ယပၢ် အတၢ်အိၣ်မူဒီစိၤ အတၢ်မံမီၢ်န့ၣ် မ့ၢ်တၢ်လဲၤဟးလိာ်ကွဲဆူ ကီၢ် စွံးစၢ်လဲၣ် (Switzerland)
န့ၣ်လီၤ. ဖဲယပၢ်ဒိးန့ၢ် “တၢ်တိၢ်နီၣ်က့ၤတၢ်တန့ၢ် ခိၣ်နူာ်တၢ်ဆါ” ဝံၤအလီၢ်ခံ, ယမိၢ်ပာ်လီၤသးလၢ ကလဲၤတၢ်ဒီးအီၤ ဖဲအဝဲအနီၢ်ခိက့ၢ်ဂီၤ ဖံးတၢ်မၤတၢ်န့ၢ်ဒံးအကတီၢ်န့ၣ်လီၤ. ယမိၢ်စံးဘၢ်ပှၤလၢ “ဘၣ်တနံၤ, ဖဲကစၢၢ်တ့းလ့း (Mount Titlis) အလိၤန့ၣ် ဘှ့ၣ်ပစီၤတဖၣ် ဟဲလီၤဝဲလၢပဃၢၤဝးဝးအကတီၢ်, ယထံၣ်တၢ်သူၣ်ခုသးခုဖးဒိၣ်လၢ နပၢ်အမဲာ်သၣ်လိၤ, ဖျါဝဲဒၣ်ဒ်အတၢ်မံမီၢ် လၢထီၣ်ပှဲၤထီၣ်ဝဲအသိး” န့ၣ်လီၤ. ဘၣ်ဆၣ်, လၢခံန့ၣ်, ဖဲယပါသံကွၢ်ဝဲ “ပဟဲတုၤလၢတၢ်လီၢ်
မတၤလဲၣ်” န့ၣ်ဒီး, ယမိၢ်အမဲာ်ထံယွၤလီၤဝဲဒၣ်န့ၣ်လီၤ.
ဘၣ်သ့ၣ်သ့ၣ်, ယပၢ်လဲၤဟးလီၣ်ကွဲဆူ ကီၢ် စွံးစၢ်လဲၣ် အဂ့ၢ်န့ၣ် ကသးပ့ၤနီၣ်ဝဲဘၣ်ဆၣ်, ယမိၢ်စံးဝဲဒၣ်လၢ “တၢ်လဲၤဟးလိာ်ကွဲန့ၣ် အလုၢ်အပှ့ၤအိၣ်ဝဲဒၣ်” န့ၣ်လီၤ. “အစှၤကတၢၢ်, ဒီးလၢတစိၢ်ဖိအဂီၢ်န့ၣ် အဝဲသ့ၣ်ညါ, ဒီးအသူၣ်ခုသးခုဝဲဒၣ်” န့ၣ်လီၤ.
အကတီၢ်ကအိၣ်ဝဲလၢ တၢ်တထုးဖးကွံာ် ပတၢ်သူၣ်ခုသးခု နီတဘျီလၢၤဘၣ်အဂ့ၢ်န့ၣ် ကစၢ်ယွၤ မၤလီၤတံၢ်ဝဲဒၣ်ပှၤန့ၣ်လီၤ. အဂ့ၢ်ဒ်အံၤ, ပမုၢ်လၢ်တၢ်လၢ ကစၢ်ယ့ၣ်ရှူးအဃိ, ပဆၢမုၢ်လၢ်ကွၢ်စိခါဆူညါ, ပကထူၣ်ဖျဲးလၢ တၢ်ဒဲးဘးဒီးတၢ်သံအလီၢ်အကျဲ (ရိမ့ၤ ၅:၁၂), “မူခိၣ်အသီ, ဒီးဟီၣ်ခိၣ်အသီ” (လီၣ်ဖျါ ၂၁:၁) သ့ဝဲဒၣ်န့ၣ်လီၤ. ကစၢ်ယွၤ ကဒုးအိၣ်ထီၣ် “တၢ်အသီခဲလၢာ်” (လီၣ်ဖျါ ၂၁:၅), လၢတၢ်လီၢ်တၢ်ကျဲအလၢအပှဲၤတတီၤအံၤန့ၣ်လီၤ. “ယွၤကထွါကွံာ် ပမဲာ်ထံခဲလၢာ်,.. ဒီးတၢ်သံတအိၣ်လၢၤဘၣ်, ဒီးတၢ်သူၣ်အုးသးအုးတအိၣ်လၢၤဘၣ်, ဒီးတၢ်ဟီၣ်တၢ်ယၢၤ, တၢ်ဘှံးသူၣ်ဘှံးသးတအိၣ်လၢၤဘၣ်. အဂ့ၢ်ဒ်အံၤ, တၢ်အိၣ်လၢအခီၣ်ထံးတဖၣ် ပူၤကွံာ်လံ” (:၄) န့ၣ်လီၤ. ခ့ခါအကတီၢ်, တၢ်နးတၢ်ဖှီၣ်တဖၣ်လၢ ပတူၢ်ဘၣ်ခီၣ်ဘၣ်တဖၣ်န့ၣ် မ့ၢ်တၢ်ကမၤအသးတစိၢ်တလီၢ်ဖိအဂီၢ်န့ၣ်လီၤ. တၢ်လၢမုၢ်တနံၤန့ၣ် ကစၢ်ယွၤ အၢၣ်လီၤအီလီၤဝဲဒၣ်လၢ “တၢ်အခီၣ်ထံးတဖၣ်န့ၣ် တၢ်တသ့ၣ်နီၣ်ထီၣ်က့ၤဘၣ်အီၤဘၣ်” (ယရှါ ၆၅:၁၇) န့ၣ်လီၤ. တၢ်သ့ၣ်တဖၣ် တအိၣ်ဝဲဒၣ် နီတမံၤလၢၤဘၣ်န့ၣ်လီၤ.
ဖဲပအိၣ်ဝဲဆိးဝဲဒီးကစၢ်ယွၤ အမုၢ်တနံၤအံၤ, (လီၣ်ဖျါ ၂၁:၃) အကတီၢ်န့ၣ်, ယသ့ၣ်ညါလၢ ယကထံၣ်ဘၣ်တၢ်သးခုဖးဒိၣ် လၢယပၢ်အမဲာ်သၣ်လိၤန့ၣ်လီၤ. အကတီၢ်ဖဲန့ၣ်, ပတၢ်သူၣ်ခုသးခုန့ၣ် ကအိၣ်ဂၢၢ်ဆိးကျၢၤဝဲဒၣ်န့ၣ်လီၤ.