ဒ်သိးယကပှ့ၤန့ၢ်ပၢ်အမုၢ်နံၤ ခးဖိတဘ့ၣ်အဂီၢ်, ယလဲၤနုာ်လီၤဆူ ပှၤဆါပနံာ်တၢ်ဖိတၢ်လံၤ အကျးပူၤ, ဃၢဃၢဖိန့ၣ်လီၤ. ယပျၢ်တ့ၢ်ယပၢ်အတၢ်ကမၣ်လံ. လၢတၢ်အါနံၣ်အါလါ အတီၢ်ပူၤ, ခီဖျိလၢတၢ်ထုကဖၣ်အပူၤန့ၣ် ယကျဲးစၢးမၤဘၣ်လိာ်ဖိးဒ့က့ၤတၢ်, ဖဲယသးအိၣ်တဆံယဲၢ်နံၣ်န့ၣ် တချုးလၢယဟးထီၣ်လၢဟံၣ်, ဒီးယဟးထီၣ်ဝံၤအလီၢ်ခံ, တၢ်လၢအမၤဘၣ်ဒိဆါယသးတဖၣ် ယဂုာ်ကျဲးစၢးမၤဘၣ်လိာ်ဘၣ်စးတ့ၢ်ယဲလံန့ၣ်လီၤ. တၢ်ဘၣ်ယသးတမုာ်တမံၤန့ၣ် နံၣ်လၢအဆံတဖၣ် လဲၤပူၤကွံာ်ဝံၤဒၣ်လဲာ်, ခးတဖၣ်လၢ အစံးကတိၤပာ်ဖျါ တၢ်စံးဘျုးစံးဖှိၣ်အါအါကလဲာ်ဆူ ပၢ် “အဂ့ၤအဒိၣ်ကတၢၢ်” တဖၣ် အဂီၢ်န့ၣ် ယဒိသူၣ်ဒိသး တန့ၢ်တသ့ဒံးဘၣ်အဖၢမုၢ်န့ၣ်လီၤ. လၢတၢ်န့ၣ်အဃိ, ဒ်သိးယကမၤလၤကပီၤ ယပၢ်ကစၢ်ယွၤ လၢမူခိၣ်တဂၤအဂီၢ်, ယအိၣ်ဆၢထၢၣ်ယဲလၢ ပှၤပာ်ခးတဖၣ်အစိၤခိၣ်ကပၤ, ဒီးဃ့ဘါထုကဖၣ်လၢ ယပၢ်လၢဟီၣ်ခိၣ်တဂၤအဂီၢ်န့ၣ်လီၤ.

တၢ်ဒဲးဘး ဒုးအိၣ်ထီၣ် တၢ်အ့ၣ်လိာ်ဝာ်လိာ်သး, ဒီးတၢ်သးအုးဒိၣ်ဒိၣ်မုၢ်မုၢ်န့ၣ် စးထီၣ်အသးလၢ စီၤအၤဒၣ်ဒီးစီၤကၤယံၣ်, စီၤဒၤဝံးဒီးစီၤအးဘရှါလိၣ်, တုၤလီၤဆူ ယပၢ်ဒီးယၤန့ၣ်လီၤ. ဘၣ်ဆၣ်, ဒ်သိးဖိသ့ၣ်တဖၣ် ကဒိကနၣ်မိၢ်ပၢ်တဖၣ်အဂီၢ်, ပှၤတၢ်မၢဖိ စီၤပီလူး ဟ့ၣ်ဂံၢ်ဟ့ၣ်ဘါဝဲဒၣ် “စူၢ်သုမိၢ်သုပၢ်လၢကစၢ်အပူၤ…အဂ့ၢ်ဒ်အံၤ, တၢ်န့ၣ်မ့ၢ်အတီအလိၤ” (အ့းဖ့း ၆:၁) န့ၣ်လီၤ. တၢ်ယူးယီၣ်မိၢ်ပၢ်န့ၣ် မ့ၢ်တၢ်မၤလိာ်တထံၣ်, တၢ်အၢၣ်လီၤဒီးတၢ်ဟ့ၣ်ခိၣ်ဖး ပိာ်ထွဲထီၣ်အခံ (:၂-၃) န့ၣ်လီၤ. ဒ်န့ၣ်အသိး, ဒ်သိးဖိသ့ၣ်တဖၣ် ကသ့ၣ်ညါယွၤ, ဒီးကအဲၣ်ယွၤအဂီၢ်, ပၢ်သ့ၣ်တဖၣ် ကဘၣ်လုၢ်ဒိၣ်ထီၣ်ဝဲ (:၄) န့ၣ်လီၤ. ကစၢ်ယွၤ တိာ်ပာ်ဝဲလၢ အပှၤဂီၢ်မုၢ်တဖၣ် ကမၤဂ့ၤမၤစၢၤလိာ်သးကဒဲကဒဲ, “လၢသးဂ့ၤ, တမ့ၢ်ဘၣ်ဒ်လၢပှၤကညီအဂီၢ်အသိးဘၣ်, မ့ၢ်ဒ်လၢကစၢ်အဂီၢ်အသိး” (:၇) န့ၣ်လီၤ. တၢ်လၢအလီၤသးအုးဒိၣ်မး တမံၤန့ၣ်လၢ တၢ်ဒဲးဘး မၤဟးဂီၤကွံာ် တၢ်ရ့လိာ်သးဒ်သိးအံၤ သ့ဝဲဒၣ်အဃိန့ၣ်လီၤ.

ပဝဲဒီးပမိၢ်ပပၢ်တဖၣ် ပတၢ်ဘၣ်ထွဲလိာ်သးအပတီၢ် ကမ့ၢ်ဝဲဒ်လဲၣ်ဂ့ၤ,ဒ်လဲၣ်ဂ့ၤ, ဖဲလၢယွၤကဟ့ၣ်ပှၤသးသမူအကတီၢ်, မ့ၢ်လၢအဝဲဃုထၢစူးကါ မိၢ်ပၢ်တဖၣ်အဃိ, ပစံးဘျုးယွၤသ့ဝဲဒၣ်န့ၣ်လီၤ. ဒီးဒ်သိးပမိၢ်ပၢ်တဖၣ် ကဆီတလဲအတၢ်အိၣ်မူ, ဒီးကမုာ်လၤသးခုဝဲလၢ အတၢ်ဘၣ်ထွဲလိာ်သးဒီးခရံာ်အဂီၢ်, ပဃ့ထုကဖၣ်သ့ဝဲဒၣ်န့ၣ်လီၤ. တၢ်ဃ့ထုကဖၣ်လၢအနဲၣ်ပှၤဆူ ကစၢ်ယ့ၣ်ရှူးအအိၣ်န့ၣ် မ့ၢ်တၢ်အဲၣ်, ဒီးတၢ်ယူးယီၣ်အတၢ်ဟ့ၣ်, ကနဲၣ်ဆှၢပှၤဆူ တၢ်ဆီတလဲ ပတၢ်ရ့လိာ်သးတဖၣ်, ဒီးပတၢ်အိၣ်မူတဖၣ်န့ၣ်လီၤ.