ်တၢ်စံးပာ်အပူၤ, (:၁၈) တီတီလိၤလိၤန့ၣ်လီၤ.

ဒုၣ်ဒါအထံကီၢ်လၢ အဂံၢ်ဆူၣ်ဘါဆူၣ်တဖၣ် အတၢ်မၤပျံၤမၤဖုး ပှၤအံၣ်စရ့လးဖိတဖၣ် အိၣ်ဝးတရံးဝဲ, ဒီးလၢအပှၤဂီၢ်မုၢ်တဖၣ် အတၢ်ကဒူးကဒ့ၣ်, ဘါတၢ်ဂီၤတၢ်ဖီၣ်တဖၣ် အိၣ်ဝဲဒၣ်လဲာ်, ယွၤ “တဒုးမၤနးမၤဖှီၣ်အီၤနီတဂၤဘၣ်” (:၂၁) န့ၣ်လီၤ. ကစၢ်ယွၤ နဲၣ်ဆှၢ ပှၤအံၣ်စရ့လးဖိတဖၣ်လၢ ပှၢ်မုၢ်ကနၢ, ဒီးဒုးနဲၣ်ဝဲ အစိအကမီၤ (:၁၁), အတၢ်မၤလီၤလး, ဒီးတၢ်ပနီၣ်လီၤလိၢ်လီၤလးတဖၣ် (:၁၂), အတၢ်စံၣ်ညီၣ်တီတဖၣ် (:၁၄) န့ၣ်လီၤ. မ့ၢ်လၢ ယွၤအတၢ်အဲၣ်န့ၣ် ဒိၣ်ဝဲယိာ်ဝဲ (:၃၄) အဃိ, ခါဆူညါတၢ်မုၢ်လၢ်အိၣ်ထီၣ်ဝဲဒၣ်လၢအပှၤဂီၢ်မုၢ်တဖၣ်အဂီၢ်န့ၣ်လီၤ. တၢ်ဂ့ၢ်အံၤ, မ့ၢ်ဝဲတီဝဲဒၣ် တုၤလၢပစိၤဆၢကတီၢ်အံၤန့ၣ်လီၤ. ကစၢ်ယွၤ တလဲၤသဒၣ်ပှၤန့ၣ် ပနာ်န့ၢ်အီၤသ့, ကစၢ်ယွၤန့ၣ် အဂံၢ်ဆူၣ်န့ၢ်ဒံး တၢ်အၢတၢ်သီတဖၣ်လၢ ပဘၣ်ကွၢ်ဆၢၣ်မဲာ်တမံၤလၢ်လၢ်န့ၣ်လီၤ.