ဖဲမူးသးဖှံလၢပျီပူၤ (outdoor concert)စးထီၣ်အကတီၢ်, မူခိၣ်ထံတလီၤစီၤဖိ ဟဲဘၣ်ယဘိးပၤန့ၣ်လီၤ. ယကွၢ်ထီၣ်မူခိၣ်, ဒီးယထံၣ်တၢ်အၢၣ်ခံးသူ လၢအလီၤဘၣ်ယိၣ်တဖၣ်န့ၣ်လီၤ. ဘၣ်ဆၣ်, လံာ်ပျဲက့ (ticket) လၢယပှ့ၤတ့ၢ်လံန့ၣ် အပှ့ၤကလံၤဒိၣ်, ဒီးခီဖျိလၢမူခိၣ်ကလံၤသီၣ်ဂီၤတမုာ်တစဲးဖိအဃိ, ယတအဲၣ်ဒိးက့ၤဘၣ်. ဖဲန့ၣ်, သဒၢမုၢ်တဖၣ် အိးထီၣ်အသး, ဒီးပှၤပိာ်မုၣ်တဂၤ မၤဘံၣ်မၤဘၢအခိၣ်လၢပလးစတ့းထၢၣ်ဒၢတဖျၢၣ်န့ၣ်လီၤ. ဖဲလီသီၣ်သထြုးတထံၣ်, ဘူးတ့ၢ်လၢပနၢ်ကတအၢန့ၣ်ဒီး, ပှၤသးဝံၣ်တၢ်ပိာ်မုၣ်တဂၤ ဟံးထီၣ်တၢ်ကလုၢ်ဒၢ, ဒီးဃ့ကညး ကမျၢၢ်တဖၣ် လၢကလူၤဃုအိၣ်ဘံၣ်အိၣ်ဘၢပသး ဖဲတၢ်လီၢ်တတီၤတီၤန့ၣ်လီၤ.

ဖဲမူခိၣ်ဟဲစူၤလီၤဆူၣ်ဆူၣ်အကတီၢ်, ပလဲၤဟးယီၢ်ဆဲးထူကပံာ်ထံတဖၣ်အကျါ, ဒီးဃ့ၢ်သဖှိဆူ ကၠိတၢ်လိာ်ကွဲလီၢ် အတၢ်သူၣ်ထီၣ်လၢ အအိၣ်ဘူးတဖျၢၣ်အပူၤန့ၣ်လီၤ. ဒီးပှၤစီစၣ်လၢအဘၣ်စီၣ်ဘၣ်အၢတဖၣ် ပာ်ဖှိၣ်ထီၣ်အသးန့ၣ် ကယံာ်ဝဲ တခီနၣ်ရံၣ်, ဒီးကလံၤမုၢ်ကကတၢၢ်ဝဲအဂီၢ်, ပမုၢ်လၢ်ဒံးအဖၢမုၢ်န့ၣ်လီၤ. ဖဲပဟဲက့ၤဟးထီၣ်ဆူ တၢ်ချၢန့ၣ်ဒီး, ပထံၣ်လၢ ပှၤဒ့တၢ်အူတၢ်တဖုန့ၣ် ဘိၣ်ထီၣ်စှၢၤထီၣ်က့ၤ ပိးလီတဖၣ်, ဒီးကတဲာ်ကတီၤတ့ၢ်လံအသး, ဒ်သိးကက့ၤဝဲအဂီၢ်န့ၣ်လီၤ.

ဖဲလၢပသးသမူ အကလံၤမုၢ်တွၤတဖၣ် ကဟဲမၤဘၣ်ဒိဘၣ်ထံးပှၤအကတီၢ်, မ့ၢ်ပကဃ့ၢ်ဆူ တၢ်လီၢ်မတၤလဲၣ်. တၢ်သူၣ်အုးသးအုး, တၢ်ဘၣ်ယိၣ်ဘၣ်ဘီ, တၢ်ဆူးတၢ်ဆါ, ဒီးတၢ်သးသဘံၣ်ဘုၣ်တဖၣ်န့ၣ် မၤပျံၤမၤဖုးပှၤသ့အဃိ, ပလိၣ်ဘၣ်တၢ်အိၣ်တဒၢအလီၢ်န့ၣ်လီၤ. ပလိၣ်ဘၣ်တၢ်အိၣ်တဒၢလီၢ်အဂၢၢ်အကျၢၤ, လၢကမၤဘံၣ်မၤဘၢပှၤအဂီၢ်န့ၣ်လီၤ. ထါစံးထီၣ်ပတြၢၤအယုၢ် ၉၁ ဒုးသ့ၣ်နီၣ်ထီၣ်က့ၤပှၤလၢဖဲပဘၣ်ကီဘၣ်ခဲအကတီၢ်, ကစၢ်ယွၤ အၢၣ်လီၤတ့ၢ်ဝဲဒၣ်လၢ ကမၤပူၤမၤဖျဲးပှၤ, ဒီး ကအိၣ်ဒီးပှၤန့ၣ်လီၤ. “မ့ၢ်အသးစဲဘူးဒီးယၤဒီး, ယကမၤပူၤဖျဲးအီၤ, ယကပာ်ထီၣ်ထီအီၤလၢ အသ့ၣ်ညါယမံၤအဃိ” (:၁၄) န့ၣ်လီၤ. ဖဲပလိၣ်ဘၣ်တၢ်မၤစၢၤအကတီၢ်, ပကိးထီၣ်ယွၤအမံၤသ့ဝဲဒၣ်, ဒီးကစၢ်ယွၤ “ကစံးဆၢ” (:၁၅) ဝဲဒၣ်န့ၣ်လီၤ.

ဖဲပတၢ်သူၣ်ဒူသးဒူ ဆံးလီၤစှၤလီၤအကတီၢ်, ပသန့ၤလီၤပသးလၢ ယွၤအဂံၢ်အဘါအပူၤသ့ဝဲဒၣ်န့ၣ်လီၤ. ကယဲၢ်ကလံၤမုၢ်တမံၤဂ့ၤ,တမံၤဂ့ၤအပူၤန့ၣ် ကစၢ်ယွၤ မ့ၢ်ပတၢ်အိၣ်တဒၢအလီၢ်န့ၣ်လီၤ.