ဖဲ မဲလနံၣ် (Melanie) အခိၣ်စးထီၣ်ဆါဝဲန့ၣ်ဒီး, အကသံၣ်သရၣ်တဖၣ် ဃုထံၣ်န့ၢ်ဝဲလၢ အပ့းခၠူၣ်အၤထရံၣ် အချံ (pituitary gland) အပူၤ, အိၣ်ဒီးအကမိာ်ချံဖိလၢ အတမ့ၢ်ခဲစၢၣ်န့ၣ်လီၤ. အကမိာ်ချံဖိန့ၣ် ကအိၣ်ဝဲဒၣ်ထဲထံမိၤတိၤသၣ်ဖိတဖျၢၣ်, ဒီးဘၣ်တၢ်ကွဲးထုးထီၣ်ကွံာ်အီၤ ဖဲ ၂၀၀၃ အနံၣ်, ဒီးမ့ၢ်လၢ အဟဲအိၣ်ထီၣ်ကဒီးအဃိ, ဘၣ်ကွဲးကဒီးဝဲ ဖဲ ၂၀၀၆ နံၣ်န့ၣ်လီၤ. ဘၣ်ဆၣ်, ဖဲ ၂၀၁၇ နံၣ်န့ၣ် ဟဲအိၣ်ထီၣ်ကဒီးသၢဘျီတဘျီအဃိ, မဲလနံၣ် ဘၣ်ဒိးယါဘျါအသး, ခီဖျိတၢ်ဆဲးကိၢ်အီၤလၢ လီမ့ၣ်ဧူၢ် (radiation), ဒီးတၢ်ယါဘျါတဘျီအံၤ မၤလီၤဆှုကွံာ် အခိၣ်သူခိၣ်ဆူၣ်တဖၣ်န့ၣ်လီၤ. အဖိခွါ မဲး (Matt), လၢအသးအိၣ် ခံဆံနွံနံၣ်န့ၣ် ပာ်လီၤသးလၢ ကပာ်ထီ အခိၣ်သူခိၣ်ဆူၣ် ဒ်သိးကမၤန့ၢ်ဝဲဒၣ် ခိၣ်သူအယီၤ (wig) လၢအမိၢ်အဂီၢ်န့ၣ်လီၤ.
မဲး အတၢ်ပာ်သူၣ်ပာ်သးလၢ အတကွၢ်ဒၣ်ထဲအဂီၢ်, ဒီးအတၢ်အဲၣ်အတၢ်မၤအံၤ ဒုးနဲၣ်ဖျါထီၣ် ပှၤကညီတဂၤ အတၢ်သ့တၢ်ဘၣ်, ဒီးတၢ်လၢအိၣ်ဒီးအီၤတဖၣ်န့ၣ်ဘၣ်တၢ်စူးကါအီၤသ့ဝဲဒၣ် လၢပှၤတဂၤဂၤအဂီၢ်, (မ့) ပှၤတဖုအတၢ်လိၣ်အဂီၢ်န့ၣ်လီၤ. တၢ်သးအိၣ်ဟ့ၣ်ဆၢလိာ်သးကဒဲကဒဲဒ်သိးအံၤန့ၣ် ပှၤဖံလံးပံၤဖိတဖၣ်အဂီၢ်, စီၤပီလူး ပာ်ဖျါထီၣ်ဝဲ လီၤလီၤဆီဆီ လၢအလံာ်ပရၢအပူၤန့ၣ်လီၤ. အဝဲစံးဘၣ် ပှၤစူၢ်က့ၤနာ်က့ၤတၢ်ဖိတဖၣ်လၢ ဝ့ၢ်ဖံလံးပံၤန့ၣ် “သုမၤစၢၤယၤလၢ ယတၢ်နးတၢ်ဖှီၣ်အပူၤ,….. လၢယန့ၢ်ဘၣ်တၢ်အလီၢ်အိၣ်န့ၣ်, သုဟ့ၣ်ယုၢ်တၢ်လၢယၤ, တစုဒီးခံစု” (ဖံလံး ၄:၁၄,၁၆) န့ၣ်လီၤ. စီၤပီလူး ဒိးန့ၢ် တၢ်ဟ့ၣ်တဖၣ်လၢ အဝဲသ့ၣ်အအိၣ်, ဒီးသ့ၣ်ညါနၢ်ပၢၢ်ဝဲလၢ အတၢ်လိၣ်တဖၣ်န့ၣ် ကစၢ်ယွၤ ကတဲာ်ကတီၤ ဟ့ၣ်လီၤအီၤလၢလၢပှဲၤပှဲၤန့ၣ်လီၤ.
ပတၢ်သးအိၣ် နီၤဟ့ၣ်သကိးတၢ်ကဒဲကဒဲန့ၣ် ကမ့ၢ်ကျိၤကျဲလၢ ကစၢ်ယွၤ ဆီၣ်ထွဲ မၤစၢၤဝဲ ပတၢ်အိၣ်မူတလီၢ်လီၢ်န့ၣ်လီၤ. ဘၣ်တဘျီဘျီ, ပကဘၣ်ဟ့ၣ်လီၤ ပဆၢပကတီၢ်, ပတၤလၣ်တၢ်သ့တၢ်ဘၣ်, (မ့) ပတၢ်ထူးတၢ်တီၤတဖၣ်, မ့မ့ၢ်လၢတၢ်ဆၢကတီၢ်အဂၤန့ၣ်, ပနီၢ်ကစၢ်ဒၣ်ဝဲ ပကလိၣ်ဘၣ်တၢ်တမံၤမံၤ, ဒီးပကဘၣ်သန့ၤလီၤသးလၢ ပှၤဂၤဆီၣ်ထွဲ မၤစၢၤပှၤန့ၣ်လီၤ. ခီဖျိလၢကစၢ်ယွၤအသး မၤတၢ်လၢပပူၤအဃိ, ပတၢ်ဟ့ၣ်တဖၣ်န့ၣ် မ့ၢ်တၢ်လၢ “အဘၣ်ယွၤအသး,” ဒီးဒုးနဲၣ်ဖျါထီၣ် ပတၢ်အိၣ်မူ လၢအဟ့ၣ်ခီဟ့ၣ်နီၤလီၤတၢ်, လၢကစၢ်ခရံာ် အနီၢ်ခိနီၢ်ကစၢ်အပူၤ (:၁၈) န့ၣ်လီၤ.
