ဖဲဖၠၣ်စိမိၤဖးဒိၣ်တဖျၢၣ်န့ၣ် ပှၤတ့ခဲၣ်တၢ်ဂီၤတဂၤ တ့ခဲၣ်ပှၤပိာ်မုၣ်ပိာ်ခွါ အဂၤတဆံ အက့ၢ်ဂီၤ လၢမၤလီၤကတုၤပှၤကညီတဖၣ်အသး, လၢအမၤဂ့ၤမၤစၢၤ ဖၠၣ်စိမိၤအတၢ်ဖံးတၢ်မၤတဖၣ် လၢပှၤတပာ်သူၣ်ပာ်သးန့ၣ်လီၤ. တၢ်မၤတဖၣ်အံၤ မ့ၢ်ဝဲဒၣ် တၢ်အံးထွဲကွၢ်ထွဲ တၢ်သူၣ်ထီၣ်တဖၣ်, တၢ်အီၣ်တၢ်အီ, ကၠိကရၢၢ်, ဒီးကၠိအတၢ်ဘံၣ်တၢ်ဘၢတဖၣ်န့ၣ်လီၤ. မိ(ရ) (Moore) စံးဝဲလၢ အသးအိၣ်တ့ခဲၣ် အဝဲသ့ၣ်အက့ၢ်ဂီၢ် “ဒ်ပှၤအိၣ်ဒီးအစိကမီၤအသိး” န့ၣ်လီၤ. ဒ်အစံးဝဲအသိးန့ၣ် မၤဝဲဒၣ်လီၤတံၢ်လီၤဆဲးန့ၣ်လီၤ. မ့ၢ်လၢအဝဲသ့ၣ် အတၢ်မၤတဖၣ်တအိၣ်ဖျါဝဲဘၣ်ဆၣ်, အလုၢ်ဒိၣ်ပှ့ၤဒိၣ်နီၢ်မးအဃိ, မိ(ရ) တ့ခဲၣ်ပာ်ဖျါအဝဲသ့ၣ် အသူးသ့ၣ်လၤကပီၤအဂီၢ်န့ၣ်လီၤ. ဖၠၣ်စိမိၤ အခိၣ်နၢ်တဂၤ ပာ်ဖျါထီၣ်ဝဲဒၣ်လၢ တၢ်တ့ခဲၣ်က့ၢ်ဂီၤတဖၣ်အံၤ ကဲဘျုးဝဲလၢ တၢ်မၤဘျါကွံာ် တၢ်လၢအပူၤကွံာ်ကလုာ်ဒူၣ်အတၢ်သးဟ့လိာ်သးတဖၣ် မၤတ့ၢ်အသးလၢကၠိကရၢၢ်အံၤအပူၤန့ၣ်လီၤ.

တၢ်မၤတမံၤအံၤ ဆဲးကပီၤဖျါက့ၤ ကစၢ်ယွၤအသးန့ၣ်လီၤ. ဖဲဝ့ၢ်ကရံၣ်သူး အတၢ်အိၣ်ဖှိၣ်ဖိတဖၣ် ကွၢ်ထံဆိကမိၣ် ကစၢ်ယွၤ အတၢ်အၢၣ်လီၤအီၤလီၤတဖၣ်အကတီၢ်, ပှၤတၢ်မၤဖိ စီၤပီလူး ဃ့ကညး အဝဲသ့ၣ်လၢ “မၤတၢ်အါအါဂီၢ်ဂီၢ်လၢကစၢ်အတၢ်မၤတထံၣ်ဃီတက့ၢ်” (၁ ကရံၣ် ၁၅:၅၈) န့ၣ်လီၤ. မ့ၢ်လၢကစၢ်ယ့ၣ်ရှူး မၤနၢၤတၢ်သံ, ဒီးအတၢ်ဂဲၤထၢၣ်သမူထီၣ်က့ၤအဃိ (:၅၇), လၢတၢ်ဆီၣ်လီၤသးအပူၤ, ဒီးပှၤမ့ၢ်တပာ်သူၣ်ပာ်သးဘၣ်ဆၣ်, ကယဲၢ်အဝဲသ့ၣ် မ့ၢ်မၤတၢ်တမံၤမံၤ, လၢကစၢ်အဂီၢ်န့ၣ် တကဲထီၣ် တၢ်ကလီကလီ နီတမံၤဘၣ်န့ၣ်လီၤ. တၢ်အစၢလၢအကဲဘျုး တဖၣ်န့ၣ် မ့ၢ်လၢအဝဲသ့ၣ်တထံၣ်ဒံးဝဲအဃိ, လၢတၢ်မၤဂ့ၤမၤဘျုးတၢ်တဖၣ်အဂီၢ်, အဝဲသ့ၣ် မ့ၢ်ထုးဆၢထုးကတီၢ်, (မ့) အသးမ့ၢ်ဟးဂီၤဝဲဒၣ်န့ၣ်ဒီး, စီၤပီလူး အဲၣ်ဒိးဝဲဒၣ်လၢ အဝဲသ့ၣ်ကကွၢ်တၢ်, လၢမူခိၣ်အတၢ်ထံၣ်တကပၤ, တၢ်ထံၣ်လၢကမၤဂၢၢ်မၤကျၢၤ အဝဲသ့ၣ် အတၢ်စူၢ်တၢ်နာ်, ဒီးဒ်သိးအသးအသုတဒံဝ့ၤဒံဝီၤ, ဒီးကဟံးဃာ် ခွဲးယာ်ကိးမံၤဒဲး, လၢကမၤတၢ်ဂ့ၤအဂီၢ်န့ၣ်လီၤ. အဝဲသ့ၣ်အိၣ်ဒီး “ကစၢ်ယ့ၣ်ရှူးအက့ၢ်အဂီၤ” (:၄၉) အဃိ, လၢကစၢ်ခရံာ်အဂီၢ်, အဝဲသ့ၣ် ဖံးတၢ်မၤတၢ်တဖၣ်န့ၣ် အဘျုးအဖှိၣ်အိၣ်ဝဲလီၤန့ၣ် အဝဲသ့ၣ်ကဘၣ်သ့ၣ်ညါဝဲဒၣ်န့ၣ်လီၤ.

ပတၢ်မၤဂ့ၤမၤစၢၤတၢ်တဖၣ်န့ၣ် ကအိၣ်ဖျါဝဲ ဒ်တၢ်အဆံးအစှၤ, ဒီးပှၤမ့ၢ်တထံၣ်အီၤဘၣ်ဆၣ်, ပသးဟးဂီၤအလီၢ်တအိၣ်ဘၣ်. ပမၤတၢ်လၢအဂီၢ်န့ၣ် ကစၢ်ယွၤ ထံၣ်ဝဲ, ဒီးကမၤစၢၤပှၤန့ၣ်လီၤ. ပအိၣ်တီအိၣ်လိၤဒီးယွၤန့ၣ် တမ့ၢ်ကကဲထီၣ် တၢ်ကစီၣ်အခိၣ်တီထီဘိဘၣ်ဆၣ်, မ့မ့ၢ်လၢကစၢ်ယွၤအဂီၢ်န့ၣ် အကါဒိၣ်ဝဲထီဘိန့ၣ်လီၤ.