ဖဲ ၁၉၃၇ နံၣ်န့ၣ် ပှၤကွဲးလံာ် နပိလံၣ်ယဲ(န) ဟ့ (Napoleon Hill) ကွဲးထုးထီၣ် “Think and Grow Rich” အလံာ်တဘ့ၣ်အပူၤန့ၣ် ပာ်ဖျါဝဲဒၣ် “တၢ်လၢနသးထံၣ်ဆိကမိၣ်, ဒီးနာ်ဝဲသ့ တမံၤဂ့ၤတမံၤဂ့ၤန့ၣ်, နမၤန့ၢ်အီၤသ့ဝဲဒၣ်” န့ၣ်လီၤ. ဟ့ ကတိၤဟ့ၣ်ဒိတၢ်တမံၤအံၤ ပာ်ဖျါဒိဂ့ၤ ပှၤအမဲရကၤဖိ အတၢ်မံမီၢ် (American Dream) လၢအမ့ၢ်, “နမ့ၢ်မၤတၢ်ဆူၣ်ဆူၣ်န့ၣ် နကဒိးန့ၢ် နတၢ်မံမီၢ် အကီခဲကတၢၢ်တဖၣ်သ့” န့ၣ်လီၤ.

တၢ်ဂုာ်ကျဲးစၢးမၤတၢ်ဆူၣ်ဆူၣ်န့ၣ် ကဆှၢပှၤဆူ ဟီၣ်ခိၣ်အတၢ်န့ၢ်ဘျုးန့ၢ်ဖှိၣ်တဖၣ်န့ၣ်လီၤ. ဘၣ်ထွဲဒီးတၢ်ဂ့ၢ်အံၤ, လံာ်စီဆှံအဆၢတဖၣ် အိၣ်ဝဲအါမး, လီၤဆီဒၣ်တၢ်လၢလံာ်တၢ်ကတိၤဒိအပူၤန့ၣ်လီၤ. ဘၣ်ဆၣ်, ဖဲလၢယသးပှၢ်ထီၣ်ယဲန့ၣ်ဒီး, တၢ်အိၣ်မူပိာ်ထွဲ ဟ့ အတၢ်ထံၣ်ဆိကမိၣ်န့ၣ် ယထံၣ်စ့ၢ်ကီးလၢ တၢ်လီၤဘၣ်ယိၣ်နီၢ်နီၢ်တမံၤန့ၣ်လီၤ. “ယတၢ်ဂုာ်ကျဲးစၢးမၤန့ၢ် ယတၢ်မံမီၢ်တဖၣ်န့ၣ် ကဲထီၣ်ဝဲဒၣ် တၢ်ဂုာ်ကျဲးစၢးမၤတၢ်န့ၣ် ထဲဒၣ်လၢယဂီၢ်, ဒီးတၢ်သန့ၤသးလၢယွၤအဂီၢ်” အလီၣ်တအိၣ်လၢၤဘၣ်န့ၣ်လီၤ.

ဖဲလံာ်ကလၤတံ ၅ အပူၤန့ၣ် စီၤပီလူး ထိၣ်သတြီၤဝဲ တၢ်အိၣ်မူအကျဲ ခံကလုာ်န့ၣ်လီၤ. “လဲၤတၢ်လၢသးအပူၤတက့ၢ်. ဒီးသုညၣ်အသးကွံတၢ်န့ၣ်, သုတမၤလၢထီၣ် ပှဲၤထီၣ်တဂ့ၤ” (:၁၆) န့ၣ်လီၤ. လံာ်စီဆှံအဆၢအံၤ, လၢလံာ်တၢ်ကစီၣ် (The Message) အပူၤန့ၣ် ယူၣ်ကၠ့ ဖံထၢၣ်စဲ(န) (Eugene Peterson) ကွဲးပာ်ဖျါဆှဲက့ၤဝဲဒၣ် “ဒ်သိးဒီးနသုတမၤလၢမၤပှဲၤ တၢ်အဲၣ်လီၤက့ၤသး အတၢ်မၢန့ၢ်ဆီၣ်ခံနၤအဂီၢ်, အိၣ်မူဟူးဂဲၤနဲလၢ တၢ်သဘျ့, ခီဖျိလၢယွၤအသး အတၢ်မၤပှဲၤက့ၤဂံၢ်ဘါ, ဒီးအတၢ်ထိၣ်ဟူးထိၣ်ဂဲၤအပူၤ” န့ၣ်တက့ၢ်. တၢ်အိၣ်မူဒိၣ်ထီၣ်အါထီၣ် လၢခရံာ်အပူၤအဂ့ၢ်န့ၣ် စီၤပီလူး ပာ်ဖျါထီၣ်ဝဲ ဖဲလံာ်စီဆှံအဆၢဖိလၢ အပိာ်ထွဲထီၣ်တဖၣ်အပူၤ, “မ့မ့ၢ်သးအတၤသၣ်န့ၣ်, မ့ၢ်တၢ်အဲၣ်တၢ်ကွံ, တၢ်သူၣ်ခုသးခု, တၢ်ဃူတၢ်ဖိး, တၢ်ဝံသးစူၤ, တၢ်သူၣ်စူၤသးစူၤ, တၢ်မၤဂ့ၤတၢ်, တၢ်စူၢ်တၢ်နာ်, တၢ်ဆီၣ်လီၤပသး, တၢ်ကီၤသူၣ်ကီၤသးသ့ၣ်တဖၣ်” (:၂၂-၂၃) န့ၣ်လီၤ.

လၢဟီၣ်ခိၣ်ချၢအံၤ, တၢ်အကလုၢ်အိၣ်ဝဲအါမံၤန့ၣ် မၢဆူၣ်မၢစိးပှၤလၢ ပကဟံးဃာ်ဖီၣ်ဃာ် ပတၢ်မိၣ်န့ၢ်သးလီတဖၣ် လၢပစုခံခီလိာ်န့ၣ်လီၤ. ဘၣ်ဆၣ်, တၢ်အိၣ်မူလၢ ပဆၢမိၣ်န့ၢ်ဘၣ်န့ၣ် တမ့ၢ်တၢ်အိၣ်မူလၢ ပကစၢ်ဒၣ်ပဝဲ ပဂုာ်ကျဲးစၢးမၤန့ၢ်အီၤအဃိဘၣ်, မ့မ့ၢ်တၢ်အိၣ်မူအိၣ်ဟဲခီဖျိလၢ တၢ်ဟ့ၣ်လီၤပသးဆူ ယွၤအသးစီဆှံ, လၢပလီၢ်ပကျဲပသနၢၢ်, လၢတၢ်မုၢ်လၢ်တအိၣ်အပူၤ, ပကလူၤဃုဒိးန့ၢ်တၢ်ဆိၣ်ဂ့ၤအလီၢ်န့ၣ် ပကလဲၤတၢ်ဒီးကစၢ်ယွၤ လၢတၢ်သဘျ့အပူၤန့ၣ်လီၤ.