ဖဲ ကၠဲ(န)နံၣ်ဖၣ် (Jennifer) ဘၣ်ကူစါယါဘျါအသးလၢ ခိၣ်နုာ်အတၢ်သ့ဆိကမိၣ်ဘၣ်ဒိတၢ်ဆါ (dementia) စးထီၣ်သီဝံၤန့ၣ်ဒီး, ဖးလံာ်စီဆှံ တန့ၢ်ညီညီလၢၤဘၣ်အဃိ, စးထီၣ်ဒိကနၣ် လံာ်စီဆှံ, လၢတၢ်အကလုၢ်န့ၣ်လီၤ. ခဲကနံၣ်အံၤ, လံာ်စီဆှံအဆၢတဖၣ်အခီပညီန့ၣ် ကဲထီၣ်တၢ်အသီလၢအဂီၢ်န့ၣ်လီၤ. အဒိန့ၣ် အဝဲသးပ့ၤနီၣ်တၢ်ညီ, ဒီးအါစုအါဘျီန့ၣ် တသ့ၣ်ညါဝဲဒၣ် ပှၤကညီသ့ၣ်တဖၣ်လၢၤဘၣ်, ဒီးလၢအတၢ်ဆိကမိၣ်အပူၤန့ၣ်နၢ်ဟူထံၣ်မှံ ဆၣ်ဖိကီၢ်ဖိအမံၤတဖၣ်န့ၣ်လီၤ. ဖဲအသးဒံဝ့ၤဒံဝီၤ, ဒီးပျံၤတၢ်ဖုးတၢ်အကတီၢ်, အဝဲဒိးန့ၢ်ဘၣ် ယွၤအတၢ်မၤမုာ်ထီၣ်က့ၤအီၤ ဖဲအနၢ်ဟူဝဲဒၣ် ဝံယရှါယၤ အတၢ်ကစီၣ် “တၢ်စီဆှံအကျဲ,” ကအိၣ်ထီၣ်ဝဲလၢ “ပှၤလၢအလူၤပိာ်ကျဲတဘိအံၤ” (ယရှါ ၃၅:၈) အဂီၢ်န့ၣ်လီၤ. လၢကျဲတဘိအံၤအလိၤန့ၣ် ပှၤဟးဂီၤဖိအအၢအသီ, ဒီး “ဆၣ်ဖိကီၢ်ဖိလၢအဒူအဃိၤ တပိာ်ကျဲ အဝဲန့ၣ်နီတဒုဘၣ်” န့ၣ်လီၤ. မ့မ့ၢ်ထဲ “ပှၤလၢယွၤမၤပူၤဖျဲးတ့ၢ်အီၤတဖၣ် ကက့ၤဆူ အဟံၣ်လၢကျဲအဝဲန့ၣ်လီၤ” (:၉).

ဝံယရှါယၤ ဟ့ၣ်ခီနီၤလီၤ ကစၢ်ယွၤ အတၢ်အၢၣ်လီၤတဖၣ်ဆူ အပှၤဂီၢ်မုၢ်တဖၣ် လၢအဘၣ်တၢ်စိာ်မၢကဲကုၢ်န့ၣ်လီၤ. ပှၤဂီၢ်မုၢ်တဖၣ် ဘၣ်အိၣ်ယံၤဒီးယွၤအတၢ်လုၢ်ဟံၣ် တၢ်လီၢ်ဖဲအဝဲသ့ၣ် အသးကလၢၢ်ဘၣ် ကစၢ်ယွၤ အိၣ်ဒီးအဝဲသ့ၣ်န့ၣ်, ဒီးခဲကနံၣ်အံၤ, အဝဲသ့ၣ် ကအိၣ်သယုၢ်သညိ, ဒီးကသူၣ်အုးသးအုးဝဲဒၣ်န့ၣ်လီၤ. လၢတၢ်န့ၣ်အဃိ, တၢ်စီဆှံအကျဲ, ကျဲတဘိဆူ ကစၢ်ယွၤအအိၣ် အတၢ်အၢၣ်လီၤတဖၣ်န့ၣ် ကဟ့ၣ်ဝဲဒၣ် အပှၤဂီၢ်မုၢ်လၢ တၢ်မုၢ်လၢ်, ဒီးတၢ်ဂံၢ်တၢ်ဘါန့ၣ်လီၤ. လၢအပှၤဂီၢ်မုၢ်တဖၣ် အသးပူၤန့ၣ်ဆိကမိၣ်ဝဲလၢ တၢ်လဲၤနုာ်လီၤဆူ “စံယိၣ်အိၣ်ဒီးတၢ်သးဝံၣ်,” ပူၤဖျဲးဝဲလၢတၢ်ပျံၤတၢ်ဖုး, ဒီးတၢ်ဘၣ်မိၣ်ဘၣ်မး, ဒီးအပှၤဂီၢ်မုၢ် ကမုာ်လၤသးခုဘၣ်ဝဲ (:၁၀) န့ၣ်လီၤ.

ဒ် ကၠဲ(န)နံၣ်ဖၣ် ဟံးဃာ်ဂၢၢ်ကျၢၤ ယွၤအတၢ်ကတိၤအုၣ်ကီၤတဖၣ် လၢအပူၤကွံာ် နံၣ်ကယၤတဖၣ်အသိးန့ၣ်, ပဝဲပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်စ့ၢ်ကီး, ဒ်ပလဲၤတၢ်ဒီးအီၤအသိး, ပနာ်သ့ဝဲဒၣ်လၢ ပကသ့ၣ်ညါ တၢ်သးခု, ဒီးတၢ်သူၣ်ဖှံသးညီ (:၁၀) န့ၣ်လီၤ. လၢခ့ခါတၢ်အိၣ်မူအပူၤန့ၣ် ပမ့ၢ်ဘၣ်ကွၢ်ဆၢၣ်မဲာ် တၢ်မၤကွၢ်တဖၣ်, လၢပကဘၣ်ထဲးဂံၢ်ထဲးဘါ (မ့) တၢ်လၢကလဲလိာ်ကွံာ် ပတၢ်အိၣ်မူဒ်လဲၣ်ဂ့ၤဒ်လဲၣ်ဂ့ၤန့ၣ် ပသ့ၣ်ညါလၢ ကစၢ်ယွၤအကျဲ ကနဲၣ်ဆှၢပှၤဆူဟံၣ်, ဆူအအိၣ်န့ၣ်လီၤ.