ဖဲကီၢ်အမဲရကၤ ထံလီၢ်ကီၢ်ပူၤတၢ်ဒုးတၢ်ယၤ (၁၈၆၁-၆၅) ထုးဃၢအသး, ဒီးတဝံၤဒံးဘၣ်အကတီၢ်န့ၣ် ပှၤဒုးတၢ်ခံကပၤလိာ် စူးကါကျိၤကျဲအကတၢၢ်တမံၤ, လၢတၢ်ထၢဆူၣ်သုး (ဒ်သိးကမၤပှဲၤအသုးဖိတဖၣ်အဂီၢ်, ဒ်ထံကီၢ်အတၢ်ဘျၢအိၣ်ဝဲအသိး, ပှၤကဘၣ်နုာ်လီၤသုး) န့ၣ်လီၤ. လၢသိၣ်မှံၤကရၢအတၢ်သိၣ်တၢ်ဘျၢ (Confederate law) ပာ်ဖျါဝဲလၢ ပှၤကဘၣ်နုာ်လီၤကဲဝဲဒၣ် သုးဖိတဂၤန့ၣ် ပဒ့ၣ်ဟးဆှဲးအသးသ့ဝဲဒၣ် ခီဖျိလၢတၢ်ဒိးလဲပှၤတဂၤဂၤလၢ အဘၣ်တၢ်ပျဲပူၤအီၤဒီးတၢ်ထၢဆူၣ်သုး, ဒီးအါတက့ၢ်န့ၣ် ပှၤအသးစၢ်န့ၢ် (မ့) ပှၤအသးပှၢ်န့ၢ် တၢ်ထၢဆူၣ်သုးအသးအနံၣ်အလါ, ဒ်သိးကနုာ်လီၤလၢအလီၢ် န့ၣ်လီၤ. ပှၤလၢပဒ့ၣ် ဟးဆှဲးတၢ်ထၢဆူၣ်သုးတဂၤန့ၣ် ညီနုၢ်ဘၣ်ဟ့ၣ်တၢ်အဘူးအလဲဆူထံကီၢ်ပဒိၣ်, ဒီးကျိၣ်စ့အါအါဂီၢ်ဂီၢ်ဆူ ပှၤလၢအကနုာ်လီၤအလီၢ်တဂၤန့ၣ်လီၤ. ထဲဒၣ်ပှၤထူးပှၤတီၤတဖၣ်ဧိၤ ပှ့ၤ (မ့) ဒိးလဲန့ၢ်ဝဲဒၣ် ပှၤအခၢၣ်စးတဖၣ် လၢအဝဲသ့ၣ်အလီၢ် န့ၣ်လီၤ.

နီၢ်သးအတၢ်ဒုးတၢ်ယၤ, မ့ၢ်တၢ်လၢအကါဒိၣ်အဂ့ၢ်န့ၣ် ပှၤတၢ်မၢဖိ စီၤပီလူး ကွဲးပာ်ဖျါဝဲလၢ “ပှၤခဲလၢာ်မၤတၢ်ဒဲးဘးဒီး တချုးန့ၢ်ဘၣ် ယွၤအလၤအကပီၤဘၣ်” (ရိမ့ၤ ၃:၂၃), ဒီး “တၢ်ဒဲးဘးအဘူးအလဲမ့ၢ်တၢ်သံ” (၆:၂၃) န့ၣ်လီၤ. ပှၤကမၤပူၤမၤဖျဲးအသးလၢ တၢ်ဒဲးဘးအဂီၢ်, ကျိၤကျဲတအိၣ်ဝဲဒၣ်နီတမံၤဘၣ်. ဘၣ်ဆၣ်, ပဝဲခဲလၢာ်အဂီၢ်, ပမ့ၢ်အိၣ်ဒီးပှၤအခၢၣ်စးတဂၤ, လၢအကဟံးန့ၢ်ပလီၢ်န့ၣ် တၢ်ကမၤအသးဒ်လဲၣ်. ပှၤကွဲးလံာ်ဧ့ၤဘြံၤ စံးထီၣ်ပတြၢၤယွၤ, လၢအသူၣ်ကညီၤသးကညီၤတၢ်လီၤထူလီၤယိာ်တဂၤ, ဆှၢလီၤဝဲ ကစၢ်ယ့ၣ်ရှူး ဒ်သိးကကဲထီၣ် ပှၤအခၢၣ်စးလၢပဂီၢ်, ကတူၢ်ခီၣ် တၢ်စံၣ်ညီၣ် ပတၢ်ဒဲးဘး, လၢပကြၢးတူၢ်ဘၣ်ခီၣ်ဘၣ်, ဒ်သိးကဟ့ၣ်တူာ် ပဒ့ၣ်ကမၣ်ဒီး “ပဘၣ်တၢ်မၤစီထီၣ်ဆှံထီၣ်ပှၤ, ခီဖျိယ့ၣ်ရှူးခရံာ်အတၢ်လုၢ်ထီၣ်အနီၢ်ခိထဲ တဘျီဧိၤ” (ဧ့ၤ ၁၀:၁၀, ခ့ခါ), ဒီးဟ့ၣ်လီၤအသးသမူလၢပခၢၣ်စးန့ၣ်လီၤ. “ဒီးပမ့ၢ်သံဃုာ်တ့ၢ်ဒီးခရံာ်,” ဒီးမုၢ်တနံၤန့ၣ် “ပကမူဃုာ်စ့ၢ်ကီးဒီးအီၤ” (ရိမ့ၤ ၆:၈) န့ၣ်လီၤ.

တၢ်သးခုအကစီၣ်န့ၣ် မ့ၢ်တၢ်အံၤန့ၣ်လီၤ. ကစၢ်ခရံာ် တူၢ်သံအသး လၢနဂီၢ်, ဒီးလၢယဂီၢ်, ဒ်ပှၤအခၢၣ်စးတဂၤ ဟံးန့ၢ်ပလီၢ်အသိးန့ၣ်လီၤ. ခဲကနံၣ်အံၤ, ပတမ့ၢ်ထဲ ပှၤပူၤဖျဲးထီၣ်လၢတၢ်သံ, လၢတၢ်ဒုးတၢ်ယၤအပူၤဧိၤန့ၣ်ဘၣ်. ပကဲထီၣ် ယွၤအဖိမုၣ်, အဖိခွါတဖၣ်လံန့ၣ်လီၤ.