နမ့ၢ်အဲၣ်ဒိးထံၣ် ကၠါရဲး(ထ) (Jarrett) အတၢ်နံၤကမှံန့ၣ်, သံကွၢ်အီၤလၢ အကနဲတဖၣ်အဂ့ၢ်န့ၣ်တက့ၢ်. အဝဲမ့ၢ်ပှၤဘုၣ်ကနဲတဂၤန့ၣ်လီၤ. ပထံၣ်လိာ်သကိးပသးလၢအဟံၣ်လီၢ်ခံကရၢၢ်အပူၤန့ၣ် တမ့ၢ်လၢပကစံးကတိၤသကိး ကနဲတဖၣ်အဂ့ၢ်ဘၣ်ဆၣ်, ညီနုၢ်တၢ်လီၤသးစဲတမံၤ, လၢပတၢ်ကတိၤသကိးလိာ်သးတဖၣ်အပူၤန့ၣ် မ့ၢ်ဒၣ်တၢ်မၤလိန့ၢ်အါထီၣ် တၢ်ဘုၣ်ကနဲအဂ့ၢ်န့ၣ်လီၤ. ဘၣ်ဆၣ်, တၢ်ဂ့ၤဒိၣ်န့ၢ်ဒံး တၢ်စံးကတိၤသကိးကနဲအဂ့ၢ်န့ၣ် မ့ၢ်န့ဆၢၣ်ကနဲစီလၢအကဆှီ, အလွဲၢ်ဘီဒ်ထူ, ဒီးဆၢဝံၣ်သိ, ဘၣ်တၢ်ထုးထီၣ်အီၤလၢ ကၠါရဲး(ထ) အကနဲလၢ အမၤတၢ်ဆူၣ်တဖၣ်န့ၣ်လီၤ. မ့ၢ်မး, ဆၢဝံၣ်သိဒိၣ်မးလီၤ.
စံးထီၣ်ပတြၢၤ ၁၁၉:၁၀၃ အပူၤန့ၣ်, ပှၤကွဲးထါ စံးဝဲဒၣ်လၢ “ယလ့ၣ်ကွၢ်တၢ်န့ၣ် နကလုၢ်နကထါ ဆၢဆံးဒိၣ်လဲၣ်. ဆၢန့ၢ် ကနဲစီလၢ ယကိာ်ပူၤန့ၣ်တက့ၢ်လီၤ.”

ပမ့ၢ်ကွၢ်ထံကွၢ်ဆး အဆၢဖိ ၉၇-၁၀၄ တဖၣ်အပူၤန့ၣ် ပှၤကွဲးလံာ် စူးကါဝဲ တၢ်ကတိၤထိၣ်သတြီၤ “ဆၢန့ၢ်ကနဲစီ” အံၤ, မ့ၢ်လံာ်ကျိၤကူာ်တဖၣ်အကျါတထံၣ်,ဒ်သိးကပာ်ဖျါဆှဲထီၣ် ယွၤအကလုၢ်အကထါ, လၢအလုၢ်အပှ့ၤအဒိၣ်ကတၢၢ်အဂီၢ်, “နတၢ်မၤလိာ်တဖၣ် ဒုးကူၣ်သ့ထီၣ်ယၤအါန့ၢ် ယဒုၣ်ယဒါတဖၣ်တက့ၢ်လီၤ. အဂ့ၢ်ဒ်အံၤ, အိၣ်ဒီးယၤ လီၤထူလီၤယိာ်လီၤ. ယနူၤပၢၢ် ယနၢ်ပၢၢ်တၢ်န့ၣ်အါန့ၢ် ပှၤသိၣ်လိယၤခဲလၢာ်တက့ၢ်လီၤ. အဂ့ၢ်ဒ်အံၤ, ယဆိကမိၣ်လၢ နတၢ်အုၣ်အသးတဖၣ်အဂ့ၢ်အကျိၤလီၤ. ယနၢ်ပၢၢ်တၢ်အါန့ၢ်ပမှံၤပပှၢ်တက့ၢ်လီၤ. အဂ့ၢ်ဒ်အံၤ, ယတိၢ်န့ၢ်ဖံးဃာ် နတၢ်မၤလိာ်တဖၣ်” (:၉၈-၁၀၀) န့ၣ်လီၤ. တၢ်ဂ့ၢ်အခိၣ်သ့ၣ်န့ၣ် ကစၢ်ယွၤ အကလုၢ်အကထါ, လၢအလီၣ်ဖျါထီၣ်ဝဲလၢ လံာ်စီဆှံအပူၤတဖၣ်န့ၣ် ပမ့ၢ်ဟံးဃာ်ဂၢၢ်ကျၢၤအီၤ လၢသူၣ်ဒီဖျၢၣ်သးဒီဖျၢၣ်အပူၤန့ၣ်ဒီး, ကသူၣ်လီၤကတဲာ်ကတီၤန့ၢ် တၢ်အိၣ်အသးမၤအသးတဖၣ်, ဒ်သိးပကအိၣ်မူအိၣ်ဂဲၤဂ့ၤဂ့ၤဘၣ်ဘၣ်လၢ ဟီၣ်ခိၣ်ချၢအံၤအဂီၢ်န့ၣ်လီၤ.

ဒ်န့ၣ်အသိး, အပျဲၢ်အဘီၣ်တဖၣ် လဲၤခီဖျီသ့ၣ်ညါဘၣ်ဝဲ, ဒီးပာ်လုၢ်ပာ်ပှ့ၤဝဲ ကစၢ်ယ့ၣ်ရှူး, ယွၤအကလုၢ်အကထါလၢအမူ (ကွၢ်ဖဲယိၤဟၣ် ၁:၁-၁၄), ဒီးခီဖျိလၢသးစီဆှံအတၢ်ဟ့ၣ်စိဟ့ၣ်ကမီၤအပူၤန့ၣ် ဒ်သိးကအိၣ်မူအိၣ်ဂဲၤကျိၤကျဲလၢ အမၤလၤကပီၤယွၤ, ဒီးကမၤလၢပှဲၤ ယွၤအတၢ်တိာ်ကျဲၤတဖၣ်အဂီၢ်, ကအိၣ်ဆိးဘၣ်ဝဲ လၢအလီၢ်ဘၣ်အကျဲဘၣ်န့ၣ်လီၤ.