ဖဲယမ့ၢ်ယဲပိာ်ခွါသးစၢ်တဂၤအကတီၢ်, ယနၢ်ဟူ ယတံၤသကိးမုၣ်တဂၤ လၢတၢ်နာ်န့ၢ်လီၤသးအပူၤန့ၣ် စံးဘၣ်ယၤလၢ “ယသ့ၣ်ညါနဂ့ၢ်န့ၣ် အါန့ၢ်ဒံး နသ့ၣ်ညါလီၤက့ၤနသးဒၣ်နဲ” န့ၣ်လီၤ. အတၢ်ပညိၣ်တဖၣ်န့ၣ် မ့ၢ်တၢ်လၢအဂ့ၤတကပၤဘၣ်ဆၣ်, ယမ့ၢ်ဖိသၣ်လၢအဘၣ်တၢ်လုၢ်ဖိယၤ, လၢမံးရှၢၣ်နရံၣ်သရၣ်အဃိ, ယတၢ်အိၣ်မူန့ၣ် ဘၣ်တၢ်တ့ဘှီအီၤလၢ ဟီၣ်ခိၣ်ကီၢ်မိၢ်ပှၢ် (continent) လွံၢ်တီၤ, ဒီးလုၢ်လၢ်ဆဲးလၤလွံၢ်ကလုာ်န့ၣ်,မ့ၢ်တၢ်အိၣ်မူလၢ ပှၤကနၢ်ပၢၢ်အီၤကီဝဲဒၣ်န့ၣ်လီၤ. အဝဲတသ့ၣ်ညါယၤနီၢ်နီၢ်ဘၣ်.

ဖဲ စီၤယိၤဘး အတံၤသကိး, စီၤစိဖၢ် စံၣ်ညီၣ်ပဲာ်ဖး စီၤယိၤဘး အတၢ်ကီတၢ်ခဲတဖၣ်န့ၣ် ဖျါဝဲဒ်ပှၤကူၣ်သ့ကူၣ်ဘၣ် အတၢ်ကတိၤအသိးန့ၣ်လီၤ. စီၤစိဖၢ် သံကွၢ်ဝဲဒၣ် စီၤယိၤဘးလၢ “နဃုန့ၢ် တၢ်သ့တၢ်လၢာ်အဂ့ၢ်အကျိၤ တုၤအလၢာ်ဘၣ်ကသ့ဧါ. ထီတုၤသိးဒီးမူခိၣ်” (ဘး ၁၁:၇-၈) န့ၣ်လီၤ. မ့ၢ်မတၤတဂၤ ကကတိၤဂ့ၢ်လိာ် တၢ်ဂ့ၢ်အံၤကသ့ဝဲဒၣ်လဲၣ်. ဘၣ်ဆၣ်, တၢ်လၢ စီၤစိဖၢ် တသ့ၣ်ညါဝဲဒၣ်, တၢ်အိၣ်ဝဲလၢ စီၤယိၤဘး အသးကံၢ်ပူၤတမံၤအဂ့ၢ်န့ၣ် အဝဲကတိၤထီၣ်ဝဲဒူဒူန့ၣ်လီၤ. တၢ်အုၣ်အသးလီၤတံၢ်လီၤဆဲး တအိၣ်ဝဲဘၣ်ဆၣ်, စီၤစိဖၢ် တဲဖျါထီၣ်ဝဲဒၣ် “တၢ်အၢမ့ၢ်အိၣ်လၢနစုပူၤဒီး, ကွံာ်တ့ၢ်ကွံာ်ဆူ အယံၤတက့ၢ်. ဒီးဒုးအိၣ်ဒုးဆိး တၢ်အၢတၢ်သီလၢနဒဲပူၤတဂ့ၤ. တုၤနုၤတစု…………, နကအိၣ်ခၢၣ်သနၢၢ်, ဒီးတပျံၤဘၣ်တၢ်ဘၣ်” (:၁၄-၁၅) န့ၣ်လီၤ.

လၢတၢ်ဆဲးအဲးဆဲးခွဲးအပူၤ, စီၤယိၤဘး စံးဆၢဝဲဒၣ် “တၢ်ကူၣ်သ့ကသံဒီးသုလီၤ. ယအိၣ်ယဲဒီးတၢ်သ့ၣ်ညါဒ်သုအသိး, ယတလီၤဘၣ်လၢသုဖီလာ်ဘၣ်. တၢ်ဒ်န့ၣ်သိးန့ၣ်မ့ၢ်မတၤတသ့ၣ်ညါဘၣ်တဂၤလဲၣ်” (၁၂:၂-၃) န့ၣ်လီၤ. စီၤယိၤဘး အတၢ်နးတၢ်ဖှီၣ်အဂ့ၢ်န့ၣ် တၢ်ကနၢ်ပၢၢ်အီၤနီၢ်နီၢ်အဂီၢ်, ကီခဲဝဲဒိၣ်မးအဃိ, အနီၢ်ကစၢ်ဒၣ်လဲာ်, တသ့ၣ်ညါ နၢ်ပၢၢ် တၢ်မၤအသးလၢအီၤဘၣ်န့ၣ်လီၤ. (ကွၢ် ယိၤဘး ၁-၂). အဝဲစံးကတိၤတၢ်တီတီလိၤလိၤ, “တၢ်ကူၣ်သ့, ဒီးတၢ်ဂံၢ်တၢ်ဘါ အိၣ်ဝဲဒီးယွၤ” (၁၂:၁၃) န့ၣ်လီၤ. တၢ်ကတိၤအံၤ, တအိၣ်ဟဲခီဖျိဝဲဒၣ် ပှၤလၢအဆိကမိၣ်လီၤက့ၤအသး, ဒ်ပှၤန့ၢ်စိန့ၢ်ကမီၤ, ဒီးသးအတၢ်ထံၣ်အိၣ်ဝဲ, တၢ်လၢအတမ့ၢ်အတၢ်တဂၤ, စီၤစိဖၢ် အအိၣ်ဘၣ်န့ၣ်လီၤ.

တဘျီဘၣ်တဘျီ, ပတံၤသကိးတဖၣ် ကလိၣ်ဘၣ် ပတၢ်ဟ့ၣ်ကူၣ်ဟ့ၣ်ဖးအဝဲသ့ၣ် လၢတၢ်အဲၣ်တၢ်ကွံအပူၤန့ၣ်လီၤ. ဘၣ်ဆၣ်, တံၤသကိးတဖၣ် လၢအဘၣ်ကီဘၣ်ခဲတဖၣ် အါတက့ၢ်န့ၣ် လိၣ်ဘၣ်ဝဲဒၣ်လၢ ပကသ့ၣ်နီၣ်ထုကဖၣ်တၢ်လၢအဝဲသ့ၣ်အဂီၢ်, ဆူ ကစၢ်ယွၤ လၢအသ့ၣ်ညါ အဝဲသ့ၣ်နီၢ်နီၢ်တဂၤအအိၣ်န့ၣ်လီၤ.