လၢပျၢၤ, အဲကလံးစီၤပၤတဖၣ် မၤဝဲတၢ်အီၣ်အမူး ဝ့ၢ်လိဒိၣ် ဘျီၣ်ရိဖှိၣ်အဟံၣ် (London’s Banqueting House), အဃိးလာ်ဒါန့ၣ် လီၤဘီလီၤမုၢ်ဒိၣ်မးန့ၣ်လီၤ. လၢတၢ်မၤလၤကပီၤ အဒူၣ်ဖိထၢဖိ အတၢ်ပၢတၢ်ပြးအဂီၢ်, စီၤပၤ ခၠါ တၢ တဂၤ (King Charles I), ဟ့ၣ်လီၤအကလုၢ်, ဒီး “စၢၣ်. ဖံထၢၣ် ပီ ရူၤဘ့ၣ်(န)” (Sir Peter Paul Rubens) တ့ခဲၣ်ဝဲဒၣ်, ဖဲ ၁၆၂၉ ဒီး ၁၆၃၄ အဘၢၣ်စၢၤန့ၣ်လီၤ. လၢတၢ်တ့ခဲၣ်တၢ်ဂီၤ တထံၣ်အပူၤန့ၣ် မံၣ်နၢၣ်ဘါ (Minerva) ကစၢ်မုၣ် မၤလၤကပီၤ စီၤပၤ ခၠါ အပၢ်, စီၤပၤ ကၠ့(မ) တၢ တဂၤ (King James I) အတၢ်မၤန့ၢ်မၤနၢၤတၢ်တဖၣ်န့ၣ်လီၤ. လၢတၢ်ဂီၤအဂၤတထံၣ်န့ၣ် တၢ်စိာ်ထီၣ် စီၤပၤ ကၠ့ ဆူ မူခိၣ်ဘီမုၢ်, လၢလံာ်ကြီကြာ်တဘ့ၣ် အဒံးဆ့အလိၤန့ၣ်လီၤ. ပှၤတမှံၤလၢအဟဲထီၣ် တၢ်အီၣ်တၢ်အီအမူးတဖၣ် မ့ၢ်ကွၢ်ထီၣ်ဝဲ ဃိးလာ်ဒါန့ၣ်ဒီး, ကထံၣ်သ့ၣ်ညါ တၢ်ကစီၣ် လၢအမ့ၢ်, စီၤပၤတဖၣ်, ဒ်သိး ခၠါဒီးအပၢ်န့ၣ် အိၣ်ဖျါတြုာ်ကလာ် ဒ်ပှၤလၢအဘၣ်ထွဲဒီးကစၢ်ယွၤအသိးန့ၣ်လီၤ.

ဖဲဝံယရှါယၤ အမုၢ်နံၤမုၢ်သီတဖၣ်အဆၢကတီၢ်န့ၣ် ဘၤဘူၤလိၣ် အစီၤပၤ ထံၣ်လီၤအသးဒ်သိးအံၤန့ၣ်လီၤ. ဖဲအံၤန့ၣ် စီၤပၤတဂၤ, စံးဝဲဒၣ်လၢအသးကံၢ်ပူၤ “ယကထီၣ်ဘးဆူမူခိၣ်,….. ယကဆ့ၣ်နီၤလၢ တၢ်အိၣ်ဖှိၣ်အကစၢၢ်ကလိ,” ဘၣ်တၢ်ထံၣ်ဆိကမိၣ်ဝဲဒၣ် ဖဲကစၢ်တဖၣ် ပၢတၢ်အလီၢ်အကျဲ (ယရှါ ၁၄:၁၃) န့ၣ်လီၤ. လၢတၢ်ကမၤအသးဒ်သိးအံၤ အလီၢ်န့ၣ် ဝံယရှါယၤ ပာ်ဖျါဆိဝဲလၢ စီၤပၤအံၤ ယွၤကဒုးအိၣ်ဘှံးအီၤ (:၃-၄), “ယွၤကဒုးလဲၤအီၤဆူပျုၤပူၤ, ဆူတၢ်ယိာ်ပူၤအခံဒး” (:၁၅), ဒ်သိးတၢ်ကသ့ၣ်နီၣ်ထီၣ်က့ၤအီၤအဂီၢ်, အတၢ်သွၣ်ခိၣ်ဒၣ်လဲာ်, တအိၣ်ဝဲ (:၁၈-၁၉) ဘၣ်န့ၣ်လီၤ. တၢ်ဟဲဝံဒ်သိးအံၤန့ၣ် စီၤပၤ ခၠါ တၢတဂၤ ဘၣ်ကွၢ်ဆၢၣ်မဲာ်ဝဲန့ၣ်လီၤ. လၢတၢ်တဆိကမိၣ်အပူၤန့ၣ် တၢ်ဆီတလဲအသး, ဖဲ ၁၆၄၉ နံၣ်, တချုးပှၤမၤသံအီၤလၢ တၢ်အီၣ်အမူး ဘျီၣ်ရိဖှိၣ်အဟံၣ်မဲာ်ညါန့ၣ် ပှၤဒုးဟးထီၣ်အီၤ, ဖဲအထံၣ်လီၤက့ၤအသးဒ်အဘၣ်ထွဲဒီးကစၢ်ယွၤ, အဃိးလာ်ဒါအဖီလာ်န့ၣ်လီၤ.

တၢ်မၤအသးဒ်သိးအံၤ, ကဲထီၣ် တဘျီဝံၤတဘျီန့ၣ် မ့ၢ်တၢ်လီၤသးအုး, ပှၤအိၣ်ဒီးအစိအကမီၤတဖၣ် ထံၣ်လီၤအသး, ဒ်ပှၤအိၣ်ဒီးယွၤအလၤကပီၤန့ၣ် မုၢ်တနံၤ, ကသ့ၣ်ညါဝဲလၢ အမ့ၢ်ဒၣ် ပှၤဟီၣ်ခိၣ်ဖိန့ၣ်လီၤ. အဂ့ၢ်ဒ်အံၤ, ကစၢ်အဂ့ၤအဘၣ်န့ၣ် အိၣ်ဝဲဒၣ်ထဲတဂၤဧိၤ, ကအိၣ်ပၢတၢ်လၢမူခိၣ်ဘီမုၢ်, မ့ၢ်လၢကယဲၢ်တၢ်စိတၢ်ကမီၤ, တၢ်လၤတၢ်ကပီၤ, ဒီးတၢ်ကဟုကညီၢ်ခဲလၢာ်န့ၣ် အိၣ်ဝဲဒီးအီၤအဃိ (၁ ကွဲးနီၣ်တၢ် ၂၉:၁၁) န့ၣ်လီၤ.