ဖဲ ၂၀၁၉ လါ အ့ဖြ့ၣ်န့ၣ် မ့ၣ်အူအီၣ်တၢ်ဖဲ နီးထရၤ ဒါ(မ) ဒံၣ် ပဲရံၣ် (Notre-Dame de Paris), ပှၤရိမ့ၤ ခဲးသလ့း, အတၢ်ဘါယွၤသရိာ်, လၢအမံဟူသၣ်ဖျါဖဲ မံၣ်ဒံၢ်ဘၢၣ်အစိၤ, ဒီးမၤဟးဂီၤကွံာ် ပျိာ်ဖးထီ, ဒီးသ့ၣ်သ့ထိးဖၣ် အတၢ်တီဘိ လၢအပၢၤဃာ် စၢၢ်သူအခိၣ်ဒုးတဖၣ်န့ၣ်လီၤ. တကီၢ်ခါန့ၣ် တၢ်ဒုးအိၣ်ထီၣ် တၢ်ကဘှီဘၣ် မၤဂ့ၤထီၣ်က့ၤ တၢ်ဘါသရိာ် အတၢ်ရဲၣ်တၢ်ကျဲၤန့ၣ်လီၤ. လၢဟီၣ်ခိၣ်ဒီဘ့ၣ် တၢ်ဟ့ၣ်မၤဘူၣ်ကျိၣ်စ့တဖၣ်ဟဲနုာ်လီၤ, ဒီးပှၤစုသ့တဖၣ် စးထီၣ်တၢ်ဖံးတၢ်မၤ, စူးကါဝဲ တၢ်တ့ဘှီထီၣ် တၢ်သူၣ်ထီၣ်အကျိၤကျဲတမံၤဃီ, သ့ၣ်, ဒီးလၢၢ်လ့တဖၣ် ဘၣ်တၢ်စူးကါအီၤ, တမံၤဃီ, တကလုာ်ဃီ, ဒ်တၢ်သူၣ်ထီၣ် အခီၣ်ထံးခီၣ်ဘိအက့ၢ်အဂီၤအသိးန့ၣ်လီၤ.
တချုးလၢခရံာ်နံၣ် ၅၈၆ အနံၣ်န့ၣ်, ဖဲပှၤဘၤဘူၤလိၣ်ဖိတဖၣ် ဟဲကဝီၤဃာ် ဝ့ၢ်ယရူၤရှလ့ၣ်အကတီၢ်, နဘူးကးန့စၢ် မၢအပှၤသုးဖိတဖၣ် ဆူးထီၣ်ကွံာ် ကစၢ်ယွၤ အတၢ်လုၢ်ဟံၣ် လၢမ့ၣ်အူ, ဒီးတၢ်လုၢ်ဟံးန့ၣ် ဟးဂီၤကွံာ်ဝဲဒၣ်ခဲလၢာ် (၂ စီၤ ၂၅:၉) န့ၣ်လီၤ. ပှၤဂီၤမုၢ်တဖၣ် ဘၣ်တၢ်စိာ်မၢကဲကုၢ်လၢ ဘၤဘူၤလိၣ် အါနံၣ်အါလါဝံၤ, ဟဲက့ၤကဒါက့ၤဆူ ဝ့ၢ်ယရူၤရှလ့ၣ်န့ၣ်ဒီး, ပှၤဂီၢ်မုၢ်တဖၣ် “မၤဘူၣ်တီနံဒၣ်တၢ်လၢယွၤအဟံၣ် အဂီၢ်, ဒ်သိးအကသူၣ်ထီၣ်အီၤလၢအလီၢ်န့ၣ်လီၤ” (ဧ့စြၤ ၂:၆၈).
အဆိကတၢၢ်, ပှၤဂီၢ်မုၢ်တဖၣ် တ့ဒုးအိၣ်ထီၣ် ယွၤအတၢ်လုၢ်လီၢ်ဝံၤန့ၣ်ဒီး, “ဟ့ၣ်လီၤ စ့လၢပှၤမၤတၢ်လၢလၢၢ်, ပှၤမၤတၢ်လၢသ့ၣ်,” ဒီး “လၢတၢ်ပာ်လီၤတၢ်လုၢ်ဟံၣ်အခီၣ်ထံး” အဂီၢ်, မၤန့ၢ် သ့ၣ်ဆှိအ့ရ့းလၢလဘၤနိၣ် (၃:၇) န့ၣ်လီၤ. ပှၤဂီၢ်မုၢ်တဖၣ် အတၢ်ဂဲၤပျုၢ် ဂဲၤဆှး တ့သူၣ်ထီၣ်က့ၤ ယွၤအတၢ်လုၢ်ဟ့ၣ်န့ၣ် ဘၣ်တၢ်ထီဒါ, မၤတံာ်တာ်အီၤဒၣ်လဲာ်, အကတၢၢ်န့ၣ် မၤဝံၤဝဲဒၣ် တၢ်မၤတဖၣ်ခဲလၢာ်, ဒီးယွၤအပှၤဂီၢ်မုၢ်တဖၣ် ဘူၣ်ထီၣ်
ဘါထီၣ်ဘၣ်က့ၤကစၢ်ယွၤ လၢယွၤအတၢ်လုၢ်ဟံၣ် (၆:၁၄-၂၂) အပူၤန့ၣ်လီၤ.
ဒ်ပမ့ၢ်ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်အသိး, ကယဲၢ်ပဝဲနၤယၤခဲလၢာ်န့ၣ် ပမ့ၢ်ဒၣ် ယွၤအတၢ်လုၢ်ဟံၣ် (၁ ကရံၣ် ၃:၁၆-၁၇) န့ၣ်လီၤ. ကစၢ်ယွၤ ကတဲာ်ကတီၤန့ၢ် ပှၤတၢ်, ဒ်သိးပကဘှီဘၣ်မၤဂ့ၤထီၣ်က့ၤ ပှၤလၢအစူၢ်က့ၤနာ်က့ၤ ကစၢ်ယ့ၣ်ရှူးတဖၣ် ကဒဲကဒဲဆူညါကွ့ၢ်ကွ့ၢ်, တမ့ၢ်လၢသ့ၣ်, ဒီးလၢလၢၢ်န့ၣ်ဘၣ်. မ့မ့ၢ် ခီဖျိလၢတၢ်ကတိၤဟ့ၣ်ဂံၢ်ဟ့ၣ်ဘါတဖၣ်, တၢ်ဃ့ထုကဖၣ်န့ၢ်တၢ်, ဒီးလၢနီၢ်သးအတၢ်ဟ့ၣ်တဖၣ်, ဒ်သိး “ကမၤထီၣ်မၤထီလိာ်သကိးသး,” (၁ သ့း ၅:၁၁) အဂီၢ်န့ၣ်လီၤ.